Sekaraea 13 - Bislama Bible Revised 2012

1Nao profet i talemaot we Hae God i talem se, “Mi mi Hae God, mi gat olgeta paoa, mo long taem ya, mi bambae mi mekem wan springwota i ron, blong mekem ol laen blong King Deved wetem ol narafala man long Jerusalem oli klin, from we bifo oli stap mekem sin, mo oli stap mekem wosip long ol aedol.

2Long taem ya, mi bambae mi tekemaot ol nem blong ol aedol i gowe long tingting blong olgeta man long kantri ya, blong bambae man i no moa save tingbaot olgeta bakegen. Man we i stap talem se hem i profet, mi bambae mi sakemaot hem, mo bambae mi mekem we ol man oli no moa wantem mekem wosip long ol aedol.

3Be sipos wan giaman profet i stap gohed blong talemaot tok blong hem, papa mo mama blong hem bambae tufala i talem long hem se, ‘Yu yu mas ded, from we yu stap talem se yu yu wan profet, be yu stap giaman nomo.’ Long sem taem we hem i stap toktok, papa mo mama blong hem, bambae tufala i stikim hem i ded.

4Taem dei ya i kamtru, olgeta profet evriwan bambae oli sem from ol vison* we oli luk. Bambae i no moa gat wan long olgeta i save werem klos blong profet, blong giaman long ol man, se hem i profet.

5Man we fastaem i profet, long taem ya bambae hem i girap, i talem se, ‘Mi mi no wan profet, mi wan fama ya, mo hemia i wok blong mi oltaem long laef blong mi.’

6Nao sipos wan man i askem long hem se, ‘?Be ol mak blong ol so ya long jes blong yu, wanem i mekem olgeta?’ bambae hem i giaman se, ‘Ol mak ya, mi kasem long haos blong ol fren blong mi.’ ”

Man blong lukaot long sipsip bambae i ded mo ol sipsip bambae oli go wanwan

7 Mat 26.31; Mak 14.27 Nao Profet Sekaraea i talem se, “Hae God i gat olgeta paoa, mo hem i talem se, ‘Naef blong faet. Yu girap, yu kilim man blong lukaot long sipsip blong mi, we hem i stap mekem wok blong mi. Yu kilim hem, nao ol sipsip ya bambae oli go wanwan. Mi bambae mi faet agens long ol man blong mi,

8nao olbaot long kantri ya, sipos i gat tri man, bambae tu i ded, wan i stap, tu i ded, wan i stap.

9Nao olgeta ya we oli stap we oli no ded, mi bambae mi mekem olgeta oli klin, olsem we man i bonem silva blong mekem i klin. Bambae mi mekem i strong long olgeta olsem we man i bonem gol blong tekemaot doti blong hem. Nao biaen, sipos olgeta oli prea long mi, bambae mi save harem olgeta. Mo mi bambae mi save singaot olgeta, se oli man blong mi, mo bambae olgeta oli talemaot se, ‘Hae God i God blong mifala.’ ”