Ol Krae 3 - Bislama Bible Revised 2012

Wan man Jerusalem i harem nogud, be i bilif strong se Hae God bambae i sore long olgeta

1Mi mi savegud panis

we Hae God i save givim,

taem we kros blong hem i kam bigwan.

2Hem i ronemaot mi mi gowe long delaet,

mi go stap long ples

we i tudak we i tudak olgeta,

3mo oltaem hem i stap kilim mi,

i stat long moning gogo kasem tudak,

we i no gat sore long mi nating.

4Hem i brebrekem skin blong mi,

i mekem mit blong mi i stap afsaed nomo,

mo i brekem ol bun blong mi.

5Hem i mekem i strong tumas long mi,

nao mi stap harem nogud tumas

olsem we mi stap long kalabus

we i nogud we i nogud.

6Hem i mekem mi mi stap long tudak,

olsem man we i ded bifo olgeta.

7Hem i blokemgud mi,

mo i fasem mi long ol jen we i hevi,

nao mi mi no save ronwe.

8Nating we mi stap prea long hem

blong i givhan long mi,

be hem i no wantem lesin long krae blong mi.

9Long olgeta ples we mi mi go,

hem i stap blokem mi long ol stonwol,

mo i mekem rod blong mi i paspas.

10Hem i stap wet long mi,

olsem anamol ya bea we i stap wet

blong kasem kakae blong hem,

mo i olsem laeon we i stap haed

blong holem kakae blong hem.

11Hem i ronem mi mi gowe long rod,

nao i holem mi,

i terem mi long ol smosmol pis,

mo i livim mi mi stap mi wan.

12Hem i pulum bonara blong hem,

nao i makem mi long hem,

olsem we mi mi wan mak

we hem i stap sutum

long ol ara blong hem.

13Hem i sutum mi long ol ara blong hem,

mo oli go insaed olgeta

long bodi blong mi.

14Mi mi kam wan samting blong laf nomo,

ol man oli stap laf nogud long mi,

i stat long moning gogo kasem tudak.

15Hem i mekem mi mi harem nogud nomo,

nao samting ya i kam olsem kakae blong mi

mo wota blong mi.

16Hem i holem mi, i pusum mi mi godaon,

mo i ravem fes blong mi long graon,

nao ol tut blong mi oli brobrok long ston.

17Fastaem mi mi stap gud, mi no sik,

mo mi glad oltaem nomo,

be Hae God i tekemaot ol samting ya long mi,

nao mi fogetemgud olgeta.

18Laef blong mi i kam sotwan we i sotwan.

Mi no moa save luk long Hae God

blong i givhan long mi.

19Taem mi tingting long ol trabol ya blong mi

we mi stap harem nogud,

mo we mi no gat hom blong mi,

mi harem olsem we mi dring posen.

20Oltaem mi stap tingbaot samting ya,

nao tingting blong mi i foldaon.

21Be mi tingbaot wan samting,

nao i leftemap tingting blong mi bakegen.

22Mi mi tingbaot fasin blong Hae God,

we oltaem,

hem i gat sore long man,

mo i lavem man tumas.

Tufala fasin ya blong hem

bambae i no save finis samtaem,

23tufala i niuwan oltaem nomo,

olsem we evri moning,

niufala dei i kamtru.

Hae God i stap sem mak nomo olwe,

hem i no save jenis.

24Mo hem nomo i stap givim laef long mi,

nao from samting ya, mi mi putum

tingting blong mi i stap strong long hem bakegen.

25Hae God i gud tumas long olgeta

we oli stap trastem hem,

mo we oli wantem tumas blong savegud hem.

26Taswe yumi mas gat longfala tingting,

yumi mas stap kwaet,

mo yumi wet long hem

blong hem i sevem yumi.

27Mo i stat taem we yumi smol,

yumi mas lanem fasin ya

blong mekem tingting blong yumi i longfala.

28Sipos man i harem nogud,

i gud hem i stap hem wan,

i stap kwaet,

mo i mekem tingting blong hem i longfala.

29I gud hem i mekem tingting blong hem i stap daon,

from we maet hem i save win yet.

30Sipos ol man oli kilim hem,

mo oli tok nogud long hem,

be i gud hem i glad nomo

long ol samting ya.

31Masta* blong yumi,

hem i gat sore long yumi,

mo hem i no save tanem baksaed

olwe long yumi.

32Hem i save mekem yumi harem nogud,

be hem i gat sore long yumi,

from we hem i lavem yumi,

mo fasin ya blong hem i no save jenis.

33Hem i no glad nating

blong mekem we yumi stap long trabol,

yumi stap harem nogud.

34God i hae we i hae,

mo taem yumi stap long kalabus,

mo tingting blong yumi i foldaon olgeta,

be hem i save samting ya.

35Mo taem ol man oli tekemaot ol raet blong yumi

we hem nomo i givim long yumi,

be hem i save.

36Mo taem jaj i no folem stret fasin

blong jajem yumi long kot,

be hem i save samting ya tu.

Mo olgeta samting ya,

hem i no glad nating long olgeta.

37Oltaem Masta ya blong yumi

i stap mekem we ol samting

we hem nomo i wantem oli kamtru.

38Ol gudfala samting wetem ol rabis fasin,

oli stap kamaot long tok blong hem nomo.

39Sipos yumi kasem panis from ol sin blong yumi,

be i nogud yumi stap toktok tumas from.

40I gud yumi lukluk gud long ol fasin blong yumi,

nao yumi kambak long Hae God.

41Hem i stap long heven,

mo i gud yumi leftemap han blong yumi,

yumi prea long hem.

I gud yumi talemaot olgeta tingting

blong yumi long hem se,

42“Hae God,

mifala i mekem sin,

mifala i girap mifala i agens long yu,

mo yu yu no fogivim mifala.

43“Yu yu kros tumas,

nao mifala i no moa luk fasin ya blong yu

we yu yu gat sore long man.

Yu girap yu ronem mifala,

mo yu kilim mifala

we yu no gat sore long mifala nating.

44Kros ya blong yu i strong tumas,

i olsem klaod we i tik tumas,

nao ol prea blong mifala

i no save gotru long hem.

45Yu yu mekem mifala i kam olsem hif blong doti

long fes blong olgeta man long wol.

46“Ol enemi blong mifala

oli stap jikim mifala,

mo oli stap tok nogud tumas long mifala.

47Mifala i kasem plante trabol

we klosap mifala i ded from.

Laef blong mifala i kam nogud olgeta,

mo oltaem mifala i stap fraet tumas.

48“Mi mi stap krae from ol man ples blong mi

we yu yu kilim olgeta oli ded,

mo wota blong ae blong mi

i stap ron olsem reva.

49“Wota blong ae blong mi bambae i ron bigwan,

olsem wota we i stap ron oltaem,

i no save spel.

50Hae God, yu yu stap long heven,

mo oltaem bambae mi stap krae i go long yu

gogo kasem we yu yu luk i kam long mifala.

51Taem mi luk ol samting ya

we i kasem ol woman blong taon ya,

mi mi harem nogud tumas.

52“Ol enemi oli kam holem mi

olsem we oli kasem pijin long trap,

be blong nating nomo.

53Oli sakem mi long wan hol,

we mi mi laef nomo,

nao oli satem maot blong hol ya long ston.

54Mo wota i stat kavremap mi,

nao mi ting se bambae mi mi ded.

55“Hae God,

hol ya i godaon we i godaon olgeta,

mo taem mi stap long hem,

mi krae i kam long yu.

56Mi prea long yu

blong yu lesin long krae blong mi,

nao yu yu harem mi,

57yu kam klosap long mi,

yu talem se, ‘Yu no fraet.’

58“Masta blong mi, yu yu kam,

nao yu sevem laef blong mi.

59Yu yu savegud ol fasin nogud ya

we ol man oli stap mekem agens long mi.

Be naoia, plis yu stretem trabol ya

yu soemaot we mi mi stret.

60Yu yu save we ol enemi blong mi

oli no laekem mi nating,

oli agens long mi,

mo yu savegud ol plan blong olgeta

we oli stap mekem agens long mi.

61“Hae God,

yu yu harem we oli tok nogud long mi.

Yu savegud olgeta plan ya

we oli mekem agens long mi.

62Oli stap tokbaot mi,

mo oli stap mekem ol plan ya blong olgeta,

i stat long moning gogo kasem tudak.

63Oltaem nomo,

oli stap laf nogud long mi.

64“Hae God,

plis yu panisim olgeta

from ol samting ya we oli mekem.

65Plis yu singaot* trabol i kam long olgeta,

mo yu mekem tingting blong olgeta i foldaon.

66I gud yu kros long olgeta,

yu ronemaot olgeta.

Yu flatemgud olgeta

blong oli finis olgeta long wol ya.”