Jeremaea 52 - Bislama Bible Revised 2012

King Jedekia blong Juda(2 King 24.18-20; 2 Kronikel 36.11-12)

1Nao long taem we King Jedekia i kam king blong Juda,* hem i gat twanti wan yia blong hem. Hem i rul leven yia long kantri ya, mo hedkwota blong hem i stap long taon ya Jerusalem.* Mama blong hem Hamutal, we i dota blong wan man we nem blong hem Jeremaea, we i blong taon ya Libnaha.

2King ya i stap mekem sin agens long Hae God, olsem we King Jehoeakim i bin mekem,

3mo from we Hae God i kros tumas long ol man Jerusalem mo long ol narafala man Juda, hem i ronemaot olgeta i gowe long fes blong hem.

Ol man Babilonia oli holem Jerusalem(2 King 25.1-7; 2 Kronikel 36.13-21; Jeremaea 39.1-10)

Nao King Jedekia i girap, i agens long King Nebukadnesa blong Babilonia,

4Esik 24.2mo from samting ya, King Nebukadnesa wetem ol soldia blong hem oli kam blong mekem faet agens long Jerusalem.* Nao long taem we King Jedekia i stap rul yet long Juda,* long namba naen yia blong hem, long namba ten manis, mo long namba ten dei blong manis ya, olgeta ya oli kamtru, nao oli putumap ol haos tapolen blong olgeta afsaed long taon ya, mo oli hivimap graon i goraon long bigfala stonwol blong hem, blong oli haed long hem blong faet.

5Nao oli stap blokem taon ya i stap olsem, gogo kasem namba leven yia blong King Jedekia,

6mo olgeta evriwan long taon ya oli hanggri tumas, from we kakae i finis olgeta. Nao long namba fo manis blong yia ya, long namba naen dei blong hem,

7Esik 33.21ol soldia blong Babilonia oli brekem bigfala stonwol blong taon ya, oli kam insaed. Nao long naet, nating we ol soldia ya oli stap hivap raon long taon ya yet, be King Jedekia wetem olgeta soldia blong hem oli aot, oli pastru long garen blong king, nao oli gotru long doa ya we nem blong hem, “Doa we Tufala Stonwol i Joen long hem”, mo oli ronwe blong go long bigfala levelples ya daon, klosap long Jodan Reva.

8Be ol soldia blong Babilonia oli ronem olgeta, gogo oli kasem king ya long bigfala levelples ya klosap long Jeriko, mo ol soldia blong hem oli ronwe long hem, oli livim hem i stap.

9Nao olgeta oli holem hem, oli tekem hem i go stanap long fes blong King Nebukadnesa, we i stap long distrik ya Hamat, long taon ya Riblaha, mo long ples ya, king ya i jajem hem, i talemaot panis blong hem.

10Nao long ples ya, King Nebukadnesa i kilim ol pikinini blong hem oli ded stret long fes blong hem, mo i kilim olgeta haeman blong Juda tu oli ded.

11Esik 12.13Mo biaen, king ya i tekemaot tufala ae blong hem, mo i fasem hem long jen, i tekem hem i go long Babilon, i putum hem long kalabus, mo hem i stap long ples ya gogo i ded.

Ol man Babilonia oli spolem haos blong Hae God(2 King 25.8-17)

12Nao long taem ya we King Nebukadnesa i stap rul long Babilonia, long namba naentin yia blong hem, long namba faef manis, mo long namba ten dei blong manis ya, Nebusaradan we i advaesa blong king, mo i komanda blong ol soldia blong hem, hem i kam long Jerusalem.*

131 King 9.8Hem i bonemdaon haos* blong Hae God, mo haos blong king, mo ol haos blong olgeta haeman blong Jerusalem,

14mo ol soldia blong hem oli go brekemdaon bigfala stonwol blong taon ya.

15Mo long taon ya, hem i holem sam long olgeta we oli pua we i pua, wetem olgeta we oli savegud ol fasin blong wok, mo ol narafala man we oli stap yet long taon ya, mo olgeta we oli bin ronwe blong go joen long ol soldia blong Babilonia long taem blong faet, blong tekem olgeta i go long Babilon.

16Be sam long olgeta ya we oli pua tumas, we oli no gat graon blong olgeta, hem i livim olgeta oli stap long Juda,* mo i putum olgeta blong oli stap wok long ol plantesen blong rop ya grep,* mo long ol garen blong kakae.

17-23 1 King 7.15-47 Nao ol soldia blong Babilonia oli go long haos blong Hae God, oli tekemaot ol samting ya we oli wokem long bras, oli karem olgeta i go long Babilon. Ol samting ya, i gat tu bigfala pos, mo ol kat blong karem ol bigbigfala besin blong wota, mo bigfala tang ya blong wota, mo ol besin blong karem asis, mo ol savel, mo ol tul blong klinim wik blong laet, mo ol besin blong putum blad blong anamol blong sakrefaes i go long hem, mo ol besin blong insens,* wetem olgeta narafala samting ya we oli wokem long bras, we ol pris* oli stap yusum blong mekem wosip long haos ya, nao oli karem evriwan i go long Babilon. Ol bigbigfala samting ya we oli wokem long bras, we King Solomon i bin putum long haos blong Hae God bifo, oli hevi tumas blong skelem, mo olgeta oli brebrekem olgeta blong karem i go long Babilon. Hemia tu bigfala pos, mo ol kat blong karem ol bigbigfala besin blong wota, mo bigfala tang blong wota, mo ol twelef bul ya we tang ya i sidaon antap long olgeta. Tu bigfala pos ya, tufala i sem mak nomo. Tufala wanwan, longfala blong hem i kasem eit meta, mo bigfala blong hem i kasem klosap faef meta haf. Tufala wanwan i gat hol insaed, mo tik blong saed blong hem i kasem seven sentemeta haf. Mo hed blong tufala pos ya wanwan oli wokem long bras, we hae blong hed ya i kasem tu meta twanti sentemeta. Hed ya, oli wokem olsem we i gat net i goraon long hem, mo i gat ol grenadin* olbaot long hem, we oli wokem long bras blong flasem. Long tufala hed ya wanwan, i gat wan handred pija blong frut blong grenadin, be i gat naenti sikis nomo we man we i stanap long graon i save luk. Mo olgeta oli tekemaot ol samting we oli wokem long gol mo long silva blong karem i go. Ol samting ya, i gat ol smol besin, mo ol sensa,* mo ol besin blong putum blad blong anamol blong sakrefaes i go long hem, mo ol besin blong karem asis, mo ol ples blong putum ol laet, mo ol bigfala spun, mo ol besin we oli putum waen long hem blong kafsaedem blong givim i go long Hae God. Mo olgeta oli karem olgeta samting ya i go long Babilon.

Ol man Juda oli go wok slef long Babilonia(2 King 25.18-21,27-30)

24Nao Nebusaradan, we i komanda blong ol soldia blong King Nebukadnesa, hem i holem Seraea we i hae pris, wetem pris ya Sefanaea we i namba tu long hem, mo tri narafala haeman blong haos* blong Hae God.

25Mo hem i holem man ya we bifo i komanda blong ol soldia blong King Jedekia, mo seven advaesa blong king ya, mo man we i namba tu long komanda ya, we bifo i stap singaot ol man Juda* blong oli kam joen long faet, mo sikisti narafala haeman we oli stap yet long taon ya.

26-27Nao hem i tekem olgeta oli go stanap long fes blong king we i stap long distrik ya Hamat, long taon ya Riblaha, mo king i givim tok long ol man blong hem, nao oli wipim olgeta, mo oli kilim olgeta oli ded.

Nao long fasin ya, ol soldia blong Babilonia oli karemaot ol man Juda oli gowe long kantri blong olgeta, oli go wok slef* long Babilon.

Ol man we oli go wok slef long Babilonia

28Long namba seven yia we King Nebukadnesa i rul long Babilonia, hem i tekem tri taosen twanti tri man Juda* oli go wok slef* blong hem.

29Mo long namba eitin yia blong hem, hem i tekemaot eit handred toti tu man bakegen long Jerusalem,* i karem olgeta i go.

30Mo long namba twanti tri yia blong hem, Nebusaradan i tekem seven handred foti faef man moa, oli go wok slef long Babilonia wetem olgeta ya. Olgeta ya evriwan, namba blong olgeta i kasem fo taosen sikis handred.

King Evilmerodak i letem King Jehoeakin i go fri(2 King 25.27-30)

31Nao long taem ya we King Jehoeakin blong Juda* i stap kalabus yet long Babilon, long namba toti seven yia blong hem, King Evilmerodak i kam king blong Babilonia. Nao long sem yia ya, long namba twelef manis, long namba twanti faef dei blong hem, King Evilmerodak ya i ona long King Jehoeakin, i tekemaot hem long kalabus, i letem hem i go fri.

32King ya i stap lukaotgud long hem, i kaen gud long hem, mo i leftemap hem i hae moa long ol narafala king we oli stap wetem hem long Babilonia.

33Nao King Jehoeakin i no moa putum klos blong kalabus, mo i stat long taem ya, evri dei long laef blong hem, hem i stap kakae wetem king ya long haos blong hem, gogo kasem we hem i ded.

34Mo evri dei, king ya i stap givim mane long hem, blong i save pem ol samting we hem i wantem.