1 King Sotfala stori blong buk ya - Bislama Bible Revised 2012

Sotfala stori blong buk yaBuk ya, FAS BUK BLONG OL STORI BLONG OL KING BLONG ISREL, we sotfala nem blong hem FAS KING, hem i gohed long ol stori blong laef blong ol king blong Isrel,* we oli stat long tufala buk ya blong ol stori blong Profet Samuel. Yumi save seraot buk ya long tri haf.1. Long fas haf, ol laen* blong Isrel oli putumap Solomon i kam king blong olgeta, mo papa blong hem, King Deved i ded.2. Long seken haf, i gat ol stori blong wok blong King Solomon, mo blong ol bigfala samting we hem i mekem. Bigwan long ol samting ya, hemia haos ya blong Hae God we hem i wokem long Jerusalem.*3. Long namba tri haf blong buk ya, ol laen blong Isrel oli seraot long tu haf, nao haf blong olgeta we oli holem nem ya se ol man Isrel, oli stap long not, mo haf blong olgeta we oli holem nem ya se ol man Juda,* oli stap long saot. Nao long las haf ya, i gat ol stori blong ol king we oli rul long olgeta, kam kasem taem we i gat samwe long eit handred fifti yia i stap yet blong kasem taem we Kraes* i bon.Long tufala buk ya Fas King mo Seken King, yumi save luk fasin blong ol king ya we oli rul long Isrel mo long Juda. Taem ol man oli putumap wan king blong i rul, we hem i putum tingting blong hem i stap strong long Hae God, ol man blong hem oli stap gud, mo wok blong hem i gohed gud. Kantri blong hem i gohed gud, from we hem i obei long Hae God mo i trastem hem. Be taem wan king i no obei long Hae God, mo i stap mekem wosip long ol aedol, oltaem bigfala trabol i stap kam long hem. Man we i raetem buk ya i soemaot we i no gat wan king blong Isrel, long not, we i stap folem Hae God. Nao from we oli no folem Hae God, kantri blong olgeta i no stap gohed gud. Mo hem i soemaot tu we long Juda, long saot, sam king oli stap folem Hae God, nao kantri blong olgeta i gohed gud, be sam oli no folem Hae God, nao kantri blong olgeta i no gohed gud nating.Long buk ya Fas King, i gat ol stori tu blong ol profet blong Hae God. Olgeta ya oli no fraet nating long ol man, oli stap talemaot tok blong Hae God long olgeta, blong olgeta oli no mekem wosip long ol aedol, oli stap mekem wosip long hem, mo oli stap obei long hem nomo. Long ol profet ya, i gat wan man we nem blong hem Profet Elaeja, we yumi savegud ol stori blong hem. Hemia profet ya we i agensem ol pris blong god ya Bal.* Yumi save luk stori blong hem long buk ya, long japta 18, i stat long vas 1.Ol stori we i stap long buk yaKing Deved i ded 1.1—2.12

Solomon i kam king 2.13-46

King Solomon i rul 3.1—11.43

Ol samting we hem i mekem long fas haf blong rul blong hem 3.1—4.34

Hem i bildim haos blong Hae God 5.1—8.66

Ol samting we hem i mekem long las haf blong rul blong hem 9.1—11.43

Ol laen blong Isrel oli seraot long tu haf 12.1—22.53

Ol laen blong Isrel long not oli no wantem King Rehoboam, nao oli putumap Jeroboam i king blong olgeta 12.1—14.20

Ol king blong Juda, long saot, mo ol king blong Isrel, long not 14.21—16.34

Profet Elaeja 17.1—19.21

King Ehab blong Isrel 20.1—22.40

King Jehosafat blong Juda mo King Ahasia blong Isrel 22.41-53