Jajes 18 - Bislama Bible Revised 2012

Ol laen blong Dan oli tekemaot aedol ya we Maeka i wokem

1Nao long taem ya, ol laen* blong Isrel* oli no gat king blong olgeta yet. Mo ol laen blong Dan* oli stap lukaot ples we oli save holem i blong olgeta, blong oli stap long hem, from we oli no gat ples blong olgeta yet, olsem we ol narafala laen ya oli gat.

2Nao long taem ya, olgeta oli stap long tufala taon ya Jora mo Estaol, mo oli jusumaot faef strong man blong olgeta, mo oli sanem olgeta oli go blong lukluksave ol ples. Nao taem ol faef man ya oli go kasem haf blong distrik ya Efrem* we i ples blong hil, oli go stap long haos blong Maeka, mo oli slip long ples ya.

3Mo taem oli stap long ples ya, oli harem toktok blong pris* ya Jonatan we i laen blong Livae,* mo oli haremsave se fasin blong tok blong hem i fasin blong tok blong man Juda.* Nao oli go luk hem, oli askem long hem se, “?Ei, fren, yu kam long ples ya olsem wanem? ?Yu stap mekem wanem long ples ya? ?Yu stap wetem hu?”

4Mo hem i talem se, “Mi mi stap long han blong olfala ya, mo hem i stap pem mi blong mi pris blong hem.”

5Nao oli talem long hem se, “Plis, mifala i wantem blong yu faenemaot long God se rod blong mifala bambae i gud no i nogud.”

6Mo hem i talem se, “Yufala i no wari. Hae God i stap lukaot gud long yufala long rod blong yufala.”

7Nao ol faef man ya oli aot, oli go long taon ya Laes longwe long not, mo oli luk we ol man blong taon ya oli stap gud nomo, olsem ol man Saedon. Olgeta oli kwaet man. Oli no stap faet, oli stap gud nomo, mo neva oli mekem trabol long narafala man. Mo long ples ya blong olgeta, oli gat evri samting we oli wantem. Taon ya Saedon i longwe lelebet long ples blong olgeta, mo olgeta oli no stap miksap wetem ol narafala man raonabaot long olgeta.

8Taem olgeta ya oli kambak long Jora mo Estaol, ol man oli askem long olgeta se, “?Yufala i wokbaot, yufala i luk olsem wanem? ?Yufala i faenem wan gudfala ples blong yumi?”

9Mo olgeta oli talem se, “Yes, mifala i luk we graon blong olgeta ya long Laes i gudfala tumas. Bambae yumi mas go long ples ya. Bambae yumi go mekem faet long olgeta. I nogud yumi tektaem, yumi mas hareap. Yumi mas go tekemaot ples ya long olgeta.

10Taem yumi go long ples ya, bambae yufala i luk we ol man blong hem oli no tingbaot faet nating. Hem i wan bigfala ples, mo i gat evri samting we bambae yumi wantem. Mo God i givim ples ya long yumi finis.”

11Nao ol laen blong Dan oli aot long Jora mo Estaol oli go, we sikis handred man long olgeta oli mekemrere blong faet.

12Long naet, oli putumap ol haos tapolen blong olgeta long distrik ya Juda, klosap long Kiriatsearim, saed i go long wes, mo oli slip long ples ya. Mo biaen, ol man oli putum nem blong ples ya se “Ples we ol laen blong Dan oli stap long hem bifo”.

13Nao oli aot long ples ya bakegen, oli gotru long ples blong Maeka, long haf blong distrik ya Efrem we i ples blong hil.

14Nao ol faef man ya we oli go lukluksave taon ya Laes, oli talem long ol fren blong olgeta se, “E, olgeta. Long haos blong wan man long ples ya, i gat wan aedol i stap we oli katem long wud, mo oli blokem long silva, mo oli stap yusum blong mekem wosip long Hae God. Mo i gat wan efod* wetem ol narafala aedol tu oli stap. !I gud yumi go tekemaot ol samting ya!”

15Nao olgeta faef ya oli go long haos blong Maeka, we pris ya i stap long hem, mo oli talem long hem se, “?E, fren, olsem wanem? ?Yu oraet?”

16Nao ol soldia ya oli stap stanap nomo afsaed long get,

17mo pris ya i kam stap stori wetem olgeta. Nao wantaem nomo, ol faef man ya oli go insaed long haos ya, oli karemaot aedol ya wetem efod mo ol narafala aedol tu.

18Nao taem olgeta oli kam afsaed bakegen wetem ol samting ya, pris i askem long olgeta se, “!Ei! ?Yufala i mekem wanem ya?”

19Be oli talem long hem se, “No, fren, yu no tok. Yu stap kwaet. I moa gud yu kam joen wetem mifala, yu pris blong mifala. Bambae yu stap talemaot rod long mifala, blong mifala i folem. Ating i moa gud blong yu kam pris blong olgeta laen blong wan pikinini blong Isrel ya bifo, i winim we yu stap pris blong wan famle nomo.”

20Tok ya i mekem pris ya i harem gud tumas, nao hem i girap, i karem ol tabu samting ya, i go wetem olgeta.

21Nao olgeta oli aot long ples ya bakegen, oli wokbaot i go, we ol woman blong olgeta wetem ol pikinini blong olgeta mo ol anamol blong olgeta mo olting blong olgeta oli stap go fastaem, ol soldia ya oli stap wokbaot biaen long olgeta.

22Nao taem olgeta oli go longwe lelebet finis, Maeka i faenemaot we olgeta oli stilim ol samting ya, nao hem i singaot ol fren blong hem raonabaot blong oli go mekem faet long olgeta. Mo taem oli go klosap long olgeta,

23oli singaot long olgeta. Be olgeta ya oli tanemraon, oli talem se, “?Wanem? ?From wanem yufala i stap kam biaen long mifala olsem?”

24Nao Maeka i talem se, “?Weswe yufala i tok olsem? Yufala i kam stilim pris blong mi mo ol god ya blong mi we mi mi wokem, nao mi mi no moa gat wan samting nating i stap. ?From wanem ya?”

25Be oli talem se, “!A, sarap yu! !Yu no tok! Sipos mifala i kros naoia, bambae mifala i kam flatem yufala. Bambae mifala i kilim yu wetem ol famle blong yu, yufala evriwan i ded.”

26Nao olgeta oli wokbaot i go, mo Maeka i luk we olgeta ya oli strong tumas winim hem, nao hem wetem ol fren blong hem oli tanemraon bakegen, oli gobak.

27-28Biaen long ol samting ya, ol laen ya blong Dan oli go blong mekem faet long ol man Laes. Taon ya Laes, hem i stap klosap long narafala taon ya Betrehob, long wan bigfala levelples daon, long medel blong ol hil, mo ol man blong hem oli kwaet man we oli no stap faet, oli stap gud nomo. Nao olgeta ya oli go kilim olgeta man blong taon ya, mo oli bonem taon blong olgeta. Mo i no gat man i save givhan long olgeta, from we Saedon i stap longwe tumas long olgeta, mo oli no stap miksap tu wetem ol narafala man raonabaot. Nao ol laen ya blong Dan oli wokemgud taon ya bakegen mo oli stap long hem.

29Mo oli jenisim nem blong hem, oli putum niufala nem blong hem se Dan, we i nem blong olfala bubu blong olgeta bifo, we hem i wan stret pikinini blong Jekob.*

30Nao olgeta ya oli stanemap aedol ya we oli tekem i kam, mo oli stap yusum blong mekem wosip long Hae God. Mo pris ya Jonatan we i kam wetem olgeta, hem i kam pris blong olgeta. Mo olgeta we oli stap kamaot biaen long hem oli stap holem wok ya, gogo kasem we ol enemi blong olgeta oli kam tekemaot olgeta oli go stap wok slef* long narafala kantri longwe.

31Nao oltaem, long taem ya we ol laen blong Isrel oli stap go mekem wosip long Hae God long haos* blong hem long Silo, be aedol ya we Maeka i wokem i stap nomo long ples ya, mo olgeta ya oli stap mekem wosip long hem.