1 Timoti Sotfala stori blong buk ya - Bislama Bible Revised 2012
Sotfala stori blong buk yaTimoti, hem wan yangfala Kristin we hem i blong taon ya Listra. Mama blong hem i wan laen* blong Isrel* mo papa blong hem i man Gris. Timoti i wan fren blong Pol we i stap go wetem hem long olgeta ples we hem i go long hem blong talemaot gud nius blong Masta* blong yumi Jisas Kraes. Pol i raetem leta ya long taem we hem i go stap long provins ya Masedonia, mo Timoti i stap long Efesas.Pol i raetem leta ya long Timoti i talem long hem blong i lukaot long ol giaman tijing we i save kam insaed long jos. Giaman tijing ya i kamaot long wan kaen tingting we i talem se evri samting long wol ya i rabis olgeta. Ol man we oli tijim ol man long ol giaman toktok ya, oli talem se man i save kasem laef long fasin ya nomo, we hem i lanem ol mining blong ol tokhaed blong olgeta, mo i lego samfala kakae mo i kakae samfala kakae nomo we i stret blong kakae, mo bambae hem i no mared, mo sam narafala samting olsem bakegen.Mo long leta ya Pol i tokbaot ol gudfala fasin we ol Kristin man oli save folem blong mekem wosip, mo blong lukaot long jos. Mo hem i talem ol gudfala fasin we ol lida blong jos mo ol narafala Kristin man oli mas folem. Mo las samting we Pol i talem, hem i talem long Timoti se hem i mas kam wan gudfala man blong wok blong Jisas Kraes. Hem i talem long hem fasin we hem i mas gat long ol defren kaen grup blong ol Kristin man we hem i stap tijim olgeta.Ol stori blong buk yaFastok 1.1-2Tijing long saed blong jos mo ol lida blong hem 1.3—3.16Ol toktok blong givhan long Timoti long wok blong hem 4.1—6.21
