Namba 8 - Bislama Bible Revised 2012

1 Eks 25.31-40; 37.17-24 Long taem ya, Hae God i givim tok blong hem long hem,

2blong i go talemaot long Hae Pris Eron. Hem i talem se, “Moses. Taem hae pris ya i kam putum ol seven smol laet ya i stap long spesel ples blong olgeta insaed long Haos Tapolen blong mi, bambae hem i mas tanem olgeta oli saen i kam long fran.”

3Nao hae pris ya i stap mekem olsem we Hae God i talem. Oltaem hem i stap putum ol laet ya oli stap saen i kam long fran.

4Mo Ples ya blong Putum ol Laet, taem ol man oli wokem, oli hamarem long wan pis gol nomo, i stat long botom blong hem, i go kasem top blong hem, folem plan blong hem we Hae God i soem long Moses fastaem.

Moses i mekem ol Livaet oli klin long fes blong Hae God

5Nao Hae God i talem long Moses se,

6“Moses. Ol Livaet* ya, bambae yu tekemaot olgeta long ol narafala laen* blong Isrel,* yu mekem olgeta oli klin long fes blong mi. Rod blong mekem samting ya i olsem.

7Yu mas tekem wota ya we i blong mekem ol samting i klin long fes blong mi, yu mas saksakem i go long olgeta. Mo yu mas talem long olgeta blong oli go sevemaot olgeta hea blong olgeta, i stat long hed blong olgeta, i go kasem leg blong olgeta daon, mo blong oli go wasem ol klos blong olgeta. Nao bambae olgeta oli klin long fes blong mi.

8Nao oli mas tekem wan yang bul wetem ol kakae blong garen* olsem we Loa i talem blong mekem sakrefaes ya we i blong bonem i bon evriwan blong mekem wosip long mi. Hemia flaoa we oli tantanem wetem olifoel.* Mo bambae yu yu mas tekem wan bul bakegen we i blong mekem spesel sakrefaes ya blong tekemaot sin.

9Nao yu mas tekem olgeta laen blong Isrel oli kam wanples, mo bambae yu putum ol Livaet ya oli stanap long fran blong Haos Tapolen blong mi.

10Nao ol laen ya blong Isrel oli mas kam putum han blong olgeta long hed blong ol Livaet ya,

11mo Hae Pris Eron i mas mekem prea blong makemaot olgeta se oli tabu, oli man blong mi. Olgeta ya oli kamaot long yufala evriwan, mo yufala i givim olgeta i kam long mi blong oli mekem wok blong mi.

12Nao olgeta oli mas putum han blong olgeta long hed blong tufala bul ya, mo hae pris i mas tekem wan long tufala, i mekem spesel sakrefaes long hem blong tekemaot sin. Mo narawan, hem i mas mekem sakrefaes ya long hem we i blong bonem i bon evriwan blong mekem wosip long mi. Hemia nao rod we bambae yu mas folem blong mekem olgeta oli klin long fes blong mi.

13“Long fasin ya, bambae yu yu mekem olgeta ya oli tabu, oli blong mi. Olgeta ya i wan spesel presen we yufala i givim i kam long mi, mo bambae yu mas putum olgeta oli stap wok aninit long hae pris ya wetem tufala pikinini ya blong hem, blong oli stap givhan long trifala.

14Yu mas tekemaot olgeta oli no moa stap wetem yufala, blong bambae oli kam spesel man blong mi.

15Mo taem yu mekem olgeta oli klin long fes blong mi, mo yu mekem prea long olgeta blong mekem olgeta oli tabu, oli spesel man blong mi, bambae oli save kam mekem wok blong mi long Haos Tapolen blong mi.

16Mi mi talemaot finis long yufala we olgeta ya oli blong tekem ples blong olgeta fasbon pikinini boe blong yufala evriwan, mo oli tabu, oli blong mi nomo.

17Eks 13.2Bifo, long taem ya we mi mi kilim olgeta fasbon pikinini boe blong ol man Ijip, mi mekem we olgeta fasbon pikinini boe blong yufala wetem olgeta fasbon pikinini man blong ol anamol blong yufala oli tabu, oli blong mi.

18Be naoia, mi mi tekem ol Livaet, blong oli tekem ples blong ol pikinini ya,

19mo mi putum olgeta oli stap aninit long hae pris ya wetem tufala pikinini ya blong hem, blong givhan long trifala. Olgeta oli wan spesel presen we yufala i givim i kam long mi blong mekem ol wok long nem blong yufala long Haos Tapolen blong mi, mo blong blokem yufala evriwan, blong trabol i no kasem yufala. Haos Tapolen blong mi i tabu, mo sipos wan man blong narafala laen i kam klosap tumas long hem, bambae hem i ded from.”

20-22Nao Moses mo Hae Pris Eron, wetem olgeta laen blong Isrel oli mekem olsem we Hae God i talem. Fastaem, ol Livaet ya oli wasem ol klos blong olgeta, mo oli mekem olgeta oli klin long fes blong Hae God, nao hae pris i mekem prea blong mekem olgeta oli tabu, oli blong Hae God, mo i mekem ol sakrefaes ya tu blong mekem olgeta oli klin long fes blong hem. Olgeta ya i wan spesel presen we ol narafala laen blong Isrel oli givim i go long Hae God, mo ol narafala laen ya oli mekem olgeta samting long olgeta olsem we Hae God i talem. Mo long fasin ya, olgeta oli mekem ol Livaet ya oli gat raet blong mekem ol wok blong Haos Tapolen blong Hae God. Olgeta oli kam man blong givhan long pris, mo oli stap wok aninit long hae pris ya wetem tufala pikinini blong hem.

23Nao Hae God i talem long Moses se,

24“Ol Livaet we yia blong olgeta i kasem twanti faef i go antap oli mas mekem ol wok blong Haos Tapolen blong mi,

25gogo kasem we oli gat fifti yia blong olgeta, nao bambae oli mas ritae.

26Nao sipos man i ritae, bambae hem i save givhan nomo long ol narafala fren blong hem long ol wok long Haos ya, be hem i no save mekem wok hem wan. Hemia nao rod we bambae yu mas folem blong lukaot long olgeta ya.”