Ol Proveb 18 - Bislama Bible Revised 2012

1Man we i no save wok gud wetem ol narafala man, oltaem hem i stap tingbaot ol bisnes blong hem nomo. Hem i no save agri long ol gudfala tok we ol narafala man oli givim long hem.

2Man we i no gat hed, hem i no wantem lan, hem i wantem nomo blong ol man oli harem tingting blong hem.

3Sin, fren blong hem, sem. Mo sipos yu lego stret fasin, bambae ol man oli tok nogud long yu, mo oli jikim yu.

4Tok blong man i fres olsem reva we i ron strong, mo i dip olsem solwota. Hem i ples blong kasem waestok.

5Long kot, i no stret we jaj i saed wetem man we i brekem loa, mo i nogud tu blong i blokem man we i mekem i stret, blong i no kasem ol samting we hem i gat raet blong kasem.

6Taem man we i no gat hed i toktok tumas, hem i stap statem rao, mo taem i tok bigwan, i olsem we hem i stap singaot nomo long ol man blong oli kam wipim hem.

7Man we i no gat hed, toktok blong hem i stap spolem hem nomo. Ol toktok blong hem i olsem trap blong kasem hem bakegen.

8Fasin ya we man i go talem ol tok olbaot we i spolem nem blong narafala man, hem i olsem wan samting we i swit we i swit, we man i wantem tumas blong solemdaon.

9Lesman, brata blong hem, man blong spolem evri samting.

10Hae God i olsem wan strong wajhaos,* we ol stret man oli stap go haed long hem.

11Be ol rijman oli stap ting se olting blong olgeta i save blokem olgeta oli stap gud, olsem we bigfala stonwol we i goraon long taon i blokemgud hem.

12Man i mas mekem tingting blong hem i stap daon, blong ol man oli save ona long hem. Man we i stap flas oltaem, hem i stap finis long rod blong lus.

13Yu mas lesin long tok blong ol man fastaem, nao biaen bambae yu save givim ansa long olgeta. Sipos no, fasin ya i soemaot we yu yu no gat hed, mo bambae yu sem bigwan from.

14Sipos yu sik bigwan, be yu wantem tumas blong yu laef, tingting ya blong yu bambae i save holem yu yu no ded, be sipos tingting ya i lus, bambae yu ded kwiktaem nomo.

15Ol man we oli gat gud hed, oltaem nomo oli wantem tumas blong lan, mo oli rere oltaem blong kasem save.

16Sipos yu wantem go luk wan bigman, i gud yu tekem wan presen blong givim long hem, nao bambae i isi nomo blong toktok wetem hem.

17Oltaem, taem ol man oli harem fas man we i tok insaed long kot, oli ting se hem i stret nomo, be taem man we i stap tok agens long hem i stat askem kwestin long hem, olgeta oli stap tingting bakegen nao.

18Sipos tu strong man i pas long kot nao tufala i stap toktok agens long tufala, i gud jaj i yusum ol spesel ston, blong Hae God i soemaot hu long tufala ya i rong.

19Sipos yu stap rao long brata blong yu, mo yu mekem hem i harem nogud, bambae hem i tanem baksaed long yu, olsem we hem i lokem doa blong haos blong hem, nao yu no moa save go insaed.

20Ol tok we yu stap talem, i gat frut blong hem we bambae yu yu mas kasem.

21Sipos ol tok ya i blong sevem laef, bambae yu save glad long frut blong hem, be sipos i blong spolem laef, bambae yu mas rere blong kakae frut blong hem.

22Sipos yu faenem wan woman we yu save mared long hem, hemia yu faenem wan gudfala samting ya. Hemia i soemaot we Hae God i glad long yu.

23Oltaem, taem puaman i wantem askem wan samting long rijman, hem i stap toktok gud long hem, be taem rijman i givim ansa long hem, hem i stap tok raf long hem nomo.

24Sam man oli save fren long yu blong smoltaem nomo, be samfala oli save mekem i gud moa long yu, i winim ol brata blong yu.