Sekaraea 6 - Bislama Bible Revised 2012

Namba eit vison Profet Sekaraea i luk fo kat we ol hos i pulum

1Mo Profet Sekaraea i talem se, “Nao mi mi luk wan vison* bakegen, mo long vison ya mi luk fo kat i kamaot long medel blong tu hil, be tufala hil ya, bras nomo.

2Rev 6.4; Rev 6.5Mi luk we fas kat, tu red hos i pulum, mo seken kat, tu blak hos i pulum.

3Rev 6.2Mo namba tri kat, tu waet hos i pulum, mo las kat, tu hos i pulum we kala blong tufala i olsem asis faea.

4Nao mi askem long enjel ya we i stap toktok wetem mi se, ‘?Masta,* ol kat ya oli minim wanem ya?’

5 Rev 7.1 “Mo hem i talem se, ‘Mining blong hem, hemia ol fo win we oli stap mekem wok blong Hae God we i Masta blong olgeta ples long wol ya. Mo olgeta oli jes aot long fes blong hem oli kam.

6Kat ya we tufala blak hos i pulum, bambae i go long Babilonia long not, mo hemia we tufala waet hos i pulum, bambae i go long saed i go long wes. Mo hemia we tufala hos blong hem, we kala blong tufala i olsem asis faea, bambae i go long kantri ya long saot.’

7Taem tufala hos ya i pulum kat ya i kam, mi luk olsem we tufala i no wantem wet, tufala i wantem hareap blong go luklukgud olgeta ples long wol ya. Nao enjel ya i talem long tufala se, ‘Naoia yutufala i save go luklukgud olgeta ples long wol ya.’ Nao tufala i girap, tufala i go.

8Nao enjel ya i singaot i kam long mi, i talem se, ‘Naoia, from we tufala blak hos ya i go long Babilonia long not, kros blong Hae God i godaon.’ ”

Hae God i talem se oli mas putum spesel hat long Hae Pris ya Josua

9Nao Profet Sekaraea i talemaot we Hae God i talem long hem se,

10“Yu tekem ol presen ya we Heldae mo Tobia mo Jedaea trifala i givim long yu, yu go kwiktaem long haos blong Josaea we papa blong hem Sefanaea. Trifala ya i jes kambak long Babilonia, ples ya we yufala i bin stap wok slef* long hem.

11Nao yu tekem ol silva mo gol we trifala ya i bin givim long yu, mo yu wokem wan spesel hat long hem. Taem yu wokem finis, yu go putum long hed blong Hae Pris* ya Josua, we papa blong hem Jehosadak.

12-13Jer 23.5; 33.15; Sek 3.8Mo yu talem long hem we mi Hae God mi gat olgeta paoa, mo mi talem se, ‘Man ya we nem blong hem “Han blong Tri”, hem bambae i kam bigwan, i kam strong. Man ya nao bambae i stanemap haos blong mi bakegen, mo ol man bambae oli ona gud long hem olsem we hem i king. Mo taem hem i stap rulum ol man blong hem, oltaem wan pris bambae i stap stanap long saed blong hem. Mo oltaem, bambae tufala i stap wok wanples, tufala i gat pis, mo tufala i gat wan tingting nomo.

14Flas hat ya bambae i stap oltaem long haos* blong Hae God, mo bambae i wan memori blong ona long Heldae, mo Tobia, mo Jedaea mo Josaea.’ ”

15Nao Profet Sekaraea i talem se, “Haos ya blong Hae God, ol man we oli stap longwe, bambae oli kam givhan blong stanemap bakegen. Mo taem haos ya i finis, bambae yufala i save se Hae God we i gat olgeta paoa, hem nao i sanem mi mi kam blong givim tok blong hem long yufala. Hem i God blong yumi, mo sipos yufala i obei long ol tok blong hem, olgeta samting ya bambae i kamtru olsem.”