Nehemaea 12 - Bislama Bible Revised 2012

Ol pris mo ol Livaet we oli aot long Babilonia oli kambak

1Nao taem Serubabel we papa blong hem Sealtiel, wetem Hae Pris* ya Josua, tufala i lidim ol man oli aot long Babilonia, oli kambak long ples blong olgeta, i gat ol pris* mo ol Livaet* oli biaen long tufala. Nem blong ol pris ya i gat Seraea, mo Jeremaea, mo Esra,

2mo Amaria, mo Maluk, mo Hatus,

3mo Sekania, mo Rehum, mo Meremot,

4mo Ido, mo Ginetoe, mo Abia,

5mo Miamin, mo Mahadia, mo Bilgaha,

6mo Semaea, mo Joearib, mo Jedaea,

7mo Salu, mo Amok, mo Hilkia, mo Jedaea.

Olgeta ya oli lida blong ol pris long taem blong Hae Pris ya Josua.

8Mo ol Livaet, i gat olgeta we oli lida blong ol man blong singsing blong talem tangkiu long God. Olgeta ya i gat Jesua, mo Binui, mo Kadmiel, mo Serebia, mo Juda, mo Matania.

9Mo i gat olgeta we oli mekem kwaea blong singim ol ansa blong ol singsing ya. Olgeta ya i gat Bakbukia, mo Uno, wetem ol narafala Livaet tu.

Ol Hae Pris we oli kamaot biaen long Hae Pris ya Josua

10Hae Pris* ya Josua, hem i papa blong Joeakim, mo Joeakim, hem i papa blong Eliasib, mo Eliasib, hem i papa blong Joeada,

11mo Joeada, hem i papa blong Jonatan, mo Jonatan, hem i papa blong Jadua.

Ol lida blong ol famle blong ol pris

12Nao long taem blong Hae Pris* ya Joeakim, ol pris* we oli lida blong ol pris, nem blong olgeta i olsem. Pris ya Meraea, hem i lida blong olgeta long laen* blong pris ya Seraea. Mo pris ya Hanania, hem i lida blong olgeta long laen blong pris ya Jeremaea.

13Mo pris ya Mesulam, hem i lida blong olgeta long laen blong pris ya Esra. Mo pris ya Jehohanan, hem i lida blong olgeta long laen blong pris ya Amaria.

14Mo pris ya Jonatan, hem i lida blong olgeta long laen blong pris ya Maluki. Mo pris ya Josef, hem i lida blong olgeta long laen blong pris ya Sebania.

15Mo pris ya Adnaha, hem i lida blong olgeta long laen blong pris ya Harim. Mo pris ya Helkae, hem i lida blong olgeta long laen blong pris ya Meraeot.

16Mo pris ya Sekaraea, hem i lida blong olgeta long laen blong pris ya Ido. Mo pris ya Mesulam, hem i lida blong olgeta long laen blong pris ya Gineton.

17Mo pris ya Sikri, hem i lida blong olgeta long laen blong pris ya Abia. Mo pris ya…, hem i lida blong olgeta long laen blong pris ya Miniamin. Mo pris ya Piltae, hem i lida blong olgeta long laen blong pris ya Moadia.

18Mo pris ya Samua, hem i lida blong olgeta long laen blong pris ya Bilgaha. Mo pris ya Jehonatan, hem i lida blong olgeta long laen blong pris ya Semaea.

19Mo pris ya Matenae, hem i lida blong olgeta long laen blong pris ya Joearib. Mo pris ya Usi, hem i lida blong olgeta long laen blong pris ya Jedaea.

20Mo pris ya Kalae, hem i lida blong olgeta long laen blong pris ya Salae. Mo pris ya Eba, hem i lida blong olgeta long laen blong pris ya Amok.

21Mo pris ya Hasabia, hem i lida blong olgeta long laen blong pris ya Hilkia. Mo pris ya Netanel, hem i lida blong olgeta long laen blong pris ya Jedaea.

Oli raetemdaon nem blong ol lida blong ol famle blong ol pris wetem ol lida blong ol famle blong ol Livaet

22Nao long taem blong Hae Pris* ya Eliasib, mo long taem blong Hae Pris ya Joeada, mo long taem blong Hae Pris ya Jonatan, mo long taem blong Hae Pris ya Jadua, ol man oli stap raetemdaon nem blong ol lida blong ol famle blong ol pris*, wetem nem blong ol lida blong ol famle blong ol Livaet* i stap long wan buk. Oli stap mekem olsem, gogo kasem taem ya we King Darias i stap rul long Pesia, nao long taem ya, oli no moa mekem.

23Be ol lida blong ol famle blong ol Livaet, olgeta oli stap raetemdaon nem blong olgeta olsem kam kasem long taem blong Hae Pris ya Jonatan nomo, we bubu blong hem Hae Pris ya Eliasib.

Ol wok we ol Livaet oli stap mekem long haos blong God

24Mo long taem ya, ol lida blong ol Livaet* we nem blong olgeta Hasabia, mo Serebia, mo Jesua, mo Binui, mo Kadmiel, olgeta oli mekem ol grup blong ol man blong olgeta blong oli singsing. Olgeta oli sing blong presem God mo blong talem tangkiu long hem, we sam oli sing fastaem, mo sam oli sing biaen blong ansa long olgeta, olsem we King Deved, man ya blong wok blong God bifo i bin tijim ol man long hem.

25Long taem ya, ol storum blong haos* blong God oli stap klosap nomo long doa blong yad blong haos ya. Mo nem blong ol gad we oli stap lukaot long ol storum ya i olsem. I gat Matania, mo Bakbukia, mo Obadaea, mo Mesulam, mo Talmon, mo Akub.

26Ol man ya oli stap wok long taem blong Hae Pris* ya Joeakim, mo distrikejen* ya Nehemaea, mo pris* ya Esra we i stap stadigud long Loa* blong God.Nehemaea olgeta oli prea blong mekem bigfala stonwol ya i tabu, i blong God

27Nao Nehemaea i talem se, “Taem mifala i rere blong mekem prea blong mekem bigfala stonwol blong taon ya Jerusalem* i tabu, i blong God, mi mi singaot ol Livaet* we oli stap wanwan olbaot long ol ples blong olgeta, blong oli kam blong mekem wok blong olgeta long taem ya. Mo taem oli kam, oli karem ol simbol*, mo ol gita mo ol mandolin blong olgeta, blong oli singsing blong talem tangkiu long God.

28Olgeta ya oli aot long ol vilej blong olgeta we oli wokem klosap long Jerusalem, mo long ol vilej klosap long Netofa,

29mo long Betgilgal, mo long ol ples klosap long Geba, mo klosap long Asmavet, mo oli kam wanples long taon.

30Nao ol pris* mo ol Livaet oli mekem spesel prea blong mekem olgeta oli klin long fes blong God, mo blong mekem ol man blong taon ya mo bigfala stonwol ya wetem ol doa* blong hem tu oli klin long fes blong hem.

31“Nao mi singaot ol lida blong distrik ya oli kam wanples antap long stonwol ya, mo mi putum olgeta oli lukaot long tu bigfala grup blong ol man blong mekem kwaea, we bambae tufala i wokbaot i goraon long taon ya. Nao olgeta ya oli wokbaot, oli stap singsing blong talem tangkiu long God.

“Fas grup i pas long raet saed, i wokbaot antap long stonwol ya, i go long doa ya we nem blong hem “Doa blong Doti”.

32Mo Hosaea i biaen long olgeta, mo haf blong ol lida ya oli biaen long hem.

33-35Mo biaen long olgeta ya, i gat ol pris we oli stap blu long ol trampet, oli wokbaot i go. Olgeta ya, i gat Asaria, mo Esra, mo Mesulam, mo Juda, mo Benjamin, mo Semaea, mo Jeremaea. Mo biaen long olgeta ya, Sekaraea i wokbaot i go. Man ya, papa blong hem Jonatan mo bubu blong hem Semaea, mo ol olfala bubu blong hem bifo, i gat Matania, mo Mikaea, mo Sakuru, mo Asaf.

36Mo i gat ol laen* blong hem oli biaen long hem, we nem blong olgeta, Semaea, mo Asarel, mo Milalae, mo Gilalae, mo Mahae, mo Netanel, mo Juda, mo Hanani. Olgeta ya oli karem ol instramen blong singsing, olsem we King Deved, man blong God bifo i stap yusum, mo pris ya Esra, we i stap stadi gud long Loa* blong God, hem i lidim olgeta oli go.

37Taem oli kasem doa ya we nem blong hem “Doa blong Springwota”, oli aot long stonwol ya, oli klaem long ol step we i go antap long haf ya blong Jerusalem we nem blong hem “Taon* blong King Deved”, mo oli pas raon long olfala haos blong King Deved ya bifo. Nao oli wokbaot go kasem doa ya we nem blong hem “Doa blong Wota”, long saed i go long is.

38“Seken grup blong mekem kwaea blong talem tangkiu long God, hem i pas long lef saed antap long stonwol ya, i wokbaot i go, mo mi wetem narafala haf blong ol lida ya, mifala i biaen long olgeta. Mifala i wokbaot i go bitim wajhaos* ya we nem blong hem “Wajhaos blong ol Oven”, mifala i go kasem haf blong stonwol ya we nem blong hem “Bigfala Stonwol”.

39Nao mifala i gohed, mifala i go bitim “Doa blong Efrem*”, mo “Olfala Doa”, mo “Doa blong Fis”, mo “Wajhaos blong Hananehel”, mo “Wajhaos blong Handred Man”, nao mifala i go kasem “Doa blong Sipsip”. Nao mifala i wokbaot i go finis klosap long “Doa blong Gad”, we doa ya i blong go long haos* blong God.

40“Nao tufala grup ya we tufala i stap singsing blong talem tangkiu long God, tufala i go kasem yad blong haos blong God.

“Long grup ya blong mi wetem ol lida we mifala i wokbaot wanples,

41i gat ol pris ya we oli stap blu long trampet. Olgeta ya, i gat Eliakim, mo Mahasea, mo Miniamin, mo Mikaea, mo Elioenae, mo Sekaraea, mo Hanania.

42Mo ol narafala pris we oli wokbaot biaen long olgeta ya, i gat Mahasea, mo Semaea, mo Eleasara, mo Usi, mo Jehohanan, mo Malkia, mo Elam, mo Esa. Mo ol man blong singsing we Jisrahia i lidim olgeta, oli stap singsing bigwan.

43“Long dei ya, mifala i bonem plante sakrefaes, mo mifala evriwan i glad tumas, from we God i mekem mifala i harem gud tumas. Ol woman mo ol pikinini tu oli joen long lafet* ya, mo noes we mifala evriwan i stap mekem, ol man we oli stap longwe, be oli save harem.”

Ol man oli stap givim ol presen blong olgeta i go long God

44Nao long taem ya, ol lida oli putum wan grup blong ol Livaet* blong oli lukaot long ol storum blong haos* blong God. Long ol storum ya, oli putumgud olgeta samting we ol man oli givim blong yusum long haos ya, we hemia ol taet* blong olgeta, wetem ol fas kakae blong garen* blong olgeta, mo ol fasfrut blong ol tri blong olgeta, we evri yia, oli stap givim i go long God. Ol man oli stap givim ol samting ya blong ol pris* wetem ol Livaet oli yusum, olsem we Loa* blong God i talem, mo grup ya, wok blong olgeta i blong go long ol naranarafala taon, blong karem ol samting ya i kam. Olgeta man olbaot long Juda* oli glad long ol pris mo ol Livaet,

451 Kron 25.1-8; 1 Kron 26.12from we olgeta ya oli stap mekem ol man oli klin long fes blong God, mo oli stap mekem ol narafala wok we God i bin talem bifo, se oli mas mekem. Mo ol man blong mekem kwaea long haos blong God wetem ol gad blong haos ya, olgeta ya tu oli stap mekem wok blong olgeta, we oli stap folemgud ol rul ya we King Deved bifo wetem pikinini blong hem King Solomon, tufala i putum.

46I stat bifo olgeta, long taem blong King Deved wetem man ya Asaf we i kwaeamasta blong hem, ol man blong mekem kwaea oli stap lidim ol man blong oli singsing blong presem God mo blong talem tangkiu long hem.

47Long taem blong Serubabel, mo long taem blong Nehemaea, evri dei, ol man oli stap givim ol presen long God blong givhan long ol man blong mekem kwaea wetem ol man blong gad long haos blong hem. Mo ol man oli stap givim ol spesel kakae i go long ol Livaet, we kakae ya i tabu, i blong ol laen* blong Livae* nomo, mo olgeta ya oli stap kakae haf, mo oli stap givim haf i go long ol pris, olsem we Loa blong God i talem.