Aesea 43 - Bislama Bible Revised 2012

Hae God i promes se bambae hem i sevem ol man blong hem

1Bakegen, profet i talem long ol man blong hem se,

“Olgeta.

Yumi ol laen* blong Isrel.*

Hae God i mekem yumi,

mo hem i talem long yumi se,

‘!Yufala i no mas fraet!

Mi mi sevem yufala finis,

mi mekem yufala i fri.

Mi stap singaot yufala

long nem blong yufala.

Yufala i man blong mi.

2Sipos yufala i gotru long dip solwota,

mi bambae mi stap wetem yufala,

mo sipos yufala i gotru long wota we i ron bigwan,

trabol bambae i no save kasem yufala,

mo sipos yufala i pastru long faea,

faea bambae i no save kakae yufala.

Ol strong samting olsem

oli save traem yufala,

be bambae oli no save spolem yufala.

3Mi mi talem olsem,

from we mi mi Hae God,

mi God blong yufala.

Mi mi tabu,

fasin blong mi i stret olgeta,

mo mi mi stap sevem yufala.

Mi bambae mi lego ol man Ijip

i go long han blong ol man Pesia

we oli stap holem yufala,

blong mekem yufala i fri.

Bambae mi lego ol man Itiopia

wetem ol man Seba,

i go long han blong olgeta ya,

blong sevem yufala.

4Mi mi rere blong lego ol man

blong plante narafala kantri

i go long han blong olgeta ya,

blong mi save sevem yufala,

from we mi mi tinghevi tumas long yufala,

mi lavem yufala, mo mi wantem leftemap nem blong yufala.

5!Yufala i no fraet!

!Mi mi stap wetem yufala!

Nating we sam long yufala

oli go stap longwe tumas

long saed i go long is,

no long saed i go long wes,

be mi bambae mi tekemaot olgeta,

mi karem olgeta i kamhom.

6Mo bambae mi talem long olgeta

long saed i go long not se,

“Yufala i lego ol pikinini ya blong mi,”

mo bambae mi talem long olgeta

long saed i go long saot se,

“Yufala i no holemtaet olgeta.”

Bambae mi talem se

“Nating we ol pikinini ya blong mi

oli stap olbaot long wol ya,

long ol kantri we oli longwe tumas,

be yufala i mas letem olgeta oli kamhom.

7Olgeta oli man blong mi nomo,

nem blong mi i stap long olgeta.

Mi mi mekem olgeta

blong oli stap leftemap nem blong mi.” ’ ”

Ol laen blong Isrel oli witnes blong Hae God

8Bakegen, profet i talemaot long ol man blong hem we Hae God i talem se,

“Olgeta.

Yufala i singaot

ol man blong mi oli kam long kot.

!Olgeta oli gat ae,

be ae blong olgeta i blaen!

!Olgeta oli gat sora,

be sora blong olgeta i fas!

9Mo yufala i singaot

ol man blong ol narafala kantri tu

oli kam joen.

?Hu long ol god blong olgeta

i save talemaot ol samting

we bambae oli kamtru?

?Hu long ol narafala god ya

i talemaot finis ol samting ya

we oli stap kamtru naoia?

I gud ol narafala god ya

oli tekem ol witnes blong olgeta,

blong mekem i klia

we ol poen blong olgeta i stret,

mo blong soemaot we tok blong olgeta i tru.

10“!Ol laen* blong Isrel*!

Yufala i witnes blong mi.

Mi mi jusumaot yufala

blong yufala i man blong wok blong mi,

blong bambae yufala i savegud mi,

mo blong yufala i save bilif long mi,

mo blong yufala i savegud we mi nomo mi God.

I no gat narafala god i stap.

Kam kasem naoia,

neva i gat narafala god i stap,

mo long fiuja,

bambae i no gat narafala god bakegen samtaem.

11“Mi nomo mi Hae God,

mi nomo mi save sevem yufala.

12Fastaem, bifo finis,

mi mi talemaot long yufala

ol samting ya

we oli kam kasem yufala,

mo biaen,

mi mi kam givhan long yufala.

I no gat wan long ol narafala god ya

we i mekem fasin ya samtaem.

Mo yufala i witnes blong mi,

se tok ya blong mi i tru.

13Mi nao mi God,

mo bambae mi no save lus samtaem,

bambae mi stap olwe nomo.

I no gat man i save ronwe

long paoa blong mi,

mo i no gat man i save jenisim

ol samting we mi mi mekem.”

Ol man blong Hae God bambae oli aot long han blong ol man Babilon bakegen

14Bakegen, profet i talem long ol man blong hem se,

“Olgeta.

Yumi ol laen* blong Isrel,*

mo God blong yumi,

hem i tabu we i tabu,*

fasin blong hem i stret olgeta.

Nem blong hem, Hae God,

mo hem i pemaot yumi,

blong yumi save fri.

Hem nao i talem long yumi se,

‘Olgeta.

From we mi wantem sevem yufala,

bambae mi mi sanem ol soldia

oli go mekem faet long ol man blong taon ya Babilon.

Bambae mi mi brekemdaon ol doa*

blong bigfala stonwol blong taon ya,

nao ol man blong hem

bambae oli no moa save glad

we oli stap singsingaot from,

bambae oli stap krae bigwan nomo.

15Mi mi Hae God,

mi God blong yufala,

mo mi mi tabu,

fasin blong mi i stret olgeta.

Mi mi mekem yufala,

mo mi mi King blong yufala.’ ”

16Bakegen, profet i talem se,

“Bifo, longtaem,

Hae God i mekem wan rod

we i pastru long medel blong solwota

we i stap muvmuv olbaot.

17Hem i wokbaot fastaem long rod ya,

i pas i go,

nao fulap enemi oli biaen long hem,

be olgeta ya oli go lus nomo.

Fulap kat blong faet oli biaen long hem,

be olgeta oli foldaon evriwan,

we neva oli save girap bakegen.

Olgeta oli ded wantaem nomo,

olsem laet we man i blu long hem.

18“Be Hae God i talem long yumi se,

‘I nogud yufala i stap tingbaot

ol samting ya we oli kamtru bifo finis.

I nogud yufala i stap putum

tingting blong yufala i stap strong

long ol samting ya.

19Yufala i mas rere blong luk

wan niufala samting

we mi bambae mi mekem.

Samting ya i stap kamtru nao,

mo yufala i save luk naoia.

Bambae mi mi mekem wan big rod

i pastru long draeples,

mo bambae i gat ol smosmol reva

oli pas olbaot long ples ya.

20Mo long ples ya,

ol wael anamol bambae oli save ona long mi.

Ol wael dog ya jakol*

wetem ol bigfala pijin ya ostrij,*

bambae oli save presem mi.

Bambae oli mekem olsem,

from we mi bambae mi mekem

ol reva oli ron long ples ya

we i drae tumas,

blong ol man ya blong mi

we mi mi jusumaot olgeta,

bambae oli gat wota blong dring.

21Ol man ya blong mi,

hemia ol man we mi mi mekem olgeta

blong oli kam man blong mi,

mo olgeta ya,

bambae oli save singsing

blong presem nem blong mi.’ ”

Ol fasin nogud we ol man blong Hae God oli mekem

22Bakegen, profet i talemaot tok blong Hae God long ol man blong hem. Tok ya i blong wekemap ol laen* blong Isrel,* mo profet i talemaot we Hae God i talem se,

“Olgeta.

!Mi mi luk se yufala i no wantem singaot mi,

yufala i taed finis long mi!

Naoia yufala i no moa wantem mekem wosip long mi.

23Yufala i no moa stap kilim ol sipsip

blong bonem blong mekem sakrefaes long mi,

mo yufala i no moa stap mekem sakrefaes

blong ona long nem blong mi.

Be mi mi no mekem i hevi long yufala.

Mi no stap talem long yufala,

se yufala i mas tekem ol kakae i kam

blong mekem sakrefaes long mi.

Yufala i taed gud long mi,

be mi no talem long yufala,

se yufala i mas tekem insens* i kam

blong bonem blong mekem wosip long mi.

24Mo mi luk

se yufala i no moa wantem pem insens,

blong yufala i save bonem

blong mekem wosip long mi.

Mo yufala i no moa stap bonem gris

blong anamol

blong mekem ol sakrefaes ya

we mi save harem gud long hem.

Yufala i girap,

yufala i stap mekem i hevi long mi,

we yufala i stap mekem ol fasin nogud.

Yufala i stap mekem

mi mi taed gud long yufala,

we yufala i stap mekem

ol fasin we i no stret nating.

25Be mi mi Hae God, mi God blong yufala,

mo mi stap fogivim yufala,

mi stap tekemaot ol sin blong yufala.

Bambae mi no moa save tingbaot

ol sin blong yufala bakegen.

26“Be i gud yufala i kam,

yumi mekem kot.

Bambae yufala i save talemaot ol poen blong yufala,

mo yufala i save talem ol tok blong yufala

blong traem soemaot we yufala i stret.

27Olfala stamba ya blong yufala bifo olgeta,

hem i mekem sin agens long mi.

Mo biaen, ol lida blong yufala

oli stap mekem sin agens long mi.

28Nao from ol samting ya,

nating we yufala i laen blong Isrel,

be mi bambae mi spolemgud ol haeman blong yufala,

we oli stap lukaot long tabu ples blong mi,

mo bambae mi tekem ol enemi blong yufala

oli kam spolem yufala,

mo bambae mi letem ol narafala man oli mekem yufala i sem tumas.”