Habakuk Sotfala stori blong buk ya - Bislama Bible Revised 2012

Sotfala stori blong buk yaOl tok blong buk ya, Profet Habakuk i stap talemaot long taem ya we i gat samwe long sikis handred yia* i stap yet blong kam kasem yia we Kraes* i bon long hem. Hemia stret long taem ya we ol man Babilonia oli holem paoa, nao oli kam rulum Isrel*. Nao from samting ya, long japta 1.13, hem i askem long Hae God se, “?Taem ol man Babilonia oli stap kilim ol man we fasin blong olgeta i stret lelebet, winim olgeta, be from wanem yu yu stap kwaet?” Be Hae God i talem long hem, se taem we stret taem blong hem i kamtru, hem nomo bambae i givim panis long olgeta. Mo long japta 2.4, hem i talem se, “Olgeta ya nomo we fasin blong olgeta i stret, bambae oli save laef, from we tingting blong olgeta i stap strong long mi nomo.”Narafala haf blong buk ya i tokbaot ol samting we bambae i kam kasem ol man we fasin blong olgeta i no stret. Mo long en blong hem, i gat sing blong leftemap nem blong God, from we hem i hae we i hae. Mo ol tok blong sing ya i soemaot we man we i raetem, hem i putum tingting blong hem i stap strong long God.Ol haf blong buk yaHabakuk i krae long Hae God from we stret fasin i lus,nao Hae God i givim ansa long tok blong hem 1.1—2.4

Ol man nogud bambae oli kasem panis 2.5-20

Prea blong Profet Habakuk 3.1-19