2 Samuel 24 - Bislama Bible Revised 2012

King Deved i kaontem ol man(1 Kronikel 21.1-27)

1Nao long wan narafala taem, Hae God i kros long ol laen* blong Isrel* bakegen, mo i mekem we King Deved i pulum trabol i kam long olgeta. Hem i talem long king se, “Deved, yu go, yu mekem sensas blong kaontem olgeta man Isrel wetem olgeta man Juda.*”

2Ale, king i talem long Joab we i komanda blong ol soldia blong hem se, “Joab, yu wetem ol kapten blong yu, yufala i go pas long olgeta distrik long Isrel, yufala i kaontem olgeta man, i stat long taon ya Dan* long not, i go kasem taon ya Bereseba long saot. Mi mi wantem save hamas man olgeta.”

3Be Joab i tok long king, i talem se, “King. Yu yu save tingting blong mi. Prea blong mi, we Hae God bambae i mekem namba blong ol man ya blong yumi i kam antap moa, i bitim mak blong naoia handred taem, mo we yu bambae yu stap blong luk samting ya. ?Be blong wanem yu wantem mekem sensas ya?”

4Be king i strong, i mekem Joab mo ol kapten blong hem oli obei long tok blong hem. Nao oli aot long ples ya we king i stap long hem, oli go blong kaontem olgeta man long kantri ya.

5Olgeta oli gokros long Jodan Reva, nao oli go stanemap ol haos tapolen blong olgeta long distrik ya Gad,* long bigfala levelples long medel blong ol hil, long narasaed taon ya Aroere saed i go long saot. Nao oli kaontem ol man long ples ya, mo biaen, oli aot, oli go long Jasere long not,

6mo taem oli kaontem ol man long ples ya finis, oli aot bakegen. Nao long fasin ya we oli stap kaontem ol man long evri ples, oli go long Gilead, mo oli aot bakegen, oli go long Kades, long distrik ya we ol laen blong Het oli stap long hem, mo biaen, oli go long taon ya Dan. Nao taem oli aot long Dan, oli tanem i go long wes, oli go long taon ya Saedon,

7mo biaen, oli tanem bakegen, oli kam saot long taon ya Taea we bigfala stonwol i goraon long hem. Nao taem oli aot long ples ya, oli kam pas long ol taon blong ol laen blong Hivi,* mo long ol taon blong ol narafala man Kenan,* mo laswan, oli go olwe kasem taon ya Bereseba long distrik ya Juda, saed i go long saot,

8mo biaen, oli kambak bakegen long Jerusalem.* Olgeta oli stap wokbaot naen manis twanti dei blong pas long olgeta ples long kantri ya,

9nao oli givim ripot blong olgeta long king, se namba blong ol man we oli save go long faet i olsem. Long Isrel, i gat eit handred taosen man, mo long Juda, i gat faef handred taosen man bakegen.

10Be taem king i kaontem olgeta man finis, tingting blong hem i stat kam nogud, nao hem i prea, i talem se, “Hae God. Fasin ya we mi mi mekem i krangke ya. Mi mekem wan sin we i nogud tumas. Plis yu fogivim mi, yu tekemaot sin blong mi.”

Hae God i panisim King Deved

11-12Nao Hae God i talem long Profet Gad, we i profet blong King Deved se, “Gad. Yu go luk king, yu talem long hem, se bambae mi mi panisim hem. I gat tri panis i stap, mo mi wantem givim wan long trifala long hem. I stap long hem nomo blong i jusumaot weswan bambae mi givim long hem.”

Nao long nekis moning, taem king i wekap,

13profet ya i go luk hem, i talemaot ol tok ya long hem, mo i talem se, “Trifala panis ya i olsem. Wan, we bambae kakae i sot olbaot long kantri ya blong yumi go kasem tri yia, mo narawan, we bambae yumi stap ronwe long ol enemi blong yumi go kasem tri manis, mo narawan, we bambae wan rabis sik i stap spolem kantri ya blong yumi go kasem tri dei. Yu yu mas jusumaot weswan long trifala ya we yu yu wantem. Yu mas tingting gud long hem, mo yu mas givim ansa long mi naoia, blong mi go talemaot long Hae God.”

14Nao king i talem se, “!Tingting blong mi i lus nao! !Mi mi no save talem wan samting! Be mi mi no wantem blong ol man oli panisim mifala. I moa gud Hae God nomo i jusumaot panis blong mifala, from we fasin blong hem, oltaem hem i gat sore long man.”

15Nao Hae God i sanem wan rabis sik i kam long ol laen* blong Isrel,* i stat long moning ya, gogo i finisim taem ya we hem i putum. Sik ya i kasem olgeta man, i stat long taon ya Dan* long not, i go kasem taon ya Bereseba long saot. Mo i gat seventi taosen man oli ded long sik ya.

16Be taem enjel ya blong kilim man i rere blong spolem Jerusalem,* Hae God i jenisim tingting blong hem, i talem long hem se, “!Ei! !I naf! !Yu stop!”

Nao long taem ya, enjel ya i stap klosap long wan ples blong klinim bale* we i blong wan laen blong Jebus, we nem blong hem Aravnaha.

17Mo taem king i luk enjel ya, hem i prea, i talem se, “!Hae God, mi mi man nogud! Mi nao mi mekem samting nogud. Ol man ya oli no mekem wan samting. Sipos yu bin panisim mi nomo, wetem ol famle blong mi, bambae i moa gud.”

18-19Nao long sem dei ya nomo, profet ya i kam luk king, i talem long hem se, “King. Hae God i talem se yu mas go antap long ples ya blong klinim bale blong Aravnaha, yu wokem wan olta blong hem long ples ya.”

Nao king i obei long tok ya blong Hae God, i girap, i go mekem olsem we profet i talem.

20Mo taem Aravnaha i lukluk i godaon, hem i luk king wetem ol haeman blong hem oli stap kam antap long hem.

21Nao hem i nildaon long fes blong king, i bodaon we fes blong hem i kasem graon, mo i askem long hem se, “King. ?Olsem wanem? ?Yu yu kam from wan samting?”

Mo king i talem se, “Mi mi kam blong pemaot ples ya blong klinim bale blong yu. Mi wantem wokem wan olta blong Hae God long ples ya, blong blokem rabis sik ya.”

22Nao man ya i talem se, “King. Yu tekem nomo. Mo sipos yu wantem, yu save bonem ol samting blong ples ya blong givim i go long Hae God. Tufala buluk ya blong mi, yu save bonem long olta ya blong mekem wosip, mo ol yok* ya blong tufala mo ol plang blong kilim bale, yu save mekem faeawud long hem.”

23Hem i givim olgeta samting ya i go long king, mo i talem long hem se, “Hae God i God blong yu, mo prea blong mi we hem bambae i glad blong tekem ol samting ya we bambae yu givim long hem long wosip.”

24Be king i talem se, “No, mi mas pemaot. Mi mi no save mekem sakrefaes long Hae God long samting we mi mi no pem no we mi no wok from.” Nao hem i pem ples ya blong klinim bale wetem tufala buluk ya, long twanti faef taosen vatu.*

25Nao hem i wokem wan olta blong Hae God long ples ya, mo i bonem ol sakrefaes long hem, sam we oli bonem i bon evriwan, mo sam we oli bonem haf oli kakae haf, blong soemaot we oli fren gud wetem Hae God bakegen. Nao Hae God i harem prea blong hem, mo sik ya i finis long Isrel.