1Nao Profet Jeremaea i talemaot bakegen we Hae God i talem se, “Ol laen* blong Isrel.* Mi bambae mi mekem wan strong win i blu, i kam spolem kantri ya Babilonia wetem ol man blong hem.
2Bambae mi sanem ol man blong narafala kantri oli kam flatemgud kantri ya, olsem we win i stap blu long doti blong wit,* i karem i go. Taem we dei ya i kam, olgeta ya bambae oli aot long evri saed, oli kam faet agens long olgeta, nao bambae oli brumumaot kantri ya, gogo i no gat wan samting i stap.
3“Ol enemi blong Babilonia. Bambae yufala i no mas givim janis long ol soldia blong olgeta blong oli putum klos blong faet blong olgeta, no blong oli sut long bonara blong olgeta. !Bambae yufala i mas flatemgud olgeta soldia ya evriwan! !Bambae yufala i no mas letem ol yang man ya blong olgeta oli laef!
4Bambae yufala i mas kilim olgeta oli ded olbaot long kantri blong olgeta, mo long ol taon blong olgeta.
5“Ol laen blong Isrel. Mi mi Hae God we mi gat olgeta paoa, mi mi tabu, mo mi God blong yufala. Mo nating we yufala ol man Isrel mo ol man Juda,* yufala i mekem sin agens long mi, be mi mi no save lego yufala.
6 !Yufala i mas aot long Babilonia, yufala i ronwe! !Yufala i mas sevem laef blong yufala! I nogud yufala i ded wetem olgeta from sin blong olgeta, from we taem i stap kam we mi bambae mi givim panis long olgeta. Panis ya, olgeta bambae oli mas kasem from ol samting nogud ya we oli mekem.
7Rev 17.2-4; 18.3Kam kasem naoia, kantri ya i olsem pankin we oli wokem long gol, mo mi holem long han blong mi, blong mekem olgeta man long wol oli dring long hem. Mo ol kantri we oli dring long hem, oli fuldrong we oli lusum hed.
8Be long fiuja, kantri ya tu bambae i foldaon wantaem, mo ol enemi blong hem bambae oli kam spolem evri samting we i stap long hem. Bambae ol man oli save krae from hem, mo bambae oli save tekem sam meresin, oli putum long soa blong hem. Maet bambae oli save mekem hem i harem gud bakegen.
9Rev 18.5Be ol strenja we oli stap long Babilonia, bambae oli save taltalem long olgeta se, ‘Yumi traehad blong givhan long kantri ya, blong i kam gud bakegen, be i let finis. Yumi no naf blong mekem. Yumi livim hem. Yumi gogobak long ol kantri blong yumi. God i panisim hem finis long olgeta paoa blong hem, mo i spolem we i spolemgud.’ ”
10Mo profet i gohed i talemaot we Hae God i talem se, “Ol man blong mi. Long taem ya, bambae yufala i harem gud, yufala i stap singsingaot se, ‘Hae God i God blong yumi, mo hem i soemaot finis we yumi mekem i stret nomo. Yumi mas gobak long Jerusalem,* yumi mas talemaot ol samting ya we hem i mekem long yumi.’ ”
11Mo bakegen, profet i talem se, “Long taem ya, Hae God bambae i mekem we ol king blong Media oli girap, oli go mekem faet agens long ol man Babilonia, from we hem i mekem plan blong flatemgud kantri ya. Hem bambae i mekem olsem blong panisim olgeta, from we oli spolem haos blong hem. Nao ol kapten blong ol soldia bambae oli talem long ol soldia blong olgeta se, ‘!Yumi mas sapenemgud ol ara blong yumi! !Yumi mas holemrere ol sil* blong blokem ol ara!
12Yumi mas pulum flaeg blong mekem saen blong go brekem ol wol blong taon ya. Yumi mas putum plante long yumi oli stap gad. Mo yumi mas putum ol wajman blong oli stap waj. Mo yumi mas putum ol man oli stap haed blong kilim ol man blong taon ya.’ ”
Mo profet i talem se, “Ol samting ya we Hae God i talem fastaem, se bambae i mas mekem long ol man Babilonia, be bambae hem i mas mekem.
13Rev 17.1Kantri ya i gat plante reva blong hem, mo i rij we i rij, be taem blong hem i stap kam, we bambae hem i finis olgeta.
14Hae God i gat olgeta paoa, mo hem i mekem strong tok finis, we i yusum nem blong hem nomo blong mekem tok ya i stanap. Hem i talem se, ‘!Ol man Babilonia! Mi bambae mi letem ol man oli kam faet agens long yufala, we oli plante we plante winim ol lokis.* Mo bambae oli stap singsingaot bigwan, from we oli winim yufala.’ ”
Singsing blong presem Hae God15Nao Profet Jeremaea i presem Hae God, i talem se,
“Hae God i mekem wol ya
long paoa blong hem nomo.
Long waes blong hem,
hem i putum wol ya i stap gud,
mo long save blong hem,
hem i putum skae long ples blong hem.
16Taem hem i tok,
wota long skae i mekem bigfala noes.
Hem i stap mekem ol klaod
oli aot long narasaed wol oli kam.
Hem i mekem laetning i laet
long bigfala ren,
mo hem i mekem
win i kamaot long ples blong hem,
i stap blu.
17Taem ol man oli luk ol samting ya,
oli luksave se oli no gat hed,
oli krangke nomo.
Ol man blong wokem ol god blong olgeta long gol,
oli sem gud,
from we ol god ya we oli wokem,
oli giaman god nomo,
oli no gat laef nating.
18Ol god ya oli no save mekem wan samting,
mo i stret nomo
blong ol man oli ting rabis long olgeta.
Taem Hae God i kamtru,
hem bambae i spolemgud olgeta,
nao bambae oli lus.
19God blong Jekob,*
olfala bubu ya blong yumi bifo,
hem i no olsem ol god ya.
Hem nomo i mekem olgeta samting long wol ya,
mo hem i jusumaot yumi
se yumi ol man blong hem nomo.
Nem blong hem,
Hae God we i Gat Olgeta Paoa.”
Ol man Babilonia oli olsem bigfala hama blong Hae God20Mo Profet Jeremaea i talemaot we Hae God i talem se,
“Ol man Babilonia.
Yufala i olsem bigfala hama blong mi
we mi yusum long taem blong faet.
Mi mi yusum yufala
blong flatemgud olgeta kantri,
mo blong daonem ol king
wetem ol man blong olgeta.
21Mi yusum yufala
blong kilim ol man blong ron long hos
wetem ol hos blong olgeta oli ded.
Mo mi yusum yufala
blong brebrekem ol kat blong faet,
mo blong kilim ol draeva blong olgeta oli ded.
22Mi yusum yufala
blong kilim ol man mo ol woman.
Mo mi yusum yufala
blong kilim ol olfala mo ol yangfala,
mo blong kilim ol boe mo ol gel.
23Mi yusum yufala
blong kilim ol man blong lukaot long sipsip,
wetem ol sipsip blong olgeta,
mo blong kilim ol man blong wokem garen*
wetem ol hos blong pulum plao blong olgeta.
Mo mi yusum yufala
blong kilim ol haeman
mo ol sekretari blong olgeta.”
Panis we ol man Babilonia bambae oli kasem24Nao bakegen, Profet Jeremaea i talemaot we Hae God i talem se, “Ol laen* blong Isrel.* Bambae yufala i save luk we mi bambae mi spolem kantri ya Babilonia wetem ol man blong hem, from ol rabis fasin ya we oli mekem long Saeon.*
25“Babilonia. Yu yu gat bigfala paoa. Yu yu olsem wan bigfala hil we i stap spolemgud olgeta ples long wol. Be mi mi enemi blong yu. Bambae mi daonem yu, mi flatemgud yu, mo bambae yu yu kam olsem asis nomo.
26Ol ston blong yu, neva man bambae i save yusum bakegen blong wokem haos long hem. Bambae ples ya i kam draeples, mo bambae i stap olsem gogo i no save finis. Mi mi Hae God, mo hemia tok blong mi.
27“Ol enemi blong Babilonia. Long taem ya, bambae yufala i mas pulum flaeg blong mekem saen se bambae faet i stat, mo bambae yufala i mas blu long pupu, blong olgeta kantri bambae oli harem. Mo bambae yufala i mas talem long olgeta, blong oli mekemrere blong faet agens long kantri ya. Bambae yufala i mas talemaot long king blong Ararat, mo long king blong Mini, mo long king blong Askenas, blong olgeta tu oli kam faet agens long hem. Bambae yufala i mas jusumaot wan haeman, blong hem i lidim ol man ya oli kam faet agens long kantri ya. Bambae yufala i mas tekem ol hos oli kam we oli plante we plante olsem ol lokis,*
28mo bambae yufala i mas mekemrere olgeta kantri blong oli kam faet agens long hem. Bambae yufala i mas sanem tok i go long ol king blong Media, mo long ol lida blong olgeta, mo long ol haeman blong olgeta, mo long olgeta soldia blong ol kantri we ol king ya oli rul long olgeta, blong olgeta evriwan i kam.
29Long taem ya, olgeta ples long wol ya bambae oli seksek, oli fraet tumas, from we promes blong Hae God bambae i stap kamtru, we kantri ya i mas finis, i kam draeples, mo bambae i no moa gat man i save stap long hem bakegen samtaem.
30Ol strong man blong faet blong ol man Babilonia bambae oli no moa strong, oli kam olsem woman nomo, we oli no moa save faet. Bambae olgeta oli fraet, oli stap haed nomo long ol strong ples blong haed blong olgeta. Faea bambae i bonem ol haos blong olgeta, mo ol doa* blong stonwol blong taon blong olgeta bambae oli brobrok evriwan.
31Ol man blong karem tok bambae oli stap resis i go, we wan i pasem nius i go long narawan, narawan i pasem i go long narawan, blong talemaot long king we ol enemi oli brekem ol stonwol blong taon ya long evri saed, mo oli kam insaed finis.
32Ol enemi bambae oli blokem ol rod ya we oli krosem ol reva, mo bambae oli bonem olgeta strong ples blong haed, nao ol soldia blong ol man Babilonia bambae oli fraet we oli lusum hed.
33Mo long smoltaem nomo, bambae ol enemi oli flatemgud olgeta, bambae oli purumpurumbut long olgeta, olsem we buluk i stap purumpurumbut long wit* long ples blong klinim wit. Mi mi Hae God we mi gat olgeta paoa, mo mi God blong ol laen blong Isrel,* mo hemia tok blong mi.”
Hae God bambae i givhan long ol laen blong Isrel34Nao ol man Jerusalem* oli krae long Hae God, oli talem se,
“Hae God.
King Nebukadnesa blong Babilonia
i spolemgud mifala
olsem we i katkatem taon blong mifala
long ol smosmol pis,
nao i kakae.
Hem i mekem we ples ya blong mifala
i no moa gat man nating i stap long hem,
i olsem wan botel
we i no moa gat wota long hem,
i emti nomo i stap.
Hem i mekem
olsem we i solemdaon mifala wantaem,
olsem we bigfala snek
i stap solemdaon kakae blong hem.
Hem i karemaot ol gudgudfala samting blong mifala
we hem i wantem,
mo ol samting we hem i no laekem,
hem i sakem olgeta i go.
35Plis yu panisim olgeta
from ol trabol ya
we mifala i stap kasem.
Blad blong mifala
i stap long han blong olgeta,
plis yu panisim olgeta from.”
36Nao Profet Jeremaea i talemaot we Hae God i talem se, “Ol man Jerusalem. Mi bambae mi stretem trabol ya blong yufala. Bambae mi panisim ol enemi ya blong yufala, from ol samting ya we oli bin mekem long yufala. Olgeta wota blong Babilonia wetem ol bigfala reva blong hem, bambae mi mekem olgeta oli drae evriwan.
37Taon ya Babilon bambae i kam nogud, i kam hip blong ol ston nomo, mo i kam ples blong ol wael dog, mo neva bambae man i save stap long hem bakegen samtaem. Mo olgeta man we oli luk, bambae oli seksek tumas from, mo oli lukluk rabis long hem.
38Ol man Babilonia bambae oli stap singaot bigwan olsem laeon we i hanggri, mo bambae oli kros, oli mekem noes olsem ol pikinini blong laeon.
39Be taem oli kros olsem, mi bambae mi mekem wan bigfala lafet blong olgeta. Bambae mi mekem olgeta oli dring gogo oli fuldrong, nao bambae oli slip olgeta, we bambae oli no moa save wekap bakegen.
40Bambae mi tekem olgeta i go blong kilim olgeta i ded, olsem we man i kilim anamol blong i kakae. Mi mi Hae God, mo hemia tok blong mi.”
Panis blong Babilon41Mo bakegen, Profet Jeremaea i talemaot we Hae God i talem se, “Ol laen* blong Isrel.* Bigfala taon ya Babilon we oltaem ol man oli stap leftemap hem, bambae ol enemi oli winim hem. Taon ya bambae i kam nogud olgeta, we ol man blong ol narafala kantri bambae oli fraet tumas blong luk.
42Bigfala solwota bambae i kavremap hem, mo bigsi bambae i stap brok antap long hem, i kavremap hem olgeta.
43Ol taon raonabaot long hem bambae oli kam nogud olgeta, we ol man bambae oli no wantem luk olgeta nating. Bambae oli kam olsem draeples we i no gat wota long hem nating, mo we i no gat man i stap long hem. Bambae i no moa gat man i save pas long ol ples ya bakegen samtaem.
44-45Mi bambae mi panisim god ya Bel we i god blong olgeta. Bambae mi tekemaot olgeta samting we hem i bin stilim long ol narafala kantri, mo ol man blong ol kantri ya bambae oli no moa save kam mekem wosip long hem bakegen.
“Ol man blong mi. !Mi mi kros tumas long taon ya! Ol stonwol blong hem bambae oli folfoldaon. Mo long taem ya, bambae yufala i mas kamaot long ples ya, yufala i mas ronwe kwiktaem, blong sevem laef blong yufala.
46Bambae yufala i no letem ol tok we yufala i stap harem, i mekem yufala i fraet, we tingting blong yufala i foldaon. Evri yia, i gat ol naranarafala toktok i stap goraon we yufala i stap harem. Ol man oli stap tokbaot faet we wan kantri i stap faet agens long narafala kantri, mo wan king i girap i agens long narafala king.
47Be i gat taem i stap kam, we mi bambae mi spolem ol aedol blong ol man Babilonia. Mo taem ol man blong kantri ya oli luk samting ya, bambae oli sem we i sem, mo olgeta evriwan bambae oli ded long faet.
48Rev 18.20Taem ol man blong not oli kam winim kantri ya, olgeta samting long wol ya, wetem ol samting long skae, bambae oli glad, oli singsingaot, from we Babilonia i lus.
49Rev 18.24Naoia, ol man Babilonia oli stap kilim ol man olbaot long wol ya oli ded, be hem tu bambae i mas foldaon, from we hem i kilim plante long yufala oli ded. Mi mi Hae God, mo hemia tok blong mi.”
Hae God i givim tok blong hem long ol man blong hem we oli stap long Babilonia50Nao Profet Jeremaea i talemaot we Hae God i talem se, “!Ol laen* blong Isrel* long Babilonia! Mi mi Hae God, mi God blong yufala. Bifo, ol man Babilonia oli bin tekemaot yufala long kantri blong yufala, blong yufala i no ded, be i gat taem i stap kam we bambae yufala i mas aot long kantri ya bakegen. Mo long taem ya, bambae yufala i no mas wet, yufala i mas ronwe. Nating we ples blong yufala i stap longwe tumas, be bambae yufala i mas tingbaot mi, mo bambae yufala i mas tingbaot Jerusalem* tu.
51Bambae yufala i talem se, ‘Olgeta ya oli bin tok nogud long mifala, mo oli mekem mifala i sem tumas. Mifala i no save mekem wan samting, from we ol man blong ol narafala kantri oli go insaed long ol tabu ples long haos blong yu finis.’
52Be mi mi talem stret long yufala, se i gat taem i stap kam, we mi bambae mi spolem ol aedol ya blong ol man Babilonia, mo olbaot long kantri ya, ol man bambae oli karekil, mo bambae oli harem nogud tumas, oli stap krae.
53Mo nating sipos ol man ya oli save go antap long skae, oli wokem wan strong ples blong haed blong olgeta long ples ya, be mi bambae mi sanem ol man oli go long ples ya blong flatemgud olgeta. Mi mi Hae God, mo hemia tok blong mi.”
Ol trabol we bambae i kasem Babilonia54Mo Profet Jeremaea i gohed, i talemaot we Hae God i talem se,
“Ol laen* blong Isrel.*
Bambae yufala i harem
we ol man long taon ya Babilon oli stap krae,
from we ol enemi bambae oli spolemgud
kantri blong olgeta.
55Bambae mi mi flatemgud taon ya,
mo bambae mi mekem ol man blong hem
oli stap kwaet,
bambae man i no moa save harem olgeta.
Long taem ya,
bambae bigfala kampani blong ol soldia
i kam wantaem,
olsem we bigfala solwota
i kavremap olgeta.
Ol soldia ya bambae oli kam faet agens long taon ya,
we bambae oli stap singsingaot bigwan.
56Bambae oli flatemgud taon ya,
mo bambae oli holem ol soldia blong hem,
mo oli brebrekem ol bonara blong olgeta.
Mi mi Hae God,
mo mi mi God we mi save givim panis
long man we i mekem nogud,
mo bambae mi givimbak long taon ya,
fasin ya we hem i stap mekem.
57Bambae mi panisim ol haeman blong hem,
we hemia ol lida blong hem,
mo ol waesman blong hem,
mo ol komanda blong hem,
mo ol soldia blong hem.
Bambae mi mekem olgeta ya evriwan
oli dring gogo oli fuldrong,
nao bambae oli slip,
we neva bambae oli girap bakegen.
Mi mi King,
mo nem blong mi,
Hae God we i Gat Olgeta Paoa,
mo hemia tok blong mi.
58Bigfala stonwol blong taon ya,
bambae mi flatemgud i go long graon,
mo ol bigbigfala doa blong hem,
faea bambae i bonem olgeta.
Ol bigbigfala wok
we ol man blong ol narafala kantri
oli stap mekem long ples ya,
i blong nating nomo,
from we faea bambae i bonem olgeta evriwan.
Mi mi Hae God,
mi gat olgeta paoa,
mo hemia tok blong mi.”
Profet Jeremaea i sanem ol tok ya blong Hae God i go long Babilonia59-60Nao Profet Jeremaea i tekem wan buk,* i raetemdaon olgeta trabol we bambae i kasem Babilonia, wetem olgeta tok we Hae God i talemaot agens long kantri ya.
Nao i gat wan haeman blong ol soldia blong King Jedekia, nem blong hem Seraea, we papa blong hem Neria, mo bubu blong hem Mahasea. Mo long namba fo yia we King Jedekia i rul long Juda,* Seraea i mekemrere blong go long Babilonia wetem king ya. Nao profet i talem long hem se,
61“Seraea. Taem yu go kasem Babilon, mi wantem blong yu yu ridimaot olgeta tok blong buk ya i go long olgeta man.
62Mo bambae yu prea, yu talem se, ‘Hae God. Yu yu talem se bambae yu spolem ples ya, blong i no moa gat man mo anamol i stap long hem samtaem. Ples ya bambae i kam nogud, mo i stap olsem nomo gogo i no save finis.’
63Rev 18.21Seraea, taem yu ridim buk ya finis, bambae yu fasem wan ston long hem, nao yu go sakem long Yufretes Reva,
64mo yu talemaot we Hae God i talem se, ‘Babilonia bambae i draon olsem buk ya. Bambae i draon we neva bambae i girap bakegen samtaem, from bigfala trabol ya we mi bambae mi letem i kam kasem hem.”
Nao ol tok blong Profet Jeremaea i finis long ples ya.
Who We AreWhat We EelieveWhat We Do
2025 by iamachristian.org,Inc All rights reserved.
