Jajes 21 - Bislama Bible Revised 2012

Ol narafala laen blong Isrel oli sore long ol laen blong Benjamin

1Bifo, long taem ya we ol narafala laen* ya blong Isrel* oli kam wanples long Mispa fastaem, olgeta oli mekem wan strong promes long fes blong Hae God, oli talem se, “Bambae i no gat wan long yumi i save letem blong wan laen blong Benjamin* i kam tekem dota blong hem.”

2Nao long taem ya, Bokis ya we i Saen blong Promes* blong Hae God i stap long Betel, mo taem faet ya i finis, olgeta oli harem nogud tumas from ol brata ya blong olgeta, nao oli gobak bakegen long Betel, mo oli stap sidaon nomo long ples ya, oli stap krae bigwan long fes blong Hae God gogo san i godaon.

3Oli talem se, “Hae God, yu yu God blong mifala. ?From wanem samting ya i kamaot olsem? Ol laen ya blong Benjamin oli brata blong mifala nomo, be naoia, klosap oli lus evriwan.”

4Nao long nekis dei, long eli moning, olgeta oli girap, oli mekem wan olta, nao oli mekem ol sakrefaes blong mekem wosip long Hae God, we sam oli bonem i bon evriwan, mo sam oli bonem haf oli kakae haf, blong soemaot we oli stap fren gud wetem hem.

5Nao biaen, oli stap asaskem long olgeta se, “?Olsem wanem? ?Long taem ya we yumi kam wanples long fes blong Hae God long Mispa, i gat sam long yumi we oli no kam joen wetem yumi?” Oli stap askem olsem, from we oli bin mekem wan narafala strong promes tu long taem ya, oli talem se, “Sipos i gat wan long yumi we i no kam joen wetem yumi long fes blong Hae God long ples ya tede, bambae yumi kilim hem i ded.”

6Olgeta oli sore tumas long ol laen blong Benjamin, nao oli talem se, “Tede, yumi ya, klosap yumi lusum wan long ol twelef laen blong yumi.

7Mo ol brata ya blong yumi we oli stap laef yet, naoia oli no gat woman blong olgeta. Yumi mekem wan strong promes finis long fes blong Hae God, se bambae yumi no save letem olgeta oli kam tekem ol gel blong yumi. ?Be bambae yumi mekem olsem wanem blong givhan long olgeta?”

8Nao taem olgeta oli stap asaskem gogo, oli faenemaot we ol man blong taon ya Jabes long Gilead oli no bin joen wetem olgeta long taem ya we oli stap long Mispa.

9Oli jes tingbaot se bifo, taem we oli stap singaot nem blong ol ples blong kaontem ol man, be oli faenemaot se olgeta ya oli no kam.

10Nao oli jusumaot twelef taosen man blong olgeta we oli gudfala man blong faet, mo oli talem long olgeta se, “Yufala i go kilim ol man Jabes ya wetem ol woman blong olgeta mo ol pikinini blong olgeta oli ded evriwan.

11Ol gel ya nomo blong olgeta we oli no save man yet, bambae yufala i holem olgeta i stap laef.”

12Nao oli go faet, mo taem faet i finis, oli faenem fo handred yang gel olsem long Jabes, mo oli holem olgeta, oli tekem olgeta i kambak long Kenan,* long ples ya Silo, we ol laen ya blong Isrel oli stap long hem.

13Long taem ya, ol laen ya blong Benjamin oli stap haed yet long klif ya Rimon, nao ol narafala laen ya blong Isrel oli sanem tok i go long olgeta blong oli kam long ples ya, blong oli mekem pis bakegen.

14Mo taem olgeta oli kam, ol narafala laen ya blong Isrel oli tekem ol gel ya, oli givim i go long olgeta. Be ol laen ya blong Benjamin oli plante tumas, namba blong ol gel ya i no kasem namba blong olgeta.

15Nao ol laen blong Isrel ya oli sore yet long olgeta, from we Hae God i katemaot olgeta finis long kampani blong olgeta.

16Nao ol lida blong olgeta oli talem se, “Naoia i no moa gat woman nating we i kamaot biaen long Benjamin. ?Bambae yumi mekem olsem wanem blong faenem sam woman blong olgeta ya we oli no gat woman blong olgeta yet?

17I no stret blong wan long ol twelef laen ya blong yumi i lus. Yumi mas faenem wan rod blong mekem olgeta ya oli kam plante bakegen.

18Yumi no save letem blong oli kam tekem ol gel blong yumi, from we yumi mekem strong promes ya finis se, ‘Man we i letem wan long olgeta ya i kam tekem dota blong hem bambae i mas ded.’ ”

19Nao oli tingbaot we bambae i no longtaem, oli mekem lafet ya long Silo we oli stap mekem evri yia long ples ya, blong ona long Hae God. Ples ya Silo, hem i stap long medel blong tufala ples ya Betel mo Lebona, we Betel i stap long saot, mo Lebona i stap long not, mo rod ya we i aot long Betel i go long Sekem, hem i stap long wes.

20Nao oli talem long ol laen blong Benjamin se, “Long taem blong lafet ya, i gud yufala i go haed long ol plantesen blong grep.*

21Bambae yufala i stap wet long ples ya, nao taem ol gel ya blong Silo oli kamaot blong danis, bambae yufala wanwan i go pulum olgeta blong oli kam woman blong yufala. Bambae yufala i tekem olgeta i gobak long ples blong yufala.

22Sipos ol papa blong olgeta no ol brata blong olgeta oli kam tok long mifala from, be bambae mifala i save talem long olgeta se, ‘Plis yufala i livim ol gel ya i stap, from we long taem blong faet, yumi no holem sam gel i stap, blong givim long ol man ya. Mo sipos yufala i givim olgeta i go nomo long olgeta, bambae yufala i brekem strong promes ya we yumi mekem finis long fes blong Hae God.’ ”

23Nao ol laen ya blong Benjamin oli mekem olsem. Oli go stap haed, mo taem ol gel ya oli kamaot blong danis, olgeta wanwan oli girap, oli go pulum olgeta oli kam woman blong olgeta, nao oli tekem olgeta i gobak long ples blong olgeta. Mo taem oli kam stap long ples blong olgeta, oli wokemgud ol taon blong olgeta bakegen, mo oli stap long olgeta.

24Nao long taem ya, ol narafala laen ya blong Isrel oli aot, oli gogobak long ol distrik blong olgeta, mo long ol famle blong olgeta mo long ol ples blong olgeta.

25 Jaj 17.6 Long taem ya, ol laen blong Isrel oli no gat king blong olgeta, mo evri man oli stap mekem olsem we oli luk se i stret.