Aesea 45 - Bislama Bible Revised 2012

Hae God i jusumaot King Sirus blong i mekem wok blong hem

1Bakegen, profet i talem long ol man blong hem se,

“Olgeta.

Hae God i jusumaot King Sirus finis,

blong hem i kam wan hae king.

Hem i putumap king ya,

blong hem i go mekem faet,

gogo i winim ol narafala kantri,

mo i sanem hem,

blong i go tekemaot paoa blong ol narafala king,

mo blong i openem ol doa*

blong bigfala stonwol blong ol taon, blong hem i save go insaed.

Hem i talem long king ya se,

2‘Mi nao bambae mi mekemrere rod blong yu.

Ol bigfala hil we oli save blokem yu,

mi bambae mi flatemdaon olgeta,

mo ol doa blong bigfala stonwol we oli wokem long bras,

mi bambae mi brekemdaon olgeta,

mo ol bigfala aean blong lokem olgeta,

bambae mi brekemaot olgeta.

3Ol gudgudfala samting

we ol man oli stap haedem insaed olgeta,

long ol ples we i tudak,

mi bambae mi givim i go long yu,

blong yu bambae yu savegud

we mi mi Hae God,

mo blong yu save we mi ya,

we mi God blong ol laen* blong Isrel,* mi nao mi singaot yu long nem blong yu.

4Olgeta ya,

mi mi jusumaot olgeta,

blong oli man blong wok blong mi,

mo naoia, mi mi putumap yu, blong yu givhan long olgeta.

Nating we yu yu no save mi,

be mi mi mekem i gud tumas long yu,

we nem blong yu bambae i go antap from.

5“ ‘Mi nomo mi Hae God,

mo i no gat narafala god i stap.

Nating we yu yu no save mi,

be mi bambae mi mekem

yu yu strong we yu strong.

6Bambae mi mekem olsem,

blong olgeta man long wol ya,

i stat long wansaed blong hem,

i go kasem narasaed blong hem,

bambae oli save

we mi nao mi Hae God, mo i no gat narafala god i stap.

7Mi nao mi mekem delaet,

mo mi mekem tudak.

Mi mi stap mekem

we ol man oli gat gudfala laef,

mo mi stap mekem

we trabol i kam long olgeta.

Mi nomo

mi stap mekem olgeta samting ya.

8Olsem we mi mekem

ren i aot long skae, i folfoldaon,

long sem fasin nomo,

bambae mi mekem yu yu win.

Ol man long wol ya bambae oli glad

blong luk samting ya,

mo frut we bambae i kamtru

from we yu yu win,

ol man blong mi bambae oli fri,

mo ol narafala man bambae oli mekem i stret long olgeta.

Mi mi Hae God.

Mi nao bambae mi mekem

ol samting ya i kamtru.’ ”

Hae God i Masta blong wol ya mo i rul long olgeta samting we i stap kamtru

9 Aes 29.16; Rom 9.20 Bakegen, profet i talem long ol man blong hem se,

“Olgeta.

?Olsem wanem?

?Yufala i ting se wan graonpot

we i sem mak wetem ol narafala graonpot,

hem i save girap,

i rao long man we i wokem hem?

?Yufala i ting se graon i save tok long man

we i stap wokem graonpot,

i talem se,

‘?Yu yu stap mekem wanem long mi?’?

?Yufala i ting

se hem i save talem long man olsem se,

‘!Yu no save samting ya we yu stap mekem!’?

10?Hu i save tok long papa mo mama blong hem,

i talem se,

‘?Weswe yutufala i mekem we mi mi olsem?’?

11Yumi ol laen* blong Isrel,*

mo Hae God i God blong yumi.

Hem i tabu we i tabu,

fasin blong hem i stret olgeta,

mo hem i mekem yumi.

Hem i tok long yumi, i talem se,

‘!Yufala i no gat raet

blong sakem kwestin i kam long mi

from ol narafala pikinini blong mi!

!Yufala i no gat raet

blong talem long mi

ol samting we i stret blong mi mi mekem!

12Mi nao mi mekem wol ya,

wetem olgeta samting we i stap long hem.

Mi nomo mi mekem man,

mo mi putum hem i stap long ples ya.

Long paoa blong mi,

mi hangem skae i stap long ples blong hem.

Mi nomo mi Masta blong san mo mun,

mo blong olgeta sta long skae.

13Mi nomo mi mekem

King Sirus ya i girap,

i mekem olsem we mi mi wantem.

Hem i mekem

olgeta samting i kam stret.

Bambae mi mi stretem olgeta rod

we hem bambae i pas long hem.

Hem bambae i wokem taon ya blong mi Jerusalem*

i gud bakegen,

mo yufala ya we i man blong mi,

be yufala i stap wok slef* longwe,

hem bambae i mekem yufala i fri.

Mo i no gat man we i pem hem,

no we i givim presen long hem

blong pulum tingting blong hem,

blong i mekem ol samting ya.

Mi mi Hae God, mi gat olgeta paoa,

mo hemia tok blong mi.’ ”

14Bakegen, profet i talemaot we Hae God i talem se,

“Bigfala mane ya blong ol man Ijip

mo blong ol man Itiopia,

bambae i blong yufala nomo,

mo ol man Seba ya

we oli longlongfala man,

bambae oli slef* blong yufala.

Bambae yufala i fasem olgeta long jen,

blong oli biaen long yufala.

Olgeta ya bambae oli bodaon

long fes blong yufala,

oli talem se,

‘Tru ya, God i stap wetem yufala,

mo i no gat narafala god.

God ya blong yufala,

hem nomo i God.’ ”

15Nao profet i prea, i talem se,

“Hae God.

Yu yu God blong mifala,

mo yu stap sevem mifala,

be samtaem,

yu save haedem tingting blong yu.

16Olgeta we oli stap mekem aedol

bambae oli sem bigwan,

fes blong olgeta

bambae i kam nogud olgeta.

17Be yu bambae yu sevem mifala,

bambae yu mekem mifala i win olwe.

Neva bambae mifala i save harem nogud,

neva bambae mifala i save sem.”

18Nao hem i talem se,

“Hae God i mekem skae

wetem olgeta samting we i stap long hem.

Hem nao i God.

Hem i wokem wol ya,

mo i mekem i strong,

blong i save stap longtaem.

Taem hem i mekem,

hem i no mekem blong i ples nating nomo,

hem i mekem blong man i save stap long hem.

Mo hem i talem se,

‘Mi nao mi Hae God.

I no gat narafala god i stap.

19Mi mi no haedem ol tok blong mi,

mi no stap haedem ol plan blong mi

blong man i no save luk.

Mo mi no stap fosem yufala,

se yufala i mas go lukaot mi long bus.

Mi mi Hae God,

mo mi stap talemaot ol trutok nomo.

Oltaem, mi stap talemaot ol stret fasin nomo.’ ”

Hae God i no olsem ol aedol long Babilon, hem i Masta blong wol

20Bakegen, profet i talemaot tok blong Hae God long ol man blong hem. Tok ya i blong ol man blong ol narafala kantri, mo profet i talemaot we Hae God i talem se,

“Olgeta.

!Yufala i kam wanples!

Yufala we i stap naoia

we kantri ya Babilonia i brokdaon finis,

yufala i kam wanples blong yumi mekem kot.

Ol man we oli stap katem

ol god blong olgeta long wud,

nao oli stap karem olgeta

oli go olbaot,

mo we oli stap prea oltaem

long ol god olsem,

we oli no gat paoa

blong sevem olgeta,

ol man olsem oli no save wan samting nating.

21Yufala i kam insaed long kot,

blong talemaot ol poen blong yufala.

Yufala i save toktok wanples fastaem

blong stretem tingting blong yufala.

!Yufala i traem tingbaot!

?God ya we i talemaot longtaem finis

ol samting ya we i jes kamtru,

nem blong hem hu?

?Yufala i no save?

!Mi ya nao!

Nem blong mi Hae God,

mo oltaem mi mi stap win,

mo mi stap sevem ol man blong mi.

!I no gat narafala god i stap!

!Mi nomo!

22“!Olgeta man long evri ples long wol!

!Yufala i tanemraon,

yufala i kambak long mi,

blong mi mi sevem yufala!

!Mi nomo mi God,

i no gat narafala god i stap!

23 Rom 14.11; Fil 2.10,11 Promes* blong mi i tru,

mo mi no save jenisim bakegen.

Mi talem nem blong mi,

blong mekem tok blong mi i strong.

Promes blong mi i olsem.

Yufala evriwan bambae i mas nildaon

long fes blong mi,

mo bambae yufala i mas mekem promes long mi,

se bambae yufala i man blong mi.

24Bambae yufala i mas talem se,

‘!Hae God!

!Yu nomo yu gat paoa!

!Yu nomo yu save win!’

Be bambae mi mi talem long yufala,

se olgeta we oli no laekem mi,

oli stap agens long mi,

bambae oli sem bigwan.

25!Mi mi Hae God!

Bambae mi sevem olgeta

we oli laen* blong Isrel,*

nao olgeta ya bambae oli win,

mo bambae oli presem mi.