Eksodas 36 - Bislama Bible Revised 2012

1Bejalehel mo Oholiab, wetem olgeta narafala man we Hae God i givim save long olgeta, mo i mekem olgeta oli gat gudhan blong wokem ol samting blong Haos Tapolen ya blong hem, bambae oli mas wokem evri samting ya stret olsem we hem i talem.”

Ol samting we ol man oli karem i kam oli plante tumas

2Nao Moses i singaot Bejalehel mo Oholiab, wetem ol narafala man ya we Hae God i givim waes long olgeta blong oli mekem wok ya, mo we oli glad blong givhan blong mekem, mo taem olgeta oli kam wanples, hem i talem long olgeta blong oli statem wok ya.

3Hem i givim olgeta samting ya long olgeta we ol man oli givim long hem finis blong wokem Haos Tapolen ya. Be evri moning, ol man oli stap tekem plante samting moa i kam, oli givim long hem.

4Nao olgeta man blong wok ya oli kam luk hem,

5oli talem long hem se, “Naoia, ol man ya oli stap givim plante samting tumas. Yumi gat plante samting finis blong finisim ol wok ya we Hae God i talem.”

6Nao Moses i sanem tok i goraon long olgeta man, i blokem olgeta blong oli no moa givim ol samting ya bakegen long wok blong Haos Tapolen ya. Nao ol man oli no moa givim ol samting ya bakegen,

7from we ol samting ya we oli givim finis oli plante we plante, i bitim mak blong finisim olgeta wok ya.

Ol man blong wok oli wokem ol samting blong Haos Tapolen blong Hae God(Eksodas 26.1-37)

8-9Nao i gat sam long ol man blong wok ya we oli waes moa long wok ya i winim ol narafala, mo olgeta ya nao oli wokem Haos Tapolen ya. Fastaem, oli wokem ol gudfala kaliko blong flasem. Ol man we oli gat gudhan blong wivim kaliko we i gat pija long hem, oli tekem gudfala tred ya linen* we i waet, mo tred we i blu, mo tred we i pepol, mo tred we i red, nao oli wivim ol kaliko we i gat ol pija blong jerubim* olbaot long hem. Nao oli joenem ol kaliko ya blong somap ten pis kaliko we longfala blong olgeta wanwan i kasem twelef meta, mo bigfala blong olgeta wanwan i kasem tu meta.

10Taem oli somap ol ten pis ya finis, oli somap olgeta bakegen blong joenem olgeta blong mekem tu pis, we tufala i bigwan, we i gat faef pis long wan, faef pis long wan.

11-12Nao oli tekem kaliko we i blu, oli wokem ol rop long hem, mo oli wokem hol long ol rop ya, we huk i save holem, nao oli somap ol rop ya long saed blong tu bigfala pis kaliko ya, we fifti rop i go long saed blong wan, fifti rop i go long saed blong wan.

13Nao oli wokem fifti huk long gol we oli gat huk long tu en, blong joenem tu bigfala pis kaliko ya i kam wanples.

14Nao olgeta oli somap wan tapolen bakegen, blong putum antap long gudfala kaliko ya. Oli tekem ol tapolen ya we oli wokem long hea blong nani, oli somap leven pis long hem,

15we longfala blong olgeta wanwan i kasem totin meta, mo bigfala blong olgeta wanwan i kasem tu meta.

16Taem oli somap ol leven pis ya finis, oli somap olgeta bakegen blong joenem olgeta long tu pis we tufala i bigwan, we i gat faef pis long wan, sikis pis long wan.

17Nao oli tekem sam kaliko bakegen, oli wokem rop long hem, mo oli wokem hol long ol rop ya, nao oli somap ol rop ya long saed blong tu bigfala pis tapolen ya, we fifti rop i go long saed blong wan, fifti rop i go long saed blong wan.

18Nao oli wokem fifti huk long bras we oli gat huk long tu en, blong joenem tu bigfala pis tapolen ya i kam wan bigfala tapolen blong kavremap Haos ya.

19Nao olgeta oli somap tu bigfala tapolen bakegen, blong kavremap haos ya tu taem moa. Wan oli wokem long skin blong man sipsip we oli wokem i red, mo narawan, oli wokem long nambawan leta ya we oli wokem long skin blong sikao.

20Nao olgeta oli wokem ol frem* blong Haos ya long wud ya kasis.*

21Ol frem ya, longfala blong ol pos blong olgeta i kasem fo meta, mo longfala blong ol rel blong olgeta i kasem klosap seventi sentemeta.

22Mo long en blong ol frem ya daon, oli wokem we evriwan oli gat tu wud i godaon blong go insaed long ol spesel stamba blong olgeta we oli stanap long olgeta. Olgeta frem ya evriwan oli gat tu wud olsem blong stanap long ol stamba ya.

23Oli wokem twanti frem olsem blong putum long saed i go long saot,

24mo oli wokem foti stamba long silva blong putum tutu aninit long ol frem ya, we ol wud ya oli go insaed long olgeta.

25Mo oli wokem twanti frem bakegen, blong putum long saed blong haos ya long saed i go long not,

26wetem foti stamba bakegen long silva blong putum tutu aninit long olgeta.

27Mo oli wokem sikis frem bakegen, blong go long bak blong haos ya, we hemia saed blong hem long wes,

28wetem tu spesel frem bakegen blong go long tufala kona blong hem long bak.

29Tufala frem ya blong kona, tufala i joen gud olwe long frem blong wol long saed, mo long frem blong wol long bak, i stat daon, i go kasem antap. Tufala frem ya, oli wokem blong tufala i save holemtaet tufala kona ya.

30Long fasin ya, oli wokem eit frem bakegen, wetem sikistin stamba blong olgeta we oli wokem long silva blong putum tutu aninit long olgeta.

31Olgeta oli wokem fiftin rel long wud ya kasis, we faef i blong holemtaet ol frem long wan saed blong haos ya,

32faef i blong holemtaet ol frem long narasaed blong hem, mo faef i blong holemtaet ol frem long bak blong hem.

33Long trifala wol ya, strap we i blong holemtaet ol frem long medel, hem i stat long wan en blong wol, i go kasem narafala en blong hem.

34Wud blong ol frem ya wetem wud blong ol strap ya, oli blokem long gol, mo oli wokem ol ring long gol, oli hangem long ol frem, blong ol strap ya oli gotru long olgeta blong holemtaet ol frem ya.

35Nao oli somap wan bigfala kaliko bakegen, we i blong brekem rum ya long tu haf. Olgeta we oli gat gudhan blong wivim kaliko we i gat pija long hem, oli tekem gudfala tred ya linen* we i waet, wetem tred we i blu, mo tred we i pepol, mo tred we i red, nao oli wivim ol kaliko ya we i gat ol pija blong jerubim olbaot long hem, nao biaen, oli somap olgeta blong wokem bigfala kaliko ya.

36Mo oli wokem fo pos long wud ya kasis, we i blong hangem kaliko ya long olgeta, mo oli blokem wud blong olgeta long gol. Mo oli wokem fo spesel stamba blong olgeta long silva, we ol pos ya oli fit gud long olgeta, mo oli wokem ol huk long gol, oli hangem long top blong ol pos ya blong kaliko ya i hang long olgeta.

37Mo oli tekem sam moa gudfala kaliko ya bakegen we oli wivim long tred ya linen, we oli wokem ol pija olbaot long hem long tred we i blu, mo tred we i pepol, mo tred we i red, nao oli somap wan bigfala kaliko long hem we i blong blokem doa blong Haos Tapolen ya.

38Mo blong hangem kaliko ya, oli wokem faef pos, mo oli putum ol huk long olgeta, mo oli blokem top blong ol pos ya wetem ol rel blong olgeta long gol, mo oli wokem faef spesel stamba blong olgeta long bras.