1Nao Profet Hosea i talemaot we Hae God i talem long hem se, “Hosea. Yu go luk woman blong yu bakegen. Nating we hem i stap mekem i krangke wetem narafala man, be yu mas soemaotgud long hem we yu yu lavem hem. Yu mas lavem hem mo yu mas mekem i gud long hem, stret olsem we mi mi lavem yufala. Nating we ol man ples blong yu oli stap folem ol narafala god, mo oli stap tekem ol grep* we oli sandrae long hem, oli givim i go long olgeta olsem presen blong olgeta, be mi mi stap lavem yufala yet, mo oltaem mi stap mekem i gud tumas long yufala.”
2Nao profet i talem se, “Nao mi tekem seven taosen faef handred vatu* wetem wan handred fifti kilo bale,* nao mi go pemaot woman ya bakegen, i blong mi.
3Nao mi talem long hem, se hem i mas lego fasin ya blong hem, we i stap mekem i krangke wetem ol narafala man, mo i stap salem hem olbaot, mo i mas wet long mi longtaem, we i stap kwaet nomo, mo mi promes long hem, se long taem ya, mi bambae mi stap wet long hem.
4“Olgeta. Long sem fasin, bambae yumi mas stap longtaem lelebet, we bambae yumi no moa gat king blong yumi, no lida blong yumi. Mo bambae yufala i stap we yufala i no moa mekem sakrefaes long ol narafala god, mo yufala i no moa stanemap ol longlongfala ston blong mekem wosip long olgeta, mo we yufala i no moa yusum ol aedol, mo ol narafala samting blong traem faenemaot ol samting we bambae i kamtru. Olgeta fasin ya bambae i mas finis evriwan.
5Mo biaen, bambae yufala i tanem tingting blong yufala, yufala i kambak long Hae God bakegen, from we hem nao i God blong yumi. Mo bambae yufala i kambak tu long man we i laen blong King Deved ya bifo, blong hem i king blong yumi. Nao bambae yumi ona gud long Hae God, mo bambae yumi glad blong karem ol presen we hem i givim long yumi.”
Who We AreWhat We EelieveWhat We Do
2025 by iamachristian.org,Inc All rights reserved.
