Namba 12 - Bislama Bible Revised 2012

Hae God i panisim Meriam

1Nao long ples ya, Hae Pris Eron mo Meriam, tufala i stap tok agens long Moses, brata blong tufala, from we wan woman blong hem i woman Itiopia.

2Tufala i stap talem se, “Hae God i no stap toktok wetem Moses nomo. Hem i stap toktok wetem mitufala tu.” Mo Hae God i harem tok ya we tufala i stap talem.

3Moses, hem i wan man we tingting blong hem i stap daon moa, i no gat wan narafala man long wol we tingting blong hem i stap daon olsem hem.

4Nao wantaem nomo, Hae God i talem long trifala se, “Yutrifala i kam long Haos Tapolen blong mi.” Nao trifala i go,

5mo Hae God i kamdaon long wan bigfala klaod, i kam stanap long doa blong Haos Tapolen ya, mo i singaot hae pris ya wetem Meriam, tufala i kam stanap long fes blong hem.

6Nao hem i talem se, “!Yutufala i harem tok blong mi! Sipos i gat wan man we i profet nomo i stap wetem yufala, bambae mi mi stap kamtru long hem long ol vison* blong hem, mo bambae mi stap toktok long hem long ol drim blong hem.

7

8Taswe mi stap kamtru stret long fes blong hem, mo taem mi stap toktok wetem hem, mi no yusum ol tok haed, mi toktok wetem hem long ol tok we i klia we i klia. Hem i luk mi finis, stret long ae blong hem. !Man ya, hem i spesel man blong wok blong mi! ?Weswe yutufala i no fraet blong tok agens long hem?”

9Nao Hae God i kros tumas long tufala, mo taem hem i gowe,

10klaod ya tu i gowe long Haos Tapolen ya, mo kwiktaem nomo wan rabis sik i kasem skin blong Meriam we i finisimgud bodi blong hem, mo i mekem skin blong hem i waet we i waet. Nao taem hae pris i luk samting ya,

11hem i kam talem long Moses se, “Masta, mitufala i stap toktok krangke ya, mitufala i stap mekem i nogud long yu, be plis, yu no letem panis blong sin ya i mekem mitufala i harem nogud olsem.

12Yu no letem sista blong yumitufala i kam olsem pikinini we i bon we i ded finis, we sik i spolem bodi blong hem finis.”

13Nao Moses i krae long Hae God, i talem se, “!God, plis yu tekemaot sik ya long hem!”

14 Nam 5.2,3 Nao Hae God i talem se, “Kastom blong yufala, sipos papa i spet long fes blong pikinini blong hem, be pikinini ya bambae i sem bigwan, mo bambae i mas aot long ples blong yufala, i mas go stap afsaed seven dei. Hemia i panis blong hem from we i mekem papa blong hem olsem. Oraet, yu mas putumaot sista ya blong yu i gowe long yufala wan ful wik, nao biaen, yufala i save tekem hem i kam stap wetem yufala bakegen.”

15Nao oli putumaot hem i gowe long ples blong olgeta, i go stap afsaed seven dei, mo oli no muvaot long ples ya go kasem we oli tekem hem i kam stap wetem olgeta bakegen.

16Nao biaen, oli muvaot long ples ya Hajerot, oli go mekem ples blong olgeta long draeples ya Paran.