Namba 33 - Bislama Bible Revised 2012

Rod we ol laen blong Isrel oli folem, i stat long Ijip, i kam kasem Moab

1-2Nao taem ol laen* blong Isrel* oli aot long Ijip, oli wokbaot i kam kasem Moab, olgeta oli stap aninit long han blong Moses wetem Hae Pris Eron, mo taem olgeta oli wokbaot, oli stap wokbaot folem ol laen blong olgeta. Mo Hae God i talem long Moses se taem oli putumap ol haos tapolen blong olgeta, hem i mas raetemdaon nem blong ples we oli stap long hem, mo oltaem hem i stap mekem olsem. Nao rod we olgeta oli folem i olsem.

3Long fas manis blong yia ya we oli aot long Ijip, long namba fiftin dei* blong hem, we hemia i dei biaen long fas Lafet* blong Pasova,* olgeta oli stat blong wokbaot. Hae God i stap lukaot gud long olgeta, i stap blokemgud olgeta, nao oli aot long taon ya Rameses stret long fes blong ol man Ijip.

4Long taem ya, ol man Ijip oli stap berem ol fasbon pikinini boe blong olgeta, we Hae God i kilim olgeta oli ded. Hem i mekem samting ya blong soemaot we hem i gat moa paoa, i winim ol god blong ol man Ijip.

5Nao taem oli aot long ples ya, oli kam mekem ples blong olgeta long ples ya Sukot.

6Biaen, oli aot long ples ya, oli kam mekem ples blong olgeta long ples ya Etam, we i stap klosap long draeples, saed i kam.

7Biaen, oli aot long ples ya, oli tanemraon, oli gobak long Pihahirot, nao oli mekem ples blong olgeta klosap long Migdol, long saed blong Baljefon long is.

8Biaen, oli aot long Pihahirot, oli gokros long Red Si, oli go insaed long draeples ya Suru. Oli wokbaot tri dei, nao oli kam kasem Mara, mo oli mekem ples blong olgeta long ples ya.

9Biaen, oli aot long ples ya, oli kam mekem ples blong olgeta long ples ya Elim, we i gat twelef springwota mo seventi pamtri* i stap long hem.

10Biaen, oli aot long ples ya, oli kam mekem ples blong olgeta daon long Red Si.

11Biaen, oli aot long ples ya, oli kam mekem ples blong olgeta long draeples ya Sin.

12Biaen, oli aot long ples ya, oli kam mekem ples blong olgeta long ples ya Dofkaha.

13Biaen, oli aot long ples ya, oli kam mekem ples blong olgeta long ples ya Alus.

14Biaen, oli aot long ples ya, oli kam mekem ples blong olgeta long ples ya Refidim, we i no gat wota long hem.

15Biaen, oli aot long ples ya, oli kam mekem ples blong olgeta long draeples ya Sinae.

16Biaen, oli aot long ples ya, oli kam mekem ples blong olgeta long ples ya Kibrot Hatahava, we i min se, “Beregraon blong ol man we oli wantem mit tumas”.

17Biaen, oli aot long ples ya, oli kam mekem ples blong olgeta long ples ya Hajerot.

18Biaen, oli aot long ples ya, oli kam mekem ples blong olgeta long ples ya Ritma.

19Biaen, oli aot long ples ya, oli kam mekem ples blong olgeta long ples ya Rimonperes.

20Biaen, oli aot long ples ya, oli kam mekem ples blong olgeta long ples ya Libnaha.

21Biaen, oli aot long ples ya, oli kam mekem ples blong olgeta long ples ya Risa.

22Biaen, oli aot long ples ya, oli kam mekem ples blong olgeta long ples ya Kehelata.

23Biaen, oli aot long ples ya, oli kam mekem ples blong olgeta klosap long hil ya Sefa.

24Biaen, oli aot long ples ya, oli kam mekem ples blong olgeta long ples ya Harada.

25Biaen, oli aot long ples ya, oli kam mekem ples blong olgeta long ples ya Makelot.

26Biaen, oli aot long ples ya, oli kam mekem ples blong olgeta long ples ya Tahat.

27Biaen, oli aot long ples ya, oli kam mekem ples blong olgeta long ples ya Teraha.

28Biaen, oli aot long ples ya, oli kam mekem ples blong olgeta long ples ya Mitkaha.

29Biaen, oli aot long ples ya, oli kam mekem ples blong olgeta long ples ya Hasmona.

30Biaen, oli aot long ples ya, oli kam mekem ples blong olgeta long ples ya Moserot.

31Biaen, oli aot long ples ya, oli kam mekem ples blong olgeta long ples ya Benejahakan.

32Biaen, oli aot long ples ya, oli kam mekem ples blong olgeta long ples ya Hohagidgad.

33Biaen, oli aot long ples ya, oli kam mekem ples blong olgeta long ples ya Jotbata.

34Biaen, oli aot long ples ya, oli kam mekem ples blong olgeta long ples ya Abrona.

35Biaen, oli aot long ples ya, oli kam mekem ples blong olgeta long ples ya Ejionkeba.

36Biaen, oli aot long ples ya, oli kam mekem ples blong olgeta long draeples ya Jin, long ples ya Kades.

37Biaen, oli aot long ples ya, oli kam mekem ples blong olgeta klosap long hil ya Horo, long mak blong graon blong ol man Edom.

38 Nam 20.22-28; Dut 10.6; 32.50 Nao long namba foti yia biaen long taem ya we olgeta oli aot long Ijip, long namba faef manis blong yia ya, long fas dei blong hem, Hae God i talem long Hae Pris Eron blong i go antap long hil ya. Mo taem hem i go antap, hem i ded long ples ya.

39Long taem ya, hem i gat wan handred twanti tri yia blong hem.

40 Nam 21.1 Nao long taem ya, king blong ples ya Arad long kantri ya Kenan,* long saed blong hem long saot, hem i harem nius blong olgeta, we oli stap kam.

41Biaen, oli aot long hil ya Horo, oli kam mekem ples blong olgeta long ples ya Jalmona.

42Biaen, oli aot long ples ya, oli kam mekem ples blong olgeta long ples ya Punon.

43Biaen, oli aot long ples ya, oli kam mekem ples blong olgeta long ples ya Obot.

44Biaen, oli aot long ples ya, oli kam mekem ples blong olgeta long mak blong graon blong ol man Moab, klosap long olfala taon ya Abarim, we i kam nogud finis.

45Biaen, oli aot long ples ya, oli kam mekem ples blong olgeta long ples ya Dibonkad.

46Biaen, oli aot long ples ya, oli kam mekem ples blong olgeta long ples ya Almondiblataem.

47Biaen, oli aot long ples ya, oli kam mekem ples blong olgeta klosap long hil ya Abarim, long saed blong hil ya Neboho.

48Biaen, oli aot long ples ya, oli kam mekem ples blong olgeta long bigfala levelples ya long Moab, long saed blong Jodan Reva long is, we taon ya Jeriko i stap narasaed reva ya i go.

49Nao oli stap long saed blong Jodan Reva long is, long medel blong tufala ples ya Betsesimot, long saot, mo bigfala levelples ya Kasis, long not.

Tok we Hae God i givim long Moses blong i go talemaot long olgeta

50Nao taem olgeta oli stap long bigfala levelples ya long Moab long saed blong Jodan Reva long is, we taon ya Jeriko i stap narasaed reva ya i go, Hae God i givim tok blong hem long Moses

51blong i go talemaot long ol laen* blong Isrel.* Hem i talem se, “Taem yufala i gokros long Jodan Reva blong go long kantri ya Kenan,*

52bambae yufala i mas ronemaot olgeta man we oli stap long kantri ya. Bambae yufala i mas spolem ol aedol blong ol god blong olgeta we oli wokem long ston mo long aean, mo yufala i mas brekemdaon olgeta ples blong mekem wosip tu blong olgeta.

53Bambae yufala i mas holem kantri ya, nao yufala i mas stap long hem, from we mi mi makemaot finis se i blong yufala.

54Nam 26.54-56Bambae yufala i mas seraot ol graon long kantri ya i go long ol laen ya blong yufala, folem ol namba blong olgeta. Bigfala graon i mas go long laen we i gat plante man long hem, mo smol graon i mas go long laen we i no gat plante man long hem. Mo blong seraot ol graon ya, yufala i mas sakem ol spesel ston blong faenemaot se wanem graon bambae i go long wanem laen.

55Be sipos yufala i no ronemaot olgeta man ya evriwan we oli stap long ples ya, olgeta we oli stap bambae oli mekem tumas trabol long yufala. Bambae oli olsem smol pis wud we i sap tumas, i stap stikim ae blong yufala, no nil blong aranis we i stap stikim bodi blong yufala, we oltaem yufala i stap harem nogud tumas from. Oltaem bambae olgeta oli stap faet agens long yufala.

56Mo sipos yufala i no ronemaot olgeta, bambae mi mi spolem yufala, olsem we mi mekem plan fastaem se bambae mi spolem olgeta.”