1Mo bakegen Profet Sekaraea i talem se, “Nao mi luk wan vison* bakegen, mo long vison ya mi luk we wan man i stap holem teplaen.
2Nao mi askem long hem se, ‘?Yu stap go wea ya?’
“Mo hem i talem long mi se, ‘Mi wantem go makem saes blong taon ya Jerusalem.* Mi wantem faenemaot longfala blong hem, mo bigfala blong hem.’
3“Nao mi luk wan narafala enjel i stap kam, mo enjel ya we i bin toktok wetem mi i go blong mitim hem.
4Nao enjel ya we i jes kamtru, i talem long narawan ya se, ‘Yu resis, yu go talem long man ya we i stap holem teplaen ya se, “Jerusalem bambae i fulap long plante man mo plante anamol tu. Ples ya bambae i bigwan we i bigwan, bambae i no moa naf blong putum stonwol i goraon long hem.
5Hae God i promes* finis, se hem nomo bambae i olsem faea we i laet i goraon long hem, olsem stonwol blong blokemgud taon ya. Hem bambae i stap wetem olgeta insaed long taon ya, mo bambae oli stap gud long medel blong bigfala laet ya blong hem.” ’ ”
God i singaot olgeta we oli stap wok slef long Babilonia blong oli kamhom6-7Mo bakegen, Profet Sekaraea i talemaot we Hae God i talem long ol man blong hem se, “Olgeta. Mi mi bin ronemaot yufala i go long evri ples. Be naoia, yufala we i stap wok slef* long Babilonia, yufala i aot long ples ya, yufala i kambak long Jerusalem* bakegen.
8Taem wan man i kilim yufala, i olsem we man ya i kilim ae blong mi stret.”
Mo profet i talem se, “Hae God i gat olgeta paoa, mo hem i sanem mi blong mi karem tok blong hem i go long ol kantri ya we oli bin tektekemaot olting blong yumi,
9mi talemaot long olgeta we hem i talem se, ‘Mi nomo bambae mi faet agens long yufala. Olgeta ya we bifo oli man blong wok blong yufala, bambae oli kam tektekemaot olting blong yufala.’
“Ol man Jerusalem. Taem ol samting ya oli kamtru, bambae yufala i save nao se Hae God i gat olgeta paoa, mo hem i bin sanem mi.
10“Hem i talem se, ‘Ol man Jerusalem. Yufala i mas glad, yufala i singsing. Bambae mi kam, mi mekem ples blong mi wetem yufala.’
11“Long taem ya, plante man blong ol naranarafala kantri bambae oli kam long Hae God, oli kam man blong hem. Hem bambae i kam stap wetem yumi, mo bambae yufala i save se hem nao i sanem mi, blong mi kam talemaot tok ya long yufala.
12Distrik ya Juda* bambae i kam wan spesel ples blong Hae God long tabu kantri blong hem. Mo Jerusalem bambae i kam wan taon we hem i jusumaot se i blong hem, blong i stap long hem.
13“Yumi evriwan i mas stap kwaet long fes blong Hae God, from we naoia, hem i aot long tabu ples blong hem, i stap kam blong stap wetem yumi.”
Who We AreWhat We EelieveWhat We Do
2025 by iamachristian.org,Inc All rights reserved.
