2 Samuel Sotfala stori blong buk ya - Bislama Bible Revised 2012

Sotfala stori blong buk yaBuk ya, SEKEN BUK BLONG OL STORI BLONG PROFET SAMUEL, we sotfala nem blong hem SEKEN SAMUEL, i gohed long stori we i stat long FAS SAMUEL. Hem i tokbaot laef blong King Deved, long taem we hem i rul. Fastaem, king ya i rul long Juda* nomo, we i haf blong Isrel* long saot (japta 1-4) mo biaen, hem i rul long olgeta ples long Isrel, i stat long saot, go kasem long not, (japta 5-24). Buk ya i gat ol gudfala stori blong hem we i tokbaot laef blong King Deved, we hem i stap faet long ol enemi blong hem. Ol enemi ya, sam oli man ples blong hem, mo sam oli man afsaed, be oltaem hem i stap faet strong long olgeta blong mekem kingdom blong hem i kam bigwan, mo i kam strong. Ol stori ya oli soemaot we king ya i bilif strong long Hae God, mo i lavem hem, mo i save holem ol man blong hem oli stap strong oltaem long saed blong hem. Be stori ya i soemaot tu we samtaem hem i no save sore long man, mo i save mekem ol sin we i nogud tumas, blong kasem ol samting we hem nomo i wantem. Be taem we Profet Natan, we i profet blong Hae God i kam tok long hem, blong soemaot sin ya long hem, hem i talemaot sin blong hem, mo i glad blong karem panis we Hae God i wantem givim long hem.Taem we King Deved i lus, be olgeta laen* blong Isrel oli no save fogetem laef blong hem wetem olgeta samting we hem i mekem. Taswe, biaen, taem we ples blong olgeta i stap kasem trabol, nao oli wantem wan narafala king, be oltaem oli stap talem se king ya i mas wan long olgeta we i kamaot biaen long King Deved ya bifo, we bambae i olsem hem nomo.Ol stori we i stap long buk yaKing Deved i rul long Juda nomo 1.1—4.12

King Deved i rul long olgeta ples long Isrel 5.1—24.25

Fas haf blong laef blong hem we hem i rul 5.1—10.19

Deved mo Batseba 11.1—12.25

Ol trabol mo ol hadtaem 12.26—20.26

Las haf blong laef blong hem 21.1—24.25