Jeremaea 11 - Bislama Bible Revised 2012

Ol man oli brekem promes we Hae God i mekem wetem olgeta

1Nao Profet Jeremaea i talemaot we Hae God i talem long hem se,

2-3“Jeremaea. Mi mi Hae God, mi God blong yufala ol laen* blong Isrel,* mo yu mas lesin gud long promes* ya we mi mi mekem wetem ol bubu blong yufala bifo. Yu yu mas talemaot long ol man Jerusalem,* mo long ol narafala man Juda,* we mi mi putum strong tok finis, se ol man we oli no obei long promes ya, bambae oli mas panis.

4Promes ya nao, mi mi givim long ol bubu blong yufala bifo, long taem ya we mi tekemaot olgeta long Ijip, ples ya we oli stap wok slef* long hem. Long ples ya, olgeta oli harem olsem we i hot we i hot tumas, olsem we oli stap long bigfala faea we i laet. Nao taem mi tekemaot olgeta, mi talem long olgeta, se oli mas obei long mi, mo oli mas mekem evri samting we mi talem long olgeta. Mo mi talem se sipos oli obei long mi, bambae oli kam man blong mi, mo mi bambae mi God blong olgeta.

5Mo mi promes se bambae mi holemstrong promes ya we mi mekem wetem olgeta, se bambae mi mi givim gudfala graon ya long olgeta. Hemia graon ya we yufala i stap long hem tede.”

Nao profet i talem se, “Hae God, bambae mi talem olsem we yu yu talem.”

6Nao Hae God i toktok long profet bakegen, i talem se, “Naoia yu go long ol taon long Juda, mo yu pas long ol rod blong taon ya Jerusalem. Yu talemaot ol tok blong mi long ol ples ya, mo yu talem long olgeta we mi mi talem se, ‘!Olgeta! Yufala i mas lesin long tok blong promes ya, mo yufala i mas obei gud long hem.

7I stat long taem ya bifo, we mi mi tekemaot ol bubu blong yufala long Ijip, kam kasem tede, oltaem mi stap tok blong wekemap yufala blong yufala i obei long mi.

8Be yufala evriwan i no lesin long mi, yufala i no obei long mi nating. Yufala i jes gohed nomo long stronghed blong yufala, mo yufala i stap mekem ol rabis samting we i stap kamaot long tingting blong yufala. Mi bin talem strong long yufala, se yufala i mas holemstrong promes ya, be yufala i no wantem. Nao from samting ya, olgeta panis we promes ya i tokbaot, mi mi mekem i kam kasem yufala.’ ”

9Nao Hae God i talem long profet se, “Naoia ol man Jerusalem wetem ol narafala man Juda, oli stap mekem ol rabis plan blong olgeta agens long mi.

10Oli gobak finis long ol rabis fasin ya we ol bubu blong olgeta bifo oli mekem, we oli no wantem nating blong mekem ol samting we mi mi talem long olgeta, mo oli stap mekem wosip long ol narafala god. Ol man Isrel bifo, mo ol man Juda naoia, olgeta evriwan oli brekem promes ya we mi mekem wetem ol bubu blong olgeta bifo.

11Nao from samting ya, mi mi tok long olgeta blong wekemap olgeta, se bambae mi mas spolem olgeta, mo bambae i no gat wan long olgeta, we i save ronwe long trabol ya. Nating sipos oli singaot i kam long mi blong mi givhan long olgeta, be bambae mi no save lesin long olgeta.

12Nao ol man Jerusalem wetem ol narafala man Juda bambae oli go long ol god ya we oli stap mekem wosip long olgeta, mo bambae oli krae long olgeta, blong oli givhan long olgeta. Be taem we trabol ya i kam kasem olgeta, ol god ya bambae oli no save sevem olgeta nating.

13Olgeta ya, oli gat plante god blong olgeta, olsem ol taon blong olgeta we oli plante we plante, mo ol olta blong olgeta blong mekem wosip long rabis god ya Bal,* oli plante we plante, olsem ol rod long taon ya Jerusalem.

14Be yu yu no mas prea from ol man ya, mo yu no mas krae i kam long mi long nem blong olgeta, blong mi givhan long olgeta, from we sipos oli stap long trabol, nao oli krae i kam long mi, be bambae mi no save lesin long olgeta.”

15Nao profet i talemaot we Hae God i talem se, “Mi mi lavem yufala, be yufala i stap mekem ol samting we i no stret. Yufala i no gat raet nating blong stap long haos* blong mi. Yufala i stap mekem ol promes long mi, mo yufala i stap givim ol presen ya long mi, we yufala i stap bonem blong mekem sakrefaes. !Yufala i ting se ol samting ya i save blokem trabol ya, blong i no kam kasem yufala! !Nogat! !Trabol ya i mas kasem yufala! ?Mo taem hem i kamtru, bambae yufala i glad?

16Bifo, mi mi stap singaot yufala, se yufala i wan gudfala olif* we ol lif mo ol frut blong hem oli gudfala tumas. Be naoia, bambae mi mi faerap long hem olsem tanda, mo mi brebrekem ol han blong hem, mo mi bonem olgeta lif blong hem long faea.

17“Mi Hae God, mi gat olgeta paoa, mo mi nomo mi putum yufala ol laen blong Isrel evriwan long kantri blong yufala. Be naoia, mi bambae mi spolemgud yufala long bigfala trabol ya, from we yufala i mekem i no stret nating. Yufala i stap mekem wosip long god ya Bal, mo fasin ya i mekem mi mi kros we mi kros.”

Ol man Anatot oli mekem plan blong kilim Jeremaea

18Nao Profet Jeremaea i talem se, “Wan dei, Hae God i soemaot long mi ol rabis plan we ol enemi blong mi oli stap mekem agens long mi.

19Be mi mi olsem wan smol sipsip nomo, we oli tekem i go blong kilim i ded, mi no save nating se oli stap mekem ol rabis plan ya blong olgeta agens long mi. Oli stap talem se, ‘Yufala i kam, yumi katemdaon gudfala tri ya, yumi kilim hem i ded, blong ol man oli no moa save tingbaot hem bakegen.’

20“Nao mi mi prea, mi talem se, ‘Hae God, yu yu gat olgeta paoa. Yu nomo yu stret man blong jajem man, mo yu yu stap traem tingting blong man, mo save blong hem. Nao ol samting ya we oli mekem long mi, mi mi putum evriwan long han blong yu. Naoia, bambae mi stap wet nomo, blong luk we bambae yu yu mekem wan samting long olgeta, blong givimbak ol samting ya we oli mekem agens long mi.’

21“Nao Hae God i talem long mi se, ‘Ol man Anatot oli wantem tumas blong kilim yu. Oli talem se bambae yu no mas talemaot tok blong mi bakegen, mo sipos yu gohed blong mekem olsem, bambae oli kilim yu yu ded.

22Be mi mi gat olgeta paoa, mo mi talem long yu se bambae mi mi panisim olgeta ya. Ol yang man blong olgeta, bambae ol enemi oli kilim olgeta, mo ol pikinini blong olgeta bambae oli ded long hanggri.

23Mi makem taem finis, we bambae mi mi mekem trabol ya i kam kasem olgeta. Mo taem stret taem ya i kamtru, bambae i no gat wan long olgeta i save laef.’ ”