Dutronome 13 - Bislama Bible Revised 2012

1-2“Samtaem maet i gat wan profet blong narafala god, no wan kleva we i save talemaot mining blong drim i girap, we i wantem pulum tingting blong yufala i go long ol god ya we neva yufala i mekem wosip long olgeta samtaem, blong yufala i go mekem wosip long olgeta, mo yufala i mekem ol samting we olgeta oli wantem. Nao sipos man olsem i mekem promes blong wokem wan merikel, no wan bigfala samting blong sapraes, nating we promes ya blong hem i kamtru,

3be bambae yufala i no mas tingbaot tok blong hem. Hae God i God blong yumi, mo hem i save yusum man olsem blong traem yumi, se yumi lavem hem long olgeta tingting blong yumi mo long olgeta laef blong yumi, no nogat.

4Oltaem bambae yufala i mas biaen long hem nomo, mo yufala i mas ona long hem, yufala i mas obei long hem, mo yufala i mas holem ol tok blong hem. Yufala i mas mekem wosip long hem, mo tingting blong yufala i mas strong long hem oltaem.

5Fastaem yumi stap wok slef* long Ijip, be Hae God i tekemaot yumi, i sevem yumi, mo sipos wan profet no wan kleva olsem i wantem pulum tingting blong yufala, blong yufala i agens long Hae God, bambae yufala i mas kilim hem i ded. Man olsem i man nogud, mo hem i stap traem blong pulum yufala i gowe long rod ya we Hae God i talem finis, se yufala i mas folem. Man olsem, yufala i mas kilim hem i ded blong tekemaot fasin nogud ya, i no moa stap long yufala.

6-8“Nating we stret brata blong yu, no pikinini blong yu, no dota blong yu, no woman blong yu we yu lavem hem tumas, no wan gudfala fren blong yu, be sipos hem i kam tok rere long yu long fasin blong haed, i talem se, ‘!Yu kam! Yumi go mekem wosip long god blong olgeta ya,’ be bambae yu no mas letem hem i pulum yu. !Bambae yu no lesin long hem nating! Maet hem i wantem blong yutufala i go mekem wosip long ol god blong ol man we oli stap klosap long yu, no long ol god blong ol man we oli stap longwe long yu, we yumi wetem ol bubu blong yumi, neva yumi mekem wosip long olgeta, be yu no mas go. Mo i nogud yu sore long man olsem, mo i nogud yu haedem hem blong panis i no kasem hem.

9Yu mas kilim hem i ded, we yu no gat sore long hem nating. Yu nao yu mas faswan blong stonem hem, mo biaen yu save letem ol narafala man tu oli stonem hem, gogo i ded.

10Fastaem, yumi stap wok slef long Ijip, be Hae God i tekemaot yumi, i sevem yumi, mo yu mas stonem man olsem i ded, from we hem i traem blong tekemaot yu, yu gowe long God blong yumi.

11Nao sipos yu mekem olsem, olgeta laen* blong yu bambae oli harem nius blong samting ya, mo bambae oli fraet, nao bambae i no moa gat man i save mekem rabis fasin ya long ples blong yufala bakegen.

12“Hae God i God blong yumi, mo taem yufala i stap long ol taon ya we hem bambae i givim long yufala, samtaem maet yufala i harem wan toktok,

13se sam rabis man blong yufala long wan narafala taon oli bin lidim ol man blong taon ya oli go mekem wosip long ol narafala god ya we neva oli mekem wosip long olgeta samtaem.

14Fasin olsem i nogud we i nogud, mo sipos yufala i harem wan toktok olsem, bambae yufala i mas faenemaotgud se toktok ya i tru, no i no tru, mo sipos i tru,

15bambae yufala i mas kilim olgeta man blong taon ya oli ded, mo yufala i mas kilim olgeta anamol blong olgeta tu. Bambae yufala i mas spolem taon ya we yufala i spolemgud.

16Olting blong ol man ya, yufala i mas tekem olgeta evriwan i kam wanples, yufala i mas hivimap long medel blong taon ya blong olgeta. Nao yufala i mas bonem taon ya, wetem olgeta samting ya we i stap long hem, blong givim i go long Hae God olsem sakrefaes ya we yumi bonem i bon evriwan. Nao taon ya bambae i stap olsem nomo oltaem, bambae i tabu blong yufala i go wokem bakegen.

17-18Olgeta samting blong taon olsem i blong spolem nomo, mo bambae yufala i no mas holem se i blong yufala. Sipos yufala i folem ol tok ya, Hae God bambae i no moa save kros long yufala, hem bambae i gat sore long yufala. Sipos yufala i obei long ol loa ya blong hem we mi mi stap givim long yufala tede, mo yufala i mekem ol samting we hem i wantem, bambae hem i gat sore long yufala, mo bambae hem i mekem we yufala i kam plante, olsem we hem i promes* finis long ol bubu blong yumi bifo.