Dutronome 9 - Bislama Bible Revised 2012

Ol laen blong Isrel oli no obei long Hae God

1Nao Moses i talem se, “!Olgeta! !Yufala i lesin gud! Bambae i no longtaem, yufala i gokros long Jodan Reva blong holem kantri ya narasaed. Ol man blong hem oli plante moa winim yufala, mo oli strong moa winim yufala. Ol taon blong olgeta oli bigbigwan, mo ol stonwol we oli goraon long olgeta oli hae we i hae,

2mo ol man blong ol taon ya oli longlongfala, mo oli strong tumas. Olgeta oli dabolbun. Yufala i save olgeta lelebet, mo yufala i harem tok ya finis, se i no gat man i save winim olgeta.

3Be naoia yufala i mas save. Hae God i God blong yumi, mo hem bambae i go fastaem long yufala, mo hem bambae i wok olsem wan bigfala faea we i stap kakae evri samting. Taem we yufala i stap go insaed long kantri ya, hem bambae i go fastaem long yufala, mo bambae i stap winim ol man ya, nao bambae yufala i save ronemaot olgeta, mo kwiktaem nomo, bambae yufala i save spolemgud olgeta, stret olsem we hem i promes finis.

4“Nao taem we hem i ronemaot olgeta finis long fes blong yufala, bambae yufala i no mas tingting se, ‘Hae God i tekem yumi i kam long ples ya, i givim kantri ya long yumi, from we yumi ol stret man.’ !Nogat! !I no olsem nating! Hem bambae i ronemaot olgeta long fes blong yufala, from we oli stap mekem sin, fasin blong olgeta i nogud olgeta.

5Yes, i tru we hem bambae i letem yufala i tekem kantri ya i blong yufala, be i no from we yufala i stret man, mo yufala i stap mekem ol stret fasin. !Nogat! Hem bambae i ronemaot olgeta oli gowe long kantri ya, from we oli stap mekem sin, fasin blong olgeta i nogud olgeta, mo from we hem i wantem holemtaet promes* ya blong hem we i bin mekem wetem Ebraham mo Aesak mo Jekob,* trifala bubu ya blong yumi bifo.

6Yufala i mas savegud we Hae God bambae i givim gudfala kantri ya i go long yufala, be i no from we yufala i stret man. !Yumi ol stronghed ya!

7“Oltaem yufala i mas tingbaot ol samting ya we ol olfala blong yufala oli mekem finis. I nogud yufala i fogetem taem ya we yumi stap long draeples, nao ol olfala ya oli mekem Hae God i kros tumas long yumi. Oltaem oli stap faet agens long hem, i stat long taem ya we yumi aot long Ijip, kam kasem taem we yumi kamtru long ples ya.

8Taem we yumi stap long botom blong hil ya Sinae, ol olfala ya oli mekem hem i kros we i kros, we klosap hem i kilim yumi from.

9Eks 24.18Long taem ya, mi mi go antap long hil ya blong tekem tufala ston ya we hem i raetem ol tok blong promes ya long tufala, we hem i mekem finis wetem yumi. Nao mi stap long ples ya foti dei mo foti naet, mo long taem ya, mi no kakae wan samting, mo mi no dring wan samting tu.

10-11Long taem ya, mi wetem ol lida blong yumi, mifala i bin kam wanples antap long hil ya, nao Hae God i bin kamtru long faea, i toktok long mifala. Mo biaen, hem i tekem tu flat ston, mo long han blong hem nomo, hem i raetemdaon ol tok ya we hem i talem long mifala. Nao taem ol foti dei mo foti naet ya i finis, hem i tekem tufala ston ya we ol tok blong promes ya i stap finis long tufala, mo i givim tufala long mi.

12“Nao hem i talem long mi se, ‘Moses. Yu godaon bakegen kwiktaem, from we ol man ya blong yu we yu tekemaot olgeta long Ijip, naoia oli tanem baksaed long mi, oli stap mekem sin. Oli lego fasin ya finis we mi mi talem long olgeta blong ol folem. Olgeta oli girap, oli wokem pija blong narafala god long gol, mo oli stap mekem wosip long hem.’

13“Mo bakegen, hem i talem long mi se, ‘Mi mi save we ol man ya oli mekem stronghed tumas.

14I nogud yu traem blokem mi, from we mi mi mekem plan finis blong kilim olgeta, blong bambae i no gat man i save tingbaot olgeta bakegen. Nao bambae mi mi mekem yu yu kam stamba blong wan narafala laen* we ol man blong hem oli plante moa, mo oli strong moa winim olgeta.’

15“Nao from samting ya, mi aot, mi kamdaon bakegen. Mi stap karem tufala ston ya we hem i raetem ol tok blong promes ya i stap long tufala, mo long taem ya, bigfala faea i stap laet yet antap long hil ya.

16Mo taem mi kamtru long yufala, mi luk we ol olfala ya oli no moa obei long Hae God. Nating we hem i God blong yumi, be oli mekem sin agens long hem. Olgeta oli girap, oli wokem wan aedol long gol we i pija blong wan smol bul, blong mekem wosip long hem.

17Nao from samting ya, mi tekem tufala ston ya, mi sakemdaon tufala stret long fes blong olgeta, mo tufala i brobrok.

18Nao mi foldaon long fes blong Hae God bakegen, mi prea. Mi ledaon we fes blong mi i godaon long graon, mo mi stap olsem gogo kasem foti dei mo foti naet, we mi no kakae mo mi no dring wan samting nating. Mi mi mekem olsem from we ol olfala ya oli mekem sin agens long Hae God, nao oli mekem hem i kros tumas long yumi from.

19Hib 12.21Mi mi fraet, from we Hae God i kros we i kros, i rere finis blong kilim yumi, be hem i harem prea blong mi bakegen.

20Mo Eron tu, long taem ya, Hae God i kros tumas long hem, i rere blong kilim hem i ded, be mi mi prea from hem, nao hem i no kilim hem.

21Nao mi tekem rabis samting ya we i nogud we i nogud, we olgeta ya oli wokem, mi sakem i go long faea. Nao mi brebrekem long ol smosmol pis, mo mi smasem i kam asis, nao mi sakem asis blong hem long wota ya we i aot long hil ya i ron i kamdaon.

22 Nam 11.3; Eks 17.7; Nam 11.34 “Mo long tri narafala taem bakegen, ol olfala ya oli mekem we Hae God i kros tumas long yumi. Hemia long taem ya we yumi stap long Tabera, mo long Masaha, mo long Kibrot Hatahava.

23Nam 13.17; Dut 1.21; Nam 13.31; Dut 1.26; Hib 3.16Mo long taem ya we yumi stap long Kadesbanea, Hae God i talem long yumi, se yumi mas go holem kantri ya we hem i talem finis se i blong yumi. Be ol olfala ya oli girap, oli agensem hem. Olgeta oli no trastem hem, mo oli no obei long ol tok blong hem tu.

24I stat bifo finis, taem we mi mi jes savegud olgeta fastaem, i kam kasem naoia, be oltaem olgeta i stap faet agens long Hae God.

25“Nao from ol samting ya, mi mi go foldaon long fes blong Hae God, mi prea strong long hem long ol foti dei mo foti naet ya, from we mi savegud we hem i talem finis, se bambae i kilim yufala.

26Long taem ya, mi mi prea long hem se, ‘Hae God, yu yu Masta* blong mi. Mifala ya, mifala i man blong yu nomo. Yu yu sevem mifala finis, long bigfala paoa blong yu. Yu yu tekemaot mifala long Ijip, mo yu mekem mifala i fri. Plis yu no kilim olgeta i ded.

27Plis yu no lukluk long fasin blong olgeta ya, we oli stap mekem stronghed, mo oli stap mekem sin, yu tingbaot trifala man ya Ebraham, mo Aesak mo Jekob, we trifala i man blong wok blong yu.

28Sipos yu yu spolem olgeta ya, bambae ol man Ijip oli save talem se yu yu no naf blong tekem ol man blong yu i gotru long kantri ya we yu promes finis blong givim long olgeta. Bambae oli save talem se yu jes tekem olgeta i kam long draeples ya blong kilim olgeta nomo, from we yu no laekem olgeta, yu agens long olgeta.

29Yu yu save, mifala ya, yu yu jusumaot mifala blong mifala i man blong yu, mo long bigfala paoa blong yu, yu yu tekem mifala i aot long Ijip, mifala i kam.’ ”