1 King 7 - Bislama Bible Revised 2012

Ol haos blong King Solomon

1Nao King Solomon i wokem ol haos long yad blong hem, mo i tekem totin yia blong finisim olgeta.

2-3Long yad ya, i gat wan bigfala haos, we nem blong hem “Sida blong Lebanon”. Oli putum nem ya long hem from we oli wokem long ol sida we i kam long Lebanon. Longfala blong haos ya i kasem foti fo meta, mo bigfala blong hem i kasem twanti tu meta mo hae blong hem i kasem totin meta haf. Long haos ya, i gat tri laen blong ol bigbigfala pos blong sida we i gat fiftin long wan laen, mo antap long olgeta, oli putum ol kroswud we oli sida evriwan. Mo siling tu oli wokem long plang blong sida. Siling ya i pas antap long ol rum blong putum ol samting long hem, mo ol bigbigfala pos ya oli holem ol rum ya.

4Long wol blong tufala saed blong haos ya, i gat tri laen blong windo.

5Oli mekem ol doa mo ol windo oli skwea, mo ol windo ya oli fesfesem olgeta.

6Mo i gat narafala bigfala haos we longfala blong hem i kasem twanti tu meta, mo bigfala blong hem i kasem totin meta haf. Haos ya, nem blong hem “Bigbigfala Pos”. Mo long fran blong hem, i gat wan vranda we ol bigbigfala pos ya oli holem.

7Mo i gat wan narafala haos bakegen we nem blong hem “Haos blong Stretem Trabol”, we oltaem King Solomon i stap go long ples ya, i stap sidaon long bigfala jea blong hem blong stretem ol trabol. Insaed long haos ya, oli blokem ol wol blong hem long plang blong sida, i stat long floa i go kasem siling antap.

8 , blong taem oli putum, bambae oli fit gud nomo.

10Ol fandesen blong ol haos ya, oli wokem long ol bigbigfala ston we oli mekemrere finis long ples we oli digim olgeta long hem, mo sam long ol ston ya, longfala blong olgeta i kasem tri meta haf mo samfala i kasem fo meta.

11Mo i gat ol narafala ston we oli katem stret long saes we oli makem, mo i gat ol timba blong sida tu we oli putum antap long fandesen.

12Wol we i goraon long bigfala yad blong king, mo wol we i goraon long smol yad blong haos* blong Hae God, mo wol blong rum blong go insaed long haos blong Hae God, oli wokem evriwan long sem fasin nomo. Oli putum tri laen blong ston mo wan laen blong timba blong sida, gogo oli finisim.

Wok blong Huram

13King Solomon i sanem tok i go long wan man we nem blong hem Huram, blong hem i kam wok blong hem. Man ya, hem i wan man blong taon ya Taea, mo i man blong wok long bras we i waes gud long wok ya.

14Papa blong hem i man Taea we hem tu i waes blong wok long bras, be hem i ded finis. Mo mama blong hem i laen* blong Naftali.* Huram i gat hed, mo i gat plante save long wok ya. Mo taem hem i harem tok ya blong king, hem i glad blong kam, blong i bos long ol wok long saed blong wokem ol samting long bras.

Tu bigfala pos we Huram i wokem long bras(2 Kronikel 3.15-17)

15-20Huram i wokem tu bigfala pos long bras, mo i stanemap tufala long fran blong haos* blong Hae God. Hae blong tufala pos ya, eit meta, mo bigfala blong tufala, klosap faef meta haf. Mo hem i wokem tu hed blong tufala pos ya long bras, we tufala i sem mak. Long tufala, haf blong hed ya antap i pija blong flaoa blong lili, we hae blong hem, klosap tu meta. Mo haf blong hed ya daon i raon, we hae blong hem, klosap haf meta. Long haf ya daon, hem i wokem wan samting olsem we i wivim ol jen, nao i putum i goraon long hem. Mo hem i wokem tu handred pija blong frut blong grenadin* long tu laen we i goraon long hem, antap long ples ya we samting olsem ol jen ya i goraon long hem. Hae blong tufala hed ya, i stat daon i kasem antap i moa long tu meta. Nao hem i putum tufala antap long tufala pos ya olsem hed blong tufala.

21Tufala pos ya we Huram i wokem long bras, hem i stanemap tufala long fran blong haos blong Hae God. Hemia we i stanap long saed i go long saot, hem i putum nem blong hem se Jakin, we i min se “Hae God i stanemap”, mo hemia we i stanap long saed i go long not, hem i putum nem blong hem se Boas, we i min se “Long bigfala paoa blong God”.

22Mo tufala hed ya we i pija blong lili we oli wokem long bras, oli putum antap long tufala pos ya.

Nao wok blong tu bigfala pos ya i finis.

Tang we Huram i wokem long bras(2 Kronikel 4.2-5)

23Nao Huram i wokem wan bigfala raon tang long bras, we hae blong hem i moa long tu meta, mo insaed blong hem, i stat long wan saed go kasem nara saed, i klosap long fo meta haf, mo bigfala blong hem afsaed i moa long totin meta.

24Long top blong tang ya long afsaed blong hem, aninit long maot blong hem, i gat ol pija blong frut blong melen long tu laen we wan laen i goraon antap, mo narawan i goraon daon long hem. Ol pija ya, hem i wokem wantaem wetem tang ya, blong flasem.

25Nao hem i wokem twelef bul long bras, i mekem olgeta oli stanap, we as blong olgeta i go wanples long medel, mo tri i lukluk i go long is, tri i lukluk i go long saot, tri i lukluk i go long wes, mo tri i lukluk i go long not, mo tang ya i sidaon antap long baksaed blong olgeta.

26Bigfala tang ya, tik blong hem i samwe long eit sentemeta, mo top blong hem i open olsem maot blong kap we i ben i go afsaed, olsem flaoa blong lili. Tang ya i holem samwe long foti taosen lita wota.

Ol kat we oli wokem long bras

27-36Mo bakegen, Huram i wokem ten kat long bras, we oli blong karem ten bigfala besin blong wota. Ol kat ya oli sem mak nomo, we longfala blong wan, klosap tu meta, mo bigfala blong hem, klosap tu meta, mo hae blong hem, klosap wan meta haf. Mo long ol fo kona blong ol kat ya antap, i gat ol aean we oli wokem long bras blong holem ples blong bigfala besin blong wota, mo long ol bras ya, oli wokem ol samting olsem bigfala rigin blong flasem. Ol bras ya oli holem samting olsem bigfala paep we oli stanemap insaed long kat blong holem besin. Samting ya, hae blong hem i moa long haf meta, we klosap haf meta blong hem i kamaot antap long kat, smol haf blong hem nomo i godaon insaed. Mo raon long haf blong hem we i kamaot antap, oli wokem ol mak long hem blong flasem. Aninit long ples ya blong besin, i gat bigfala bras i goraon long kat we i haf blong kat yet, we hae blong hem i moa long twanti sentemeta. Long bras ya, oli wokem ol pija blong laeon mo pamtri mo jerubim* long weples we oli save putum, mo raon long ol pija ya, oli wokem samting olsem bigfala rigin i stap long hem blong flasem. Aninit long bras ya long ol fo saed blong ol kat ya, i gat ol pija blong laeon mo bul mo jerubim we oli wokem long bras we i skwea, nao oli putum long ples blong olgeta long saed blong kat. Mo long ol bras antap, mo aninit long ol bras ya we i gat pija blong laeon mo bul long hem, oli wokem samting olsem bigfala rigin i stap long hem blong flasem. Ol kat ya wanwan oli gat fo wil we oli wokem long bras, mo oli gat ol longfala aean we oli wokem long bras, blong holem ol wil ya. Hae blong ol wil ya i moa long haf meta, mo oli stap aninit long ol bras ya we i skwea. Long ol fo kona blong kat daon, i gat ol bras blong holem longfala aean blong holem wil, mo olgeta samting ya oli haf blong kat nomo. Mo ol wil ya oli olsem wil blong kat blong faet, we olgeta aean blong olgeta oli bras nomo.

37Hemia nao fasin blong wokem ol kat ya. Olgeta evriwan oli sem mak nomo, mo oli sem saes nomo.

38 Eks 30.17-21 Mo hem i wokem ten besin, mo i putum olgeta wanwan long ol kat ya. Bigfala blong ol besin ya, i stat long wan saed go kasem nara saed, klosap tu meta, mo olgeta wanwan i holem eit handred lita.

39Hem i putum faef kat i stap klosap long haos* blong Hae God long saed i go long saot, mo i putum narafala faef klosap long haos ya long saed i go long not. Mo hem i putum bigfala tang ya long kona blong haos ya, long saed i go long saotis.

Olgeta samting blong haos blong Hae God(2 Kronikel 4.11—5.1)

40Mo bakegen, Huram i wokem ol sospen mo ol savel mo ol besin, nao i finisimgud olgeta wok we King Solomon i singaot hem blong i kam mekim blong haos* blong Hae God.

41Ol samting we hem i wokem i olsem. I gat tu bigfala pos, wetem tufala spesel hed blong tufala, mo ol samting ya we i olsem jen we i goraon long tufala hed ya wanwan, mo tufala laen ya blong pija blong frut blong grenadin,* we oli goraon long tufala hed ya wanwan,

42we i gat handred frut long wan laen i mekem fo handred olgeta.

43Mo i gat ten kat, mo ten besin blong wota,

44mo wan bigfala tang, mo twelef bul we tang ya i sidaon antap long olgeta,

45mo ol sospen, mo ol savel, mo ol besin.

Olgeta samting ya blong haos blong Hae God, hem i wokem olgeta stret olsem we king i talem. Hem i wokem olgeta long bras, mo i saenem olgeta gogo oli saen gud.

46King i talem long hem blong oli wokem ol samting ya long bigfala levelples ya klosap long Jodan Reva, long medel blong tufala taon ya Sukot mo Jaretan, from we graon long ples ya i gudwan blong yusum long wok ya.

47Be king i no talem long hem blong oli skelem ol samting ya, from we oli plante tumas, nao oli no wari blong faenemaot wet blong olgeta.

48 Eks 30.1-3; Eks 25.23-30 Mo king i talem long ol man blong hem, blong oli wokem ol samting long gol tu, blong putum insaed long haos blong Hae God. Ol samting we oli wokem i olsem. I gat Olta blong Bonem Insens* we oli blokem long gol, mo tebol we oli blokem long gol we oli stap putum bred long hem we i blong givim i go Hae God.

49Eks 25.31-40Mo i gat ten ples blong putum laet we oli wokem olgeta long gol we i beswan, mo oli putum olgeta oli stanap long doa blong Rum ya we i Tabu we i Tabu, faef long saed i go long saot, mo faef long saed i go long not. Mo i gat ol flaoa, mo ol laet, mo ol pinses,

50mo ol kap, mo ol smol hat blong laet we oli putum blong kilim laet, mo ol besin blong karem insens, mo ol savel blong karem sakol we i stap laet, mo ol hinsis blong tufala doa blong Rum ya we i Tabu we i Tabu, mo blong tu bigfala doa blong bigfala Rum we i Tabu.

Olgeta samting ya, oli wokem long gol we i beswan nomo.

51 2 Saml 8.11; 1 Kron 18.11 Taem we King Solomon i finisim ol wok ya long haos blong Hae God, hem i go tekem ol silva mo gol mo ol narafala samting olsem, we papa blong hem King Deved i bin givim i go long Hae God bifo, i putum olgeta i stap gud long ol storum blong haos ya.