Sam 75 - Bislama Bible Revised 2012

God bambae i jajem ol man(Sing ya, Asaf i wokem.)(Tok i go long God.)

1God,

mifala i talem tangkiu long yu,

mifala i talem tangkiu tumas long yu.

Mifala i stap talemaot

we yu yu hae we yu hae,

mo mifala i stap tokbaot

ol gudgudfala samting we yu yu mekem.

(Tok i go long ol man.)

2God i talem se,

“Mi mi putum taem finis

blong jajem ol man,

mo bambae mi jajem olgeta

long stret fasin.

3Nating we evri samting we i laef

bambae oli seksek,

mo graon bambae i muf,

be bambae mi mi holem fandesen blong wol ya

i stap strong.

4Naoia mi mi talem long ol man nogud,

se oli no moa praod,

5mo mi talem stret long olgeta,

se oli no moa tok flas.”

6Fasin blong jajem man

i no save kamaot long is mo long wes,

mo long not mo long saot,

7God nomo bambae i jajem ol man.

Hem bambae i talemaot

we sam man bambae oli panis,

mo sam bambae oli no panis.

8Hae God i stap holem wan kap

we i fulap gud long waen we i strong,

we i blong spolemgud olgeta,

we hemia i pija blong soemaot we hem i kros.

Hem bambae i kafsaedem waen ya,

nao olgeta man nogud bambae oli dring

gogo oli finisimgud.

9Be mi bambae mi stap tokbaot

God ya blong Jekob* oltaem nomo,

gogo i no save finis.

Bambae mi stap sing blong presem hem.

10Hem bambae i brekem paoa

blong ol man nogud,

be ol stret man,

bambae hem i mekem olgeta

oli gat paoa moa.