Dutronome 23 - Bislama Bible Revised 2012

Ol man we oli no man blong Hae God

1Nao Moses i talem se, “Olgeta. Yumi ya, yumi ol man blong Hae God, mo man we oli mekem natamap* long hem, mo man we oli katemaot samting blong hem, bambae yumi no mas kaontem hem wetem yumi.

2“Mo man we i pikinini blong rod, wetem ol pikinini blong hem mo olgeta we bambae oli kamaot biaen long hem, bambae yumi no mas kaontem olgeta wetem yumi. Nating we bambae oli stap wetem yumi go bitim tri handred yia, be bambae yumi no mas kaontem olgeta wetem yumi.

3 Neh 13.1,2 “Mo man we i man Amon, mo man we i man Moab, wetem ol pikinini blong olgeta mo olgeta we bambae oli kamaot biaen long olgeta, bambae yumi no mas kaontem olgeta wetem yumi. Nating we bambae oli stap wetem yumi go bitim tri handred yia, be bambae yumi no mas kaontem olgeta wetem yumi samtaem.

4Nam 22.1-6Bifo, biaen long taem we yumi aot long Ijip, yumi pastru long kantri ya Amon, mo ol man Amon oli no glad blong givim kakae mo wota long yumi. Mo taem yumi kam long kantri ya Moab, ol man Moab oli girap, oli sanem sam man i go long Mesopotemia, long ples ya Petoro, blong pem Balam, we papa blong hem Beo, blong i kam singaot* trabol i kam long yumi.

5Nam 23.7—24.9Be Hae God i God blong yumi, mo hem i no wantem harem tok ya blong Balam, nao i mekem we Balam i no moa singaot trabol i kam long yumi, hem i blesem yumi. Hae God i mekem olsem from we hem i lavem yumi.

6Bambae yufala i no mas givhan long olgeta samtaem. Nating we bambae yufala i stap plante handred yia long ples ya, be yufala i no mas mekem wan samting nating blong mekem olgeta oli kam rijman.

7“Be bambae yufala i no mas lukluk nogud long ol man Edom, from we bifo olgeta, yufala i wan famle nomo, mo yufala i no mas lukluk nogud long ol man Ijip, from we bifo, yufala i stap long kantri blong olgeta.

8Yumi ya, yumi ol man blong Hae God, mo sipos wan man blong wan long tufala kantri ya i kam stap wetem yufala, bambae yufala no mas kaontem hem wetem ol pikinini blong hem mo ol smol bubu blong hem, se oli wan long yufala. Be ol pikinini blong ol smol bubu blong hem, wetem olgeta we bambae oli kamaot biaen long olgeta, olgeta ya nao bambae yufala i save kaontem wetem yufala.”

Ol soldia blong ol laen blong Isrel, oltaem oli mas klin long fes blong Hae God

9Nao Moses i talem se, “Sipos yufala i go stap long wan ples blong mekem faet, yufala i mas lukaot gud blong bambae i no gat wan samting i spolem yufala, i mekem we yufala i no klin long fes blong Hae God.

10Sipos wan man i kam we i no klin, from we long naet, hem i drim nogud, nao long moning, hem i luk we bed blong hem i wetwet, man ya i mas go stap afsaed long ples ya we yufala i stap long hem, mo i mas stap afsaed olsem go kasem wan ful dei.

11Long sapa, bambae hem i mas swim, nao taem san i draon, hem i save kambak long ples blong yufala bakegen.

12“Oltaem, bambae yufala i mas makemaot wan ples afsaed long ples ya we yufala i stap long hem, blong ol man oli save gobus long hem.

13Mo oltaem, yufala i mas karem stik, yufala i mas wokbaot wetem, nao taem yufala i harem we yufala i wantem gobus, bambae yufala i save yusum stik ya blong digim hol, mo blong berem bakegen.

14Hae God i God blong yumi, mo oltaem, yufala i mas mekem we ples blong yufala i klin long fes blong hem, from we hem bambae i stap oltaem wetem yufala, hem bambae i stap blokem yufala, mo hem bambae i mekem we yufala i save winim ol enemi blong yufala. Nao from samting ya, i nogud yufala i mekem wan samting we i no stret, we bambae i mekem hem i tanem baksaed long yufala.”

Ol narafala loa

15Nao Moses i talem se, “Sipos wan slef* i ronwe long masta blong hem long narafala kantri, nao i kam long wan long yufala blong haed, bambae yufala i no mas sanem hem i gobak.

16Hem bambae i save jusumaot wan taon blong yufala, nao bambae i save go stap long hem, mo sipos hem i stap wetem yufala, bambae yufala i no mas mekem i strong long hem.

17 Lev 19.29 “Yufala i laen* blong Isrel,* mo rabis fasin ya we ol narafala man oli stap mekem, we long ples blong wosip blong olgeta, i gat ol man pris* mo ol woman pris we ol man oli save go slip wetem olgeta, fasin ya bambae yufala i no mas mekem. I tabu blong yufala i kam pris olsem,

18mo i tabu blong man i tekem mane we i winim long fasin ya i kam long haos blong Hae God, blong givim long Hae God blong fulumap promes we i mekem long hem. Rabis fasin blong ol pris olsem, Hae God i no laekem nating, i agens long hem.

19 Eks 22.25; Lev 25.36,37; Dut 15.7-11 “Sipos wan laen blong yumi i wantem kaon long yufala long mane no kakae no narafala samting we i wantem yusum fastaem, be taem hem i tekem, bambae yufala i no mas talem long hem se i mas jenisim antap long hemia we i tekem fastaem.

20Sipos wan strenja i askem samting olsem, bambae yufala i save talem long hem se i mas jenisim antap, be man we i laen blong yumi, bambae yufala i no save mekem hem olsem. Hae God i God blong yumi, mo sipos yufala i obei long loa ya, hem bambae i blesem yufala long olgeta samting we bambae yufala i mekem long kantri ya we bambae yufala i go long hem.

21 Nam 30.1-16; Mat 5.33 “Hae God i God blong yumi, mo sipos yufala i mekem promes long hem, bambae yufala i no mas tektaem blong mekem ol samting ya we yufala i promes blong mekem. Hae God bambae i no save fogetem ol promes blong yufala, mo sipos yufala i letem promes blong yufala i foldaon, hemia i sin ya.

22Sipos yufala i no tingbaot blong mekem promes long Hae God, hemia yufala i no mekem sin, i oraet nomo.

23Be sipos yufala i girap, yufala i mekem promes olsem long tingting blong yufala nomo, be yufala i mas holem promes ya we yufala i mekem long hem.

24“Sipos samtaem yufala i stap wokbaot, nao yufala i gotru long plantesen blong rop ya grep* blong wan laen blong yumi, bambae yufala i save tekem sam frut blong hem, yufala i save kakae olsem we yufala i wantem, be i tabu blong yufala i fulumap long basket blong yufala.

25Mo sipos yufala i gotru long garen* wit* blong wan long yufala, bambae yufala i save tekemaot sam kakae blong hem, yufala i save kakae, be bambae yufala i mas tekemaot long han nomo, i tabu blong yufala i katemaot plante hed blong hem.”