Nehemaea 6 - Bislama Bible Revised 2012

Ol enemi oli wantem kilim Nehemaea

1-2Nao Nehemaea i gohed, i talem se, “Mifala i finisimgud stonwol ya, we i no moa gat hol i stap we mifala i no blokem, ol doa* blong hem nomo i stap we mifala i no hangem olgeta yet. Nao taem Sanbalat wetem Tobia, mo man Arebia ya Gesem, mo ol enemi ya blong mifala oli harem nius blong samting ya, Sanbalat wetem Gesem, tufala i sanem tok i kam long mi, tufala i talem se, ‘Plis yu kam luk mitufala long wan long ol vilej longwe long bigfala levelples ya Ono.’ Be tufala i wantem trikim mi nomo blong spolem mi.

3Nao mi sanem sam man i go blong talem long tufala se, ‘Mi mi stap mekem wan bigfala wok, mo mi no save livim wok ya blong godaon long ples ya. Mi no save livim wok ya i stap, blong go nomo blong luk yutufala.’

4“Mo sem tok ya, tufala i stap sanem i kam fo taem long mi, be evri taem, mi mi stap sanem sem ansa nomo i gobak long tufala.

5“Nao Sanbalat i raetem wan leta, mo i no fasem, i livim i open blong man we i karem i save luk, mo hem i sanem wan man blong wok blong hem i karem i kam long mi. Hemia namba faef tok we hem i sanem i kam long mi,

6mo leta ya i talem se,

‘Mi Sanbalat, mi harem wan nius long Gesem. Hem i talem se i gat wan tok i stap goraon long ol man blong provins ya, se yufala ol laen* blong Isrel*, yufala i stap wokem stonwol ya bakegen, from we yufala i wantem girap agens long king blong Pesia. Hem i talem tu, se yu yu stap mekem plan blong kam king,

7mo yu tok rere finis long ol profet, blong bambae oli talemaot long Jerusalem*, se yu yu king blong ples ya Juda.* Nius ya, king blong Pesia bambae i mas harem, mo from samting ya, mi ting se i gud yu kam luk mi, blong yumitufala i tokbaot samting ya.’

8“Nao mi sanem ansa blong tok ya, mi talem se, ‘!Sanbalat! !Tok ya we yu yu talem, hem i no tru nating! !Yu nomo yu stap mekem tok ya!’

9“Olgeta ya oli stap traem blong mekem mifala i fraet, blong mifala i no moa gohed blong finisim wok ya. Nao mi mi prea, mi talem se, ‘God, plis yu mekem mi mi strong.’

10“Mo biaen, mi go luk Semaea we papa blong hem Delaea mo bubu blong hem Mehetabel. Long taem ya, Semaea i sik, i stap nomo long haos. Nao hem i talem long mi se, ‘Bambae yumitufala i go haed insaed long Rum ya we i Tabu, long haos* blong God, yumitufala i lokem doa, from we olgeta ya oli wantem kam kilim yu. Wan naet bambae oli kam kilim yu yu ded ya.’

11“Be mi talem long hem se, ‘Mi mi no man blong ronwe blong go haed. ?Yu ting se mi save go haed long haos blong God blong sevem laef blong mi? !Mi mi no save mekem samting ya!’

12“Nao taem mi tingting gud long samting ya, mi luksave we God i no talem samting ya long hem. Tobia mo Sanbalat, tufala ya nomo i pem hem blong talem tok ya long mi, blong mekem mi mi fraet.

13Tufala i mekem olsem, blong mekem mi mi brekem loa blong God, nao long fasin ya, bambae tufala i save spolem nem blong mi blong mekem ol man oli lukluk nogud long mi.

14“Nao mi mi prea, mi talem se, ‘God. Plis yu no fogetem ol samting ya we tufala ya i mekem agens long mi. Bambae yu mas panisim tufala from. Mo ol samting ya we woman profet ya Noadia wetem ol narafala profet oli mekem blong mekem mi mi fraet, yu no fogetem ol samting ya tu.’ ”

Wok blong stonwol i finis

15Nao Nehemaea i talem se, “Olgeta wok blong bigfala stonwol ya i finis long manis ya Elul*, long namba twanti faef, mo mifala i wok fifti tu dei long hem.

16Mo taem ol enemi blong mifala long provins ya oli harem we stonwol ya i finis, oli fraet mo oli sem tumas, from we olgeta evriwan oli luksave se God blong yumi i stap givhan long mifala blong mekem wok ya, gogo i finis.

17-19“Long olgeta taem ya, plante man Juda* oli stap saed wetem Tobia, from we hem i tekem dota blong Sekania, wan man Juda, we papa blong hem Araha. Mo narafala risen, pikinini blong Tobia, we nem blong hem Jehohanan, hem i tekem dota blong Mesulam, we papa blong hem Berekia. Mo taem mi stap wetem ol man ya, olgeta oli stap tokbaot ol gudfala samting we Tobia i mekem, mo taem oli go luk hem, oli talemaot evri samting long hem we mi mi talem. Mo ol lida long Juda oli stap raetem ol leta i go long hem, mo hem tu i stap raet i kambak long olgeta. Mo oltaem hem i stap raetem leta i kam long mi blong mekem mi mi fraet.