Namba 15 - Bislama Bible Revised 2012

Ol rul blong sakrefaes

1-2Nao Hae God i givim ol rul long Moses blong ol laen* blong Isrel* bambae oli folem taem oli go stap long kantri ya we hem i promes* finis blong givim long olgeta.

3Hem i talem se, “Mi mi Hae God, mo tok blong mi i olsem. Sipos yufala i wantem kilim wan anamol blong bonem blong givim i kam long mi, bambae yufala i save tekem wan bul, no wan man sipsip, no wan woman sipsip, no wan nani. Long anamol ya bambae yufala i save mekem sakrefaes ya we i blong bonem i bon evriwan blong mekem wosip long mi, no sakrefaes ya we i blong fulumap promes we yufala i mekem long mi, no sakrefaes ya we yufala i bonem blong givim i kam long mi long gladhat blong yufala nomo, no ol sakrefaes ya we yufala i stap mekem oltaem long ol lafet blong yufala blong mekem wosip long mi. Mo sipos yufala i bonem anamol olsem blong givim i kam long mi, gudfala smel blong hem bambae i mekem mi mi glad tumas long hem.

4-5Nao sipos wan man i tekem wan anamol olsem blong mekem sakrefaes long hem, hem i mas tekem wan kilo flaoa we i kafsaedem wan lita olifoel* i go long hem, i tantanem i go wetem, we hemia i presen long kakae blong garen.* Mo sipos wan man i tekem wan smol sipsip blong mekem sakrefaes ya we i blong bonem i bon evriwan, hem i mas tekem wan lita waen tu blong givim i kam long mi.

6Mo sipos wan man i tekem wan man sipsip i kam blong mekem sakrefaes olsem, bambae hem i mas tekem tu kilo flaoa we i tantanem wetem wan lita haf olifoel, blong mekem presen long kakae blong garen,

7mo i mas tekem wan lita haf waen blong givim i kam long mi. Mo gudfala smel blong ol sakrefaes ya bambae i mekem mi mi glad tumas long hem.

8Mo sipos wan man i tekem wan bul blong mekem sakrefaes ya we i blong bonem i bon evriwan, no blong mekem sakrefaes ya we i blong fulumap promes blong hem, no blong mekem sakrefaes ya we i blong soemaot we hem i stap fren gud wetem mi,

9-10bambae hem i mas tekem tri kilo flaoa we i tantanem wetem tu lita olifoel blong mekem presen long kakae blong garen, mo i mas tekem tu lita waen blong givim i kam long mi. Bambae hem i mas bonem ol samting ya, mo gudfala smel blong hem bambae i mekem mi mi glad tumas long hem.

11Nao sipos wan man i wantem mekem sakrefaes long wan anamol olsem, hemia nao ol narafala samting we hem i mas tekem i kam wetem.

12Mo sipos wan man i tekem tutri anamol wantaem blong mekem sakrefaes, mak blong ol narafala samting ya i mas stret long mak blong ol samting we i mas givim wetem ol anamol ya wanwan.

13“Yufala i man blong mi, mo sipos yufala i wantem bonem anamol blong mekem ol sakrefaes ya, hemia nao fasin we bambae yufala i mas folem.

14Mo sipos wan narafala man i stap wetem yufala blong smoltaem nomo, no blong longtaem, nao hem i wantem bonem anamol blong mekem ol sakrefaes ya, hem i mas folem sem rul ya nomo we yufala i folem.

15Sem rul ya i kavremap yufala evriwan wetem ol pikinini blong yufala, mo olgeta we bambae oli kamaot biaen long yufala, mo ol narafala man we oli stap wetem yufala. Long fes blong mi, fasin we bambae yufala i folem, olgeta ya tu oli mas folem.

16Lev 24.22Sem rul ya, bambae yufala evriwan i mas folem.”

17Nao bakegen, Hae God i givim

18ol narafala rul long Moses blong ol man ya bambae oli folem taem oli go stap long kantri ya we hem i promes finis blong givim long olgeta.

19-20Hem i talem se, “Sipos yufala i gotru longwe, nao yufala i stap mekem garen, be taem yufala i stap tekemaot ol fas kakae blong hem, oltaem yufala i mas putum haf i tabu, i blong mi. Nao sipos yufala i kukum bred* long hem, be fas bred we yufala i mekem long ol fas kakae ya, oltaem yufala i mas givim haf i kam long mi, nao yufala i save kakae ol narahaf blong hem. Mo yufala i mas givim bred ya long mi long sem fasin ya we yufala i stap givim ol bale* blong yufala long mi, taem we yufala i klinimaot ol makas blong hem.

21Rul ya, yufala wetem ol pikinini blong yufala, mo olgeta we bambae oli kamaot biaen long yufala, bambae yufala evriwan i mas folem olwe, gogo i no save finis.

Sakrefaes we man i mas mekem blong tekemaot sin blong hem we i no tingting blong mekem

22“Mo sipos yufala evriwan i no folem olgeta rul ya we mi mi givim long yu tede, yufala i mestem wan long olgeta,

23i stat long olgeta rul ya we mi mi givim long yu fastaem, i kam kasem olgeta ya we mi givim long yu tede,

24rod blong stretem samting ya i olsem. Sipos yufala i no tingbaot blong brekem rul ya, yufala i mestem tru, bambae yufala evriwan i mas joen blong tekem wan yang bul blong mekem sakrefaes ya long hem we i blong bonem i bon evriwan blong mekem wosip long mi, nao mi bambae mi glad long smel blong hem. Mo yufala i mas tekem ol flaoa mo waen i kam we i stret blong givim long mi wetem sakrefaes ya, olsem we rul i talem. Mo bakegen, yufala i mas tekem wan man nani blong mekem sakrefaes ya long hem we i blong tekemaot sin blong yufala.

25Pris bambae i mas mekem sakrefaes blong tekemaot sin blong yufala, nao mi bambae mi fogivim yufala, from we yufala i no tingbaot blong brekem rul ya, yufala i mestem nomo, nao yufala i luk rong blong yufala, mo yufala i mekem sakrefaes ya long mi long bul ya we yufala i bonem i bon evriwan, mo yufala i mekem sakrefaes ya tu long man nani we i blong tekemaot sin blong yufala.

26Bambae mi fogivim yufala evriwan we i laen* blong Isrel,* wetem ol narafala man tu we oli stap wetem yufala, mi tekemaot ol sin blong yufala, from we yufala evriwan i mestem rul ya. Mi mi Hae God, mo hemia tok blong mi.

27 Lev 4.27-31 “Be sipos wan man nomo i mestem wan long ol rul ya, nao i mekem wan samting nogud we i no tingbaot blong mekem, hem bambae i mas tekem wan woman nani we i gat wan yia blong hem, blong mekem sakrefaes ya long hem we i blong tekemaot sin blong hem.

28Bambae pris i stap long Olta, i mekem sakrefaes blong tekemaot sin blong man ya, mo mi bambae mi fogivim hem, mi tekemaot ol sin blong hem.

29Sem rul ya bambae i kavremap yufala evriwan we i mestem wan long ol rul ya, nao i mekem samting we i nogud, nating we man i laen blong Isrel, no i narafala man.

30“Be sipos wan man i mekem wan samting we i nogud, we hem i tingbaot blong mekem, man ya i stap mekem i nogud long mi. Nating we hem i wan long yufala no i narafala man, be man ya bambae i ded,

31from we hem i tanem baksaed long mi. Hem i no wantem harem tok blong mi, nao i girap, i brekem wan long ol tok ya we mi mi talem. Bambae hem i ded, be i fol blong hem nomo. Mi mi Hae God, mo hemia tok blong mi.”

Wan man i brekem loa blong Sabat dei

32Nao wan taem, taem we ol laen* blong Isrel* ya oli stap yet long draeples, sam man oli faenem wan man i stap tekem faeawud long Sabat* dei.

33Nao oli tekem man ya i kam stanap long fes blong Moses wetem Hae Pris Eron, mo olgeta narafala man we oli stap long ples ya,

34mo olgeta ya oli putum hem long han blong ol man blong oli stap gad long hem, from we oli no savegud wanem bambae oli mekem long hem.

35Nao Hae God i talem long Moses se, “Yufala i mas tekem hem i go afsaed long ples ya blong yufala, mo yufala i go kilim hem i ded. Yufala evriwan i mas stonem hem gogo i ded.”

36Nao olgeta evriwan oli tekem man ya oli go afsaed long ples blong olgeta, mo oli stonem hem gogo i ded, olsem we Hae God i talem long olgeta.

Rul blong ol samting ya we i blong putum long klos blong mekem man i tingbaot ol tok blong Hae God

37Nao Hae God i talem long Moses,

38Dut 22.12blong i talemaot long ol man ya se, “Bambae yufala i mas somap ol tasel* oli stap hanghang long ol kona blong ol klos blong yufala, mo yufala i mas putum wan blu rop long ol tasel ya, mo fasin ya bambae yufala i mas holem oltaem, gogo i no save finis.

39Ol tasel ya bambae oli stap blong makem ol tok blong mi, nao sipos yufala i luk olgeta, bambae yufala i save tingbaot ol tok ya bakegen, nao bambae yufala i no save gowe long mi, blong folem tingting blong yufala long ol samting we yufala i wantem, bambae yufala i obei long ol tok ya blong mi.

40Ol tasel ya, bambae oli mekem yufala i stap tingbaot ol tok ya blong mi blong obei long olgeta, nao bambae yufala i kam tabu, yufala i kam man blong mi olgeta.

41Mi mi Hae God, mi God blong yufala. Mi nao mi tekemaot yufala long Ijip blong mi kam God blong yufala. Mi mi Hae God.”