Levitikas 12 - Bislama Bible Revised 2012

Fasin blong mekem woman we i jes bonem pikinini i kam klin bakegen long fes blong Hae God

1Nao Hae God i givim ol rul ya long Moses

2blong i talemaot long ol laen* blong Isrel.* Hem i talem se, “Sipos wan woman i bonem pikinini boe blong hem, bambae hem i no klin long fes blong mi, mo bambae hem i stap olsem go kasem namba eit dei blong hem. Long fes blong mi, i olsem we hem i gat sik blong woman.

3Jen 17.12; Luk 2.21Long namba eit dei ya blong hem, bambae oli mas mekem sakomsaes* long pikinini ya.

4Nao biaen, woman olsem bambae i stap toti tri dei bakegen we i no klin yet long fes blong mi, from we hem i lusum blad blong hem long taem ya, nao biaen bambae i mas mekem sakrefaes blong kam klin bakegen long fes blong mi. Long ol dei ya, bambae hem i no mas tajem ol samting we i tabu, mo i no mas kam insaed long yad blong Haos Tapolen blong mi, go kasem long en blong taem ya.

5“Mo sipos wan woman i bonem pikinini gel blong hem, bambae hem i no klin long fes blong mi, mo bambae hem i stap olsem go kasem namba fiftin dei blong hem. Long fes blong mi, i olsem we hem i gat sik blong woman. Nao biaen, woman olsem bambae i stap sikisti sikis dei bakegen we i no klin yet long fes blong mi, from we hem i lusum blad blong hem long taem ya, nao biaen bambae i mas mekem sakrefaes blong kam klin bakegen long fes blong mi.

6“Sipos woman i bonem wan pikinini boe no wan pikinini gel, nao stret taem ya blong hem i finis, bambae hem i mas tekem wan smol sipsip we i gat wan yia blong hem, i kam givim long pris long doa blong yad blong Haos Tapolen blong mi. Smol sipsip ya i blong mekem sakrefaes ya we i blong bonem i bon evriwan blong mekem wosip long mi. Mo hem i mas tekem wan nawimba no wan sotleg* blong mekem spesel sakrefaes ya we i blong tekemaot sin blong hem.

7Nao pris ya bambae i tekem tufala samting ya i kam, i mekem sakrefaes long tufala long fes blong mi blong tekemaot ol samting we i mekem woman ya i doti, blong mekem hem i klin bakegen long fes blong mi. Hemia nao ol samting we woman olsem i mas mekem biaen long taem we hem i bonem pikinini blong hem.

8 Luk 2.24 “Sipos woman olsem i pua tumas, nao i no save tekem smol sipsip, bambae hem i save tekem tu sotleg no tu nawimba, we wan i blong mekem sakrefaes ya we i blong bonem i bon evriwan, mo wan i blong tekemaot sin blong hem. Mo pris bambae i mekem tufala sakrefaes ya blong tekemaot ol samting we i mekem woman olsem i doti, nao bambae hem i kam klin bakegen long fes blong mi.”