Ol Proveb 16 - Bislama Bible Revised 2012

1Man i save mekem plan blong hem, be Hae God nomo i save talem se plan ya i gud no i nogud.

2Maet man i ting se olgeta samting we hem i stap mekem oli stret nomo, be Hae God bambae i skelem tingting blong man ya se i stret no i no stret.

3Sipos yu askem long Hae God blong i lukluk gud long ol plan blong yu, wok blong yu bambae i save gohed gud.

4Olgeta samting we Hae God i mekem, hem i mekem we olgeta wanwan oli gat plan blong olgeta we bambae oli mas kamtru. Mo man nogud tu, Hae God i mekem plan blong hem we i blong spolem hem olgeta.

5Hae God i no wantem nating ol man we oli stap flas, oli stap leftemap olgeta. Ol man olsem bambae oli no save ronwe, hem bambae i panisim olgeta.

6Man we i stanap strong long Hae God, mo i putum tingting blong hem i stap strong long hem, Hae God bambae i fogivim hem, mo i tekemaot ol sin blong hem. Man we i stap tinghevi long Hae God, mo i stap ona gud long hem, hem i no save go klosap long ol fasin nogud.

7Taem man i stap mekem ol fasin we Hae God i glad long hem, Hae God i stap mekem ol enemi blong hem oli kam fren long hem bakegen.

8I moa gud man i kasem smol mane we i hadwok from, be i kasem long stret fasin, i winim we i kasem big mane long fasin we i no stret.

9Man i save mekem plan blong rod blong hem, be Hae God nomo i stap makem rod we hem i mas folem.

10Tok we king i talem, hem i talem long paoa we Hae God i givim long hem, mo taem hem i jajem man, ol tok blong hem oli stret nomo.

11Hae God i wantem blong ol man oli yusum skel mo meta we i stret gud, blong man i save pem ol samting long stret praes blong hem nomo.

12King i no wantem nating ol fasin nogud, from we stret fasin nomo i save mekem gavman i strong.

13Fasin blong king, hem i wantem harem ol trutok nomo, mo oltaem hem i glad long olgeta we oli stap talemaot ol samting we i stret.

14Man we i waes, oltaem hem i stap traehad blong mekem king i glad, from we sipos king i kros, i isi nomo blong man i ded.

15Taem king i glad, ol man blong hem oli stap gud. Fasin ya i olsem ren we i kam long taem blong planem garen.

16Sipos man i gat gol mo silva, hemia i gud, be sipos hem i waes mo i save plante samting, hemia i gud we i gud tumas.

17Ol gudfala man oli stap ronwe long ol fasin nogud. From samting ya, man we i lukluk gud long rod blong hem, hem i save sevem laef blong hem.

18Man we i praod bambae i kasem trabol we i spolemgud hem, mo man we i flas tumas bambae i foldaon we i foldaon olgeta.

19Fasin we man i mekem tingting blong hem i stap daon, mo i stap joen wetem ol puaman, hem i moa gud, i winim we man i stap joen long ol man blong flas, mo i stap kasem haf blong ol samting we olgeta ya oli stap stilim.

20Man we i stap lesin gud long ol samting we ol man oli stap tijim hem long hem, laef blong hem bambae i save gohed gud oltaem. Man we i stap trastem Hae God, hem bambae i harem gud.

21Man we i waes gud, ol man oli luksave we hem i gat hed. Ol gudfala tok blong hem i stap pulum plante man moa oli folem tingting blong hem.

22Man we i gat hed, waes blong hem i stap givim laef long hem, olsem springwota we i no save finis. Be man we i no gat hed, krangke fasin blong hem i stap pulum panis i kam long hem nomo.

23Man we i gat hed, hem i tingting gud fastaem, nao biaen i tok, mo ol samting we hem i talem i save pulum ol man oli folem tingting blong hem.

24Man we i kaen gud, tok blong hem i olsem gudfala kakae. Taem man i kakae, hem i harem i swit, mo i mekem bodi blong hem i strong.

25 Prov 14.12 I gat rod i stap we man i ting se i stret gud, be hem i rod blong ded nomo.

26Hanggri i save mekem man blong wok i wok had moa, from we hem i wantem blong i gat plante kakae.

27Man nogud, oltaem hem i stap lukaot rod blong spolem narafala man, mo ol tok blong hem tu i nogud olgeta, i stap kakae man olsem faea.

28Rabis man i save go olbaot blong statem trabol nomo, mo man we i stap go talem ol tok olbaot we i spolem nem blong narafala man, hem i save mekem ol man we oli fren gud oli seraot.

29Man blong faet, oltaem hem i stap trikim ol fren blong hem blong pulum olgeta i go long rod we i no stret.

30Sipos wan man i luk yu, nao i laf smol long yu, mo i stap satem ae long yu, yu mas lukaot gud. Man olsem i stap tingting long samting nogud, mo i wantem pulum yu nomo.

31Longfala laef, hem i pei we ol stret man oli kasem, mo taem man i gat waet hea, hemia i olsem wan gudfala hat blong king we ol man oli putum long hed blong man blong ona long hem.

32Man we i strong blong faet, hem i gud, be man we i save mekem tingting blong hem i longfala, hem i gud moa. Man we i save go mekem faet long ol narafala taon, mo i naf blong winim olgeta, hem i wan strong man, be man we i save blokem ol samting we hem nomo i wantem, hem i strong moa.

33Ol man oli stap yusum ol spesel ston* blong faenemaot ol samting we Hae God i wantem, be Hae God nomo i stap mekem ansa i kamaot.