Sam 43 - Bislama Bible Revised 2012

Prea blong man we i stap afsaed long kantri blong hem, mo i no save gobak(Sing ya i haf blong Sam 42.)(Tok i go long God.)

1God,

plis yu talemaot long fes blong ol man

we mi mi no mekem samting nogud,

mo yu stanap long saed blong mi,

yu agensem ol man

we oli no mekem wosip long yu.

Plis yu blokem ol man blong giaman

mo ol man nogud,

yu sevem mi.

2Yu yu God,

we yu sefples blong mi.

?From wanem yu lego mi?

Ol enemi blong mi

oli stap spolem mi tumas.

?From wanem mi stap harem nogud olsem?

3Plis yu sanem laet blong yu

mo trutok blong yu i kam.

Mi wantem blong tufala i lidim mi,

tufala i tekem mi mi kambak long Saeon,*

tabu hil ya blong yu,

tufala i tekem mi mi kamtru long ples blong yu

we yu yu stap long hem.

4God,

yu yu stamba blong glad blong mi,

bambae mi go long olta blong yu bakegen

blong mekem sakrefaes.

Yu yu God blong mi,

bambae mi plei long gita blong mi,

mi sing blong presem yu.

5?From wanem mi mi sore tumas olsem?

?From wanem tingting blong mi

i trabol tumas?

Bambae mi mi putum tingting blong mi

i stap long yu nomo,

mo bakegen,

bambae mi stap presem yu

we yu yu God blong mi,

yu sevem mi.