Filimon Sotfala stori blong buk ya - Bislama Bible Revised 2012

Sotfala stori blong buk yaFilimon hem i wan Kristin man, we plante man oli ting se hem i wan man blong jos long taon ya Kolosi, mo hem i masta blong wan slef* we nem blong hem Onesimas. Onesimas i bin ronwe long masta blong hem Filimon, i go stap long Rom, taon ya we Pol i stap kalabus long hem. Mo long ples ya hem i mitim Pol, mo taem hem i stap wetem Pol hem i kam Kristin. Nao Pol i raetem wan leta i go long Filimon, i askem long hem blong hem i mas tekem Onesimas i gobak blong stap wetem hem bakegen. Pol i talem long Filimon, se naoia Onesimas i kam Kristin finis, mo i gud hem i no kros long hem, be hem i fogivim hem mo i tekembak hem blong i slef blong hem bakegen. Be bambae hem i no slef nomo, hem i kam wan tru brata blong hem from we tufala i joen long Jisas Kraes*.Ol haf blong buk yaFastok 1-3

Pol i presem Filimon from wok blong hem 4-7

Pol i askem strong long Filimonblong i tekembak Onesimas 8-22

Lastok 23-25