1Nao taem we King Sol i faet long ol man Filistia finis, hem i kambak bakegen, nao sam man oli kam talemaot long hem we Deved i stap long draeples ya klosap long Enkedi.
2Nao hem i tekem tri taosen man we oli nambawan soldia blong Isrel,* nao oli go lukaot Deved wetem ol man blong hem klosap long ol bigbigfala ston ya we nem blong olgeta, “Ples blong Wael Nani”, long narasaed i go, long is.
3Sam 57; 142Nao king i kam long wan hol blong ston we i klosap long ol yad blong sipsip we oli stap long saed blong rod, nao i go insaed long hol ya blong i gobus. Be Deved wetem ol man blong hem oli stap haed insaed olgeta long sem hol ya blong ston.
4Nao ol man blong Deved oli talem long hem se, “!E, hemia nao janis blong yu! Hae God i talem long yu finis, se bambae hem i putum enemi ya blong yu long han blong yu, blong yu save mekem long hem olsem we yu yu wantem.” Nao Deved i girap, i wokbaot smosmol, i kam long baksaed blong king, be i katemaot nomo wan pis klos blong hem, we hem i no harem.
5Be biaen, tingting blong Deved i stat kam nogud from,
61 Saml 26.11nao hem i talem long ol man blong hem se, “Prea blong mi we Hae God bambae i blokem mi oltaem, blong mi no mekem wan trabol long king blong yumi, we Hae God i jusumaot. Mi no mas mekem wan samting nating long hem we i nogud, from we Hae God nomo i jusumaot hem.”
7Nao hem i tanem tingting blong ol man blong hem, blong oli no go kilim hem.
Nao king i girap, i go afsaed, mo i stap wokbaot i go.
8Be Deved i kamaot biaen long hem, mo i singaot i go long hem se, “!Ei! !King!” King i lukluk biaen, nao Deved i nildaon, mo i bodaon we fes blong hem i go kasem graon blong ona long hem,
9nao i talem se, “!King! !I nogud yu stap lesin long ol man ya we oli stap talem se mi mi stap traem blong kilim yu!
10!I gud yu luksave! !Naoia long hol blong ston ya, Hae God i putum yu long han blong mi finis! !Sam man blong mi oli stap talem long mi se mi mas kilim yu yu ded, be mi mi gat sore long yu! !Mo mi talem long olgeta, se mi no save mekem wan samting nating we i nogud long yu, from we yu yu king blong mifala we Hae God nomo i jusumaot yu!
11!Papa blong mi, yu luk! !Hemia pis klos blong yu ya mi stap holem! !Sipos mi wantem kilim yu, mi kilim yu finis! !Be mi mi katemaot pis klos ya nomo blong yu! !Yu mas luklukgud long samting ya! !Mi mi no gat plan nating blong mekem wan samting agens long yu, no blong spolem yu! !Mi mi no mekem wan samting nogud long yu, be yu yu stap lukaot mi blong kilim mi!
12!Hae God nomo bambae i jajem yumitu, se hu long yumitufala i rong! !Be prea blong mi we hem bambae i panisim yu from ol samting ya we yu stap mekem agens long mi, from we mi bambae mi no save mekem wan samting nating blong spolem yu!
13!Yu yu save olfala tok ya we i talem se, ‘Ol samting we i nogud, ol man nogud nomo oli stap mekem.’! !Mi mi no save mekem i nogud long yu!
141 Saml 26.20!Yu yu king blong mifala, be oltaem yu stap traem blong kilim mi! !Oltaem yu stap ronem mi, be yu luk! !Mi mi olsem wan dog we i ded finis! !Mi olsem wan smol laos nomo!
15!Prea blong mi we Hae God bambae i jajem yumitu, i givim panis long wan long yumitufala we i rong! !Mi mi trastem hem blong hem i lukluk long trabol ya! !Hem bambae i givhan long mi, i tekemaot mi long olgeta samting ya we yu stap mekem long mi!”
16Taem hem i talem ol tok ya finis, king i talem se, “!Ei! ?I tru, yu Deved ya? ?Yu pikinini blong mi?” Nao hem i krae bigwan,
17mo i talem long hem se, “Yu yu stret nomo, mi mi rong. !Yu yu stap mekem i gud long mi, be mi mi stap mekem i nogud long yu!
18Tede, yu soemaot long mi we yu kaen tumas long mi. Hae God i putum mi long han blong yu, be yu yu no kilim mi mi ded.
19I had tumas blong faenem man we i holemtaet enemi blong hem finis, nao biaen i lego hem bakegen, i no kilim hem. !Prea blong mi we Hae God bambae i blesem yu, from we yu letem mi mi laef tede!
20Naoia mi savegud we yu bambae yu kam king blong kantri ya blong yumi, mo we kantri ya bambae i kam strong moa long han blong yu.
21Be plis yu mekem wan promes long mi long nem blong Hae God, se bambae yu no spolem ol pikinini blong mi we bambae oli kamaot biaen long mi, blong nem blong mi mo nem blong famle blong mi bambae i no lus olgeta.”
22Nao Deved i mekem wan promes, se bambae hem i mekem olsem we king i wantem.
Nao king i gohom bakegen, mo Deved wetem ol man blong hem oli gobak long ples ya we oli stap haed long hem.
Who We AreWhat We EelieveWhat We Do
2025 by iamachristian.org,Inc All rights reserved.
