Jeremaea 44 - Bislama Bible Revised 2012

Tok blong Hae God i go long ol man Juda we oli stap long Ijip

1Nao Hae God i toktok long Profet Jeremaea blong i givim tok blong hem long ol man Juda* ya we oli stap long Ijip. Hemia ol man blong trifala taon ya Migdol, mo Tafanes, mo Memfis, mo olgeta blong distrik ya Patros long saot blong kantri ya, we oli stap long ples ya

2Nao profet i talem se, “Olgeta. Hae God i God blong yumi ol laen* blong Isrel,* mo hem i gat olgeta paoa. Hem i talem se, ‘Yufala i luk finis bigfala trabol ya we mi mi mekem i kam kasem Jerusalem,* mo ol narafala taon blong yufala. Naoia, olgeta taon ya oli stap nating nomo, i no moa gat man i stap long olgeta kam kasem tede.

3Mi mi mekem olsem, from we bifo, yufala wetem ol laen blong yufala long ol taon ya, yufala i mekem sin agens long mi, nao mi mi kros tumas long yufala from. Yufala i stap mekem sakrefaes long ol narafala god, mo yufala i stap mekem ol wok blong ol god ya, we fastaem, yufala wetem ol bubu blong yufala bifo, yufala evriwan i no save.

4Mo oltaem, mi mi stap sanem ol profet we oli man blong wok blong mi, oli kam talem long yufala, blong yufala i no mekem ol samting ya we i nogud we i nogud, we mi mi no laekem olgeta nating, mi agens long olgeta.

5Be yufala i no harem tok blong ol profet ya, mo yufala i no wantem lesin long olgeta nating. Yufala i no wantem lego ol rabis fasin blong yufala, mo ol sakrefaes ya we yufala i stap mekem long ol narafala god.

6Nao from samting ya, mi mi kros tumas, mo mi letem kros blong mi i kasem yufala, nao mi bonem ol taon ya long Juda, mo mi spolem ol big rod blong Jerusalem. Mo ol taon ya, ol enemi oli spolemgud olgeta, mo oli stap nating nomo kam kasem tede.

7“ ‘?From wanem yufala i stap mekem ol samting nogud ya blong spolem yufala bakegen? Naoia yufala i plante. I gat ol man mo ol woman mo ol pikinini mo ol bebi blong yufala i stap. ?Be weswe? ?Yufala i wantem pulum trabol i kam long yufala, blong bambae i no moa gat wan long yufala i stap?

8!Yufala i stap mekem mi mi kros tumas! Yufala i stap mekem wosip long ol aedol, mo yufala i stap mekem sakrefaes long ol narafala god long ples ya we yufala i kam stap long hem. ?From wanem yufala i stap mekem olsem? Mi mi luk se yufala i mekem nomo blong spolem yufala, nao olgeta kantri long wol bambae oli laf nogud long yufala, mo oli stap yusum nem blong yufala blong singaot* trabol i kam long narafala man.

9?Olsem wanem? Ating yufala i fogetem ol rabis fasin ya we ol bubu blong yufala oli stap mekem bifo, mo yufala i no moa tingbaot ol rabis fasin ya we ol king blong yufala wetem ol woman blong olgeta, mo yufala wetem ol woman blong yufala, yufala evriwan i stap mekem long ol taon long Juda, mo olbaot long Jerusalem.

10Kam kasem tede, yufala i no mekem tingting blong yufala i stap daon nating. Yufala i no ona long mi, mo yufala i no obei long ol loa we mi mi givim long yufala, mo long ol bubu blong yufala bifo.

11“ ‘Nao from samting ya, bambae mi mi agensem yufala, mo bambae mi spolem yufala evriwan.

12Mo from we yufala i wantem kam long Ijip, mi bambae mi spolem yufala evriwan. I stat long ol haeman, gogo kasem olgeta we oli no gat nem, bambae yufala evriwan i ded long Ijip. Sam long yufala bambae oli ded long taem blong faet, mo sam bambae oli ded long hadtaem blong kasem kakae. Nao olgeta we oli luk yufala, bambae oli sapraes tumas long yufala, oli lukluk rabis long yufala, mo bambae oli laf nogud long yufala, mo oli stap yusum nem blong yufala blong singaot trabol i kam long narafala man.

13Yufala ya we i stap long ples ya, mi bambae mi panisim yufala stret olsem we mi panisim olgeta long Jerusalem, we mi letem olgeta oli ded long taem blong faet, mo long hanggri, mo long bigfala sik we i kasem olgeta.

14Yufala ya we i kam stap long Ijip naoia, bambae yufala i no save laef, mo bambae yufala i no save ronwe, bambae yufala evriwan i ded. Bambae i no gat wan long yufala we i save gobak long Juda, ples ya we yufala i wantem tumas blong gobak long hem. Bambae yufala i no save go stap long ples ya bakegen, smol haf nomo blong yufala bambae oli save ronwe long taem blong faet blong gobak.’ ”

15Nao ol man ya we oli save se ol woman blong olgeta oli stap mekem sakrefaes long ol narafala god, mo ol woman we oli stap stanap long ples ya wetem olgeta, mo ol narafala man Juda we oli kam long distrik ya Patros, oli talem long profet se,

16“Profet. Yu yu stap toktok long mifala long nem blong Hae God, be mifala i no wantem harem tok blong yu.

17Bambae mifala i gohed blong mekem evri samting we mifala i mekem promes finis, se bambae mifala i mekem. Bambae mifala i mekem sakrefaes long woman god ya we hem i Kwin blong Heven. Mo bambae mifala i stap kafsaedem waen blong givim presen long hem blong mekem wosip long hem, olsem we mifala mo ol bubu blong mifala mo ol king wetem ol lida blong yumi oli mekem long ol taon blong Juda, mo olbaot long Jerusalem. Long taem ya, yumi gat plante kakae, mo yumi gat plante samting, mo yumi no gat trabol nating.

18Be i stat long taem ya we mifala i no moa stap mekem sakrefaes long woman god ya, mo mifala i no moa stap kafsaedem waen blong givim presen long hem blong mekem wosip long hem, yumi sot long evri samting. Mo ol man ples blong yumi oli ded long taem blong faet, mo long hanggri.”

19Mo ol woman tu oli tok, oli talem se, “Taem mifala i wokem ol kek we i gat pija blong Kwin ya blong Heven i stap long hem, mo mifala i stap yusum ol kek ya blong mekem sakrefaes, mo mifala i stap kafsaedem waen blong givim long hem, be ol man blong mifala oli agri nomo long samting ya we mifala i mekem.”

20Nao profet i tok long olgeta, i talem se,

21“Bifo, taem yumi stap long Juda, yufala wetem ol bubu blong yufala, mo ol king wetem ol lida blong yumi, mo ol narafala man Juda, yufala i stap mekem ol sakrefaes long ol taon long Juda mo olbaot long Jerusalem. ?Weswe? ?Yufala i ting se Hae God i save fogetem samting ya? !Nogat! !Hem i no save fogetem ya!

22Ol enemi oli spolemgud kantri blong yumi, mo naoia i stap nating nomo, i no moa gat man i stap long hem. Mo taem ol man oli luk kantri ya, oli fraet tumas long hem, mo oli stap yusum nem blong hem blong singaot trabol i kam long narafala man. Hae God nomo i mekem ol samting ya i kamtru olsem, from we hem i taed gud long yufala, mo hem i harem nogud tumas long ol rabis fasin we yufala i stap mekem, we oli nogud we i nogud.

23Bigfala trabol ya i kam kasem yufala, from we yufala i stap mekem sakrefaes long ol narafala god, mo yufala i mekem sin agens long Hae God, we yufala i no obei long ol tok blong hem, mo yufala i no folem ol loa we hem i putum.”

24-25Nao profet i tok long olgeta bakegen, i talem se, “Ol man Juda. Hae God i gat olgeta paoa, mo hem i God blong yumi ol laen blong Isrel, mo yufala evriwan we i stap long kantri ya, yufala i mas harem tok blong hem. Hem i talem se, ‘Yufala evriwan wetem ol woman blong yufala, yufala i mekem strong promes finis long woman god ya, se bambae yufala i mekem sakrefaes long hem, mo bambae yufala i givim waen long hem, mo yufala i stap holem promes ya yet. Oraet, yufala i gohed, yufala i mekem ol samting ya we yufala i promes blong mekem. Yufala i holemtaet promes ya.

26Mi mi Hae God, mo mi mekem wan strong promes long yufala long hae nem blong mi. Naoia, yufala i mas harem tok blong mi. Oltaem, taem we yufala i wantem mekem tok blong yufala i stanap, yufala i stap talem se, “Hae God, Masta* blong yumi, hem i laef, i stap we i stap, mo long fes blong hem, ol tok ya i tru.” Be bambae mi no save letem wan long yufala i yusum nem blong mi bakegen long fasin ya.

27Mi bambae mi letem ol enemi oli kam spolem yufala, nao bambae yufala i no save kasem wan gudfala samting nating. Mi bambae mi letem yufala evriwan i ded, we sam bambae i ded long faet, mo sam bambae i ded long hanggri. Mo bambae mi mekem olsem, gogo kasem we yufala evriwan i ded.

28Be smol haf blong yufala nomo bambae oli aot long Ijip, oli ronwe i gobak long Juda. Nao olgeta ya bambae oli save makem se tok blong hu i stret, blong mi, no blong yufala.

29Mi bambae mi mekem wan saen long yufala blong soemaot long yufala we bambae mi mas panisim yufala long ples ya, mo tok blong mi blong spolem yufala bambae i kamtru.

302 King 25.1-7Bambae mi letem King Hofra, king blong Ijip, i go long han blong ol enemi blong hem we oli wantem kilim hem i ded, stret olsem we mi letem King Jedekia, king blong Juda i go long han blong King Nebukadnesa, king blong Babilonia, we i wantem kilim hem i ded. Mi mi Hae God, mo hemia tok blong mi.’ ”