Esra 10 - Bislama Bible Revised 2012

Ol man Juda oli lego ol woman blong olgeta we oli blong ol narafala kantri

1Nao pris* ya Esra i stap bodaon afsaed long doa blong haos* blong God, i stap prea, mo i stap krae, mo i stap talemaot ol sin blong ol laen* blong Isrel,* mo long taem ya, ol man, mo ol woman, mo ol pikinini oli kam hivap plante raon long hem, mo oli harem nogud, oli stap krae tumas.

2Nao Sekania we papa blong hem Jehiel, we i laen blong Elam, hem i talem long pris ya se, “Ol man ya blong yumi oli mekem i nogud long God blong yumi. Long fasin ya we oli tekem ol woman blong ol narafala kantri, oli tanem baksaed long hem. Be yumi ol laen blong Isrel, mo yumi bilif yet se hem bambae i save fogivim yumi, i tekemaot ol sin blong yumi.

3Naoia yumi mas mekem wan strong promes wetem hem, se ol man we oli tekem ol woman ya oli mas lego olgeta, wetem ol pikinini blong olgeta, oli mas sanem olgeta oli gobak long ples blong olgeta. Bambae mifala i mekem ol samting we yu wetem ol narafala man we i stap tinghevi long ol tok blong God, yufala i talem long mifala. Bambae yumi mas mekem ol samting we Loa* blong God i talem.

4Wok blong stretem trabol ya i stap long han blong yu. Yu gohed, yu stretem. Bambae mifala i sapotem yu.”

5Nao, pris ya Esra i girap, i mekem we ol lida blong ol pris, mo ol lida blong ol Livaet,* mo ol narafala lida blong olgeta oli mekem promes blong mekem olsem we man ya i talem.

6Nao pris ya i aot long ples ya afsaed long doa blong haos blong God, i go long rum blong Jehohanan, we papa blong hem Eliasib. Nao long naet ya, hem i stap long ples ya, i stap harem nogud from we God i tekem ol man ya oli kambak, be olgeta oli tanem baksaed long hem. Nao long naet ya, hem i no kakae mo i no dring wan samting.

7Nao ol lida ya oli sanem tok i go long olgeta ples long Jerusalem* mo long ol narafala ples long Juda,* se olgeta man we oli aot long Babilonia oli kambak, oli mas kam long wan miting long Jerusalem.

8Olgeta oli putum tri dei blong ol man oli save wokbaot blong kam long miting ya, mo oli talem se sipos man i no kam long taem ya, bambae ol lida oli tekemaot olting we hem i gat, mo bambae oli no moa save kaontem hem se i wan laen blong Isrel.

9Nao long tri dei ya, olgeta man we oli stap long tufala distrik ya Juda mo Benjamin* oli stap kamkamtru long Jerusalem. Mo long namba tri dei blong hem, we hemia namba naen manis, long namba twanti dei blong hem, oli kam wanples blong holem miting long bigfala open ples long yad blong haos blong God. Long taem ya i gat bigfala ren, mo ol man oli stap seksek from ren ya, mo from bigfala miting ya.

10Nao pris ya Esra i stanap, i tok long olgeta, i talem se, “!Olgeta! Yufala we i tekem ol woman blong ol narafala kantri, yufala i brekem tok blong Hae God ya. Fasin ya i mekem we laef blong yumi i no stret nating long fes blong hem.

11From samting ya, yufala i mas talemaot ol sin blong yufala long hem. Hem i God blong ol bubu blong yumi bifo, mo yufala i mas mekem ol samting we hem i wantem. Bambae yufala i no moa go joen wetem ol man blong ol narafala kantri we oli stap long ples blong yumi, yufala i mas lego olgeta. Mo yufala we i mared long ol hiten woman ya, yufala i mas lego olgeta.”

12Nao olgeta man ya oli singsingaot bigwan, oli talem se, “!I gud nomo! !Ol samting ya we yu yu talem, bambae mifala i mekem!”

13Mo oli gohed, oli talem se, “Be naoia bigfala ren ya, mo i gat plante man tumas long ples ya. Mifala i no save gohed blong stanap long open ples ya long bigfala ren olsem. Mo trabol ya, yumi no save stretem long wan dei no tu dei nomo, from we mifala plante i mekem sin ya.

14I gud ol haeman blong yumi nomo oli stap long Jerusalem, oli lukluk long trabol ya. Mo man we i tekem woman blong narafala kantri, bambae i tekem ol lida mo ol jaj blong taon blong hem oli kam long taem we yufala i putum, nao bambae oli fiksimap trabol blong hem. Long fasin ya, bambae God i no moa save kros long yumi from trabol ya, nao bambae i no panisim yumi.”

15Nao olgeta oli agri long tok ya. Be Jonatan we papa blong hem Asahel, mo Jasea we papa blong hem Tikvaha, tufala nomo i no agri long hem. Mo Mesulam wetem Sabetae we i wan Livaet, tufala ya tu i sapotem tufala ya.

16Nao olgeta man ya oli agri blong mekem olsem we ol lida ya oli talem, mo pris ya Esra i jusumaot ol hed blong ol famle blong olgeta, mo i raetemdaon nem blong olgeta. Nao long namba ten manis, long fas dei blong hem, oli mekem miting, mo oli stat blong lukluk long problem blong ol mared ya.

17Mo long tri manis nomo, long niuyia, long fas manis, long fas dei blong hem, oli finisim wok ya. Olgeta oli luklukgud long ol problem blong ol mared blong ol man ya we oli tekem woman blong narafala kantri.

Ol man we oli tekem ol hiten woman

18Nao ol man we oli tekem ol woman blong narafala kantri, nem blong olgeta i olsem. Long ol pris, i gat Mahasea, mo Eliesa, mo Jarib, mo Gedalia. Olgeta ya oli laen* blong Hae Pris* ya Josua we papa blong hem Jehosadak.

19Olgeta oli promes blong lego ol woman ya blong olgeta, mo from ol sin ya blong olgeta, oli tekem wan man sipsip, oli mekem sakrefaes long God.

20Mo i gat Hanani mo Sebadia we tufala i laen blong Hime.

21Mo i gat Mahasea, mo Elaeja, mo Semaea, mo Jehiel, mo Usia, we oli laen blong Harim.

22Mo i gat Elioenae, mo Mahasea, mo Ismael, mo Netanel, mo Josabad, mo Elasa, we oli laen blong Pasuru.

23Long ol Livaet,* i gat Josabad, mo Simei, mo Petahia, mo Juda, mo Eliesa, mo Kelaea we narafala nem blong hem Kelita.

24Mo i gat Eliasib we i man blong mekem kwaea long haos* blong God.

Mo i gat Salum, mo Telem, mo Uri, we oli man blong gad long haos blong God.

25Mo long ol narafala laen blong Isrel,* i gat Ramia, mo Jisia, mo Malkia, mo Miamin, mo Eleasara, mo Malkia, mo Benaea, we oli laen blong Paros.

26Mo i gat Matania, mo Sekaraea, mo Jehiel, mo Abdi, mo Jeremot, mo Elaeja, we oli laen blong Elam.

27Mo i gat Elioenae, mo Eliasib, mo Matania, mo Jeremot, mo Sabad, mo Asisa, we oli laen blong Satu.

28Mo i gat Jehohanan, mo Hanania, mo Sabae, mo Atlae, we oli laen blong Bebae.

29Mo i gat Mesulam, mo Maluk, mo Adaea, mo Jasub, mo Seal, mo Jeremot, we oli laen blong Bani.

30Mo i gat Adnaha, mo Kelal, mo Benaea, mo Mahasea, mo Matania, mo Bejalehel, mo Binui, mo Manase, we oli laen blong Pahatmoab.

31-32Mo i gat Eliesa, mo Jisia, mo Malkia, mo Semaea, mo Simeon, mo Benjamin, mo Maluk, mo Semaria, we oli laen blong Harim.

33Mo i gat Matenae, mo Matataha, mo Sabad, mo Elifelet, mo Jeremae, mo Manase, mo Simei, we oli laen blong Hasum.

34-37Mo i gat Mahadae, mo Amram, mo Huel, mo Benaea, mo Bedea, mo Keluhi, mo Vania, mo Meremot, mo Eliasib, mo Matania, mo Matenae, mo Jahasao, we oli laen blong Bani.

38-42Mo i gat Simei, mo Selemia, mo Natan, mo Adaea, mo Maknadebae, mo Sasae, mo Sarae, mo Asarel, mo Selemia, mo Semaria, mo Salum, mo Amaria, mo Josef, we oli laen blong Binui.

43Mo i gat Jehiel, mo Matitia, mo Sabad, mo Sebinaha, mo Jadae, mo Joel, mo Benaea, we oli laen blong Neboho.

44Olgeta man ya evriwan oli mared long woman blong narafala kantri, mo oli lego ol woman ya, oli sanem olgeta wetem ol pikinini blong olgeta oli gobak long ples blong olgeta.