1 King 17 - Bislama Bible Revised 2012

Profet Elaeja i talemaot we bambae i gat draetaem long Isrel

1 Jem 5.17 Nao i gat wan profet i stap, nem blong hem Elaeja, we hem i man Tisbe long Gilead, mo hem i talem long King Ehab se, “King. Hae God i laef, i stap we i stap, mo hem i God blong yumi evriwan ya we i laen* blong Isrel.* Mi mi man blong wok blong hem, mo long fes blong hem, mi mi talem tru long yu, se long tutri yia, ren mo wota blong naet bambae i no moa save foldaon, gogo mi nomo bambae mi talem.”

2Nao Hae God i talem long profet ya se,

3“Yu aot long ples ya, yu go haed long smol reva ya Kerit long is, long narasaed Jodan Reva i go.

4Bambae yu save dring wota long ples ya, mo mi talem finis long ol pijin ya reven,* blong bambae oli stap karem kakae i kam long yu.”

5Nao hem i obei long tok ya, i go stap long reva ya,

6i stap dring long hem, mo oltaem, long moning mo long sapa, ol pijin ya reven oli stap karem bred mo mit i kam long hem.

7Hem i stap long ples ya gogo, nao reva ya i kam drae from we i no gat ren.

Profet Elaeja i go stap long Jarefat long haos blong wan wido

8Nao Hae God i talem long Profet Elaeja se,

9Luk 4.25,26“Elaeja. Yu girap, yu go long taon ya Jarefat, klosap long Saedon, yu stap long ples ya. Mi mi toktok finis long wan wido long ples ya, blong hem bambae i givim kakae long yu.”

10Nao profet ya i go long ples ya, mo taem hem i go klosap long doa* blong bigfala stonwol blong taon ya, hem i luk wan wido i stap pikimap faeawud, nao i talem long hem se, “Plis yu givim smol wota long mi blong mi dring.”

11Mo taem woman ya i stap go blong kasem wota, profet i singaot i go long hem se, “Plis yu tekem smol kakae tu i kam.”

12Nao woman ya i talem se, “!O sore tumas! Hae God blong yu i laef, i stap we i stap, mo long fes blong hem, mi mi talem tru long yu se mi mi no gat kakae nating i stap. I gat wan kap flaoa nomo i stap long besin mo smol oel nomo i stap long botel. Mi kam long ples ya blong karem faeawud, blong mi go wokem smol kakae ya nomo we i stap, blong mi wetem pikinini blong mi, mitufala i kakae. Hemia bambae i las kakae blong mitufala. Finis, bambae mitufala i stap olsem, gogo mitufala i ded.”

13Nao profet i talem long hem se, “Yu no wari, yu gohed yu wokem kakae blong yu. Be fastaem yu mekem wan smol bred long flaoa ya we i stap, yu tekem i kam long mi. Biaen yu wokem hemia we i stap, blong yu mo pikinini blong yu.

14Hae God i God blong mifala ol laen* blong Isrel,* mo hem i talem se bambae flaoa ya i no save finis long besin blong hem, mo oel ya i no save finis long botel blong hem, gogo kasem taem we hem bambae i sanem ren i kam.”

15Nao woman ya i go mekem olsem we profet ya i talem, mo evri dei, trifala i gat kakae we i naf long trifala.

16Flaoa i no finis nating long besin, mo oel i no finis long botel, stret olsem tok ya blong Hae God we profet i talemaot.

17Biaen long samting ya, pikinini blong woman ya i sik we i sik tumas, nao i ded.

18Nao mama blong hem i tok long profet, i talem se, “!Man blong God! ?From wanem yu mekem samting ya long mi? ?Weswe? !Ating yu kam long ples ya blong talemaot ol sin blong mi long God, blong mekem pikinini blong mi i ded!”

19Nao profet i talem se, “Yu givim boe ya long mi.” Nao hem i karemaot boe ya long han blong mama blong hem, i karem hem i go antap long rum we hem i stap slip long hem, i putum hem long bed blong hem.

20Nao hem i prea, i talem se, “Hae God. Yu yu God blong mi. ?From wanem yu yu mekem trabol ya we i nogud tumas i kam long woman ya? Hem i kaen tumas long mi, mo i stap lukaot gud long mi, be naoia, yu yu kilim pikinini blong hem i ded.”

212 King 4.34,35Nao hem i slip antap long boe ya tri taem, mo i prea, i talem se, “Hae God, yu yu God blong mi. Plis yu mekem pikinini ya i laef bakegen.”

22Nao Hae God i harem prea blong hem, mo boe ya i stat pulum win blong hem, nao i laef bakegen.

23Nao hem i tekem boe ya i godaon long rum blong tufala, i talem long mama blong hem se, “Hemia pikinini blong yu. Hem i laef bakegen finis.” Nao hem i givimbak pikinini ya long hem.

24Nao woman ya i talem long hem se, “Naoia, mi mi savegud we yu yu man blong Hae God, mo i tru we hem i stap givim tok blong hem long yu blong yu talemaot.”