Jeremaea 6 - Bislama Bible Revised 2012

Profet Jeremaea i luk wan vison we ol enemi oli kam hivap raon long taon ya Jerusalem

1Bakegen, Profet Jeremaea i luk wan vison,* nao i talemaot we Hae God i talem se, “!Ol laen* blong Benjamin*! !Yufala i mas aot long taon ya Jerusalem*! !Yufala i mas ronwe! !Yufala i mas go haed! Yufala long taon ya Tekoa, yufala i mas blu pupu, mo yufala long taon ya Betakerem, yufala i mas mekem faea i laet antap long hil biaen long taon, blong talemaot we ol enemi oli stap kam. Naoia, bambae bigfala trabol i aot long not, i kam spolemgud yufala.

2Taon ya Saeon i gudfala tumas, be mi bambae mi flatemgud.

3Ol king blong ol enemi ya, wetem ol soldia blong olgeta, bambae oli kam blong mekem faet agens long taon ya. Bambae olgeta wanwan oli putumap haos tapolen blong olgeta raon long hem, long weples we oli wantem.

4Nao bambae oli talem se, ‘!Naoia yumi mas rere! !Yumi go mekem faet long ol man Jerusalem! !Yufala i girap, yumi go mekem faet long olgeta long medel dei!’ Be biaen, bambae oli talem se, ‘No, naoia i let finis. San i stap godaon nao. I no longtaem bambae i tudak.

5Bambae yumi go kilim olgeta long naet, mo bambae yumi spolemgud ol strong ples blong haed blong olgeta.’ ”

6Mo profet i talem se, “Hae God i gat olgeta paoa, mo hem i talem long ol enemi ya blong yumi se, ‘Yufala i mas katemdaon ol tri, mo yufala i mas hivimap wetem graon i goraon long stonwol blong taon ya, blong mekem ples blong yufala blong faet, mo blong blokem ol man oli stap insaed. Mi mi talem finis, se mi mas panisim ol man blong taon ya, from we fulap man blong hem oli stap spolem ol narafala man.

7Oltaem oli stap gohed long ol rabis fasin blong olgeta, olsem springwota we i stap ron oltaem nomo. Oltaem mi stap harem we ol man oli stap faet long taon ya, oli stap spolem olgeta samting. Mo oltaem nomo, mi stap luk ol man we oli sik, mo ol man we oli karekil.’

8Mo Hae God i talem se, ‘Ol man Jerusalem. Taem trabol ya i kam kasem yufala, yufala i mas lan. Sipos no, bambae mi lego yufala, mo mi mekem we taon ya blong yufala i kam olsem draeples, we bambae i no moa gat man i stap long hem.’ ”

Ol man oli no lesin long Hae God nating

9Mo Profet Jeremaea i talem se, “Hae God i gat olgeta paoa, mo hem i talem long mi se, ‘Ol enemi bambae oli kilim olgeta man long kantri ya evriwan oli ded. Ples ya blong yufala bambae i stap nating, we i no gat man i stap long hem. Bambae oli klinim ples ya, i stap klin olsem rop blong grep,* we man i tekemaot olgeta frut long hem. Nao from samting ya, taem yu yu gat janis yet, yu mas sevem laef blong olgeta.’

10“Nao mi mi talem long hem se, ‘?Be sipos mi mi tok strong long olgeta blong wekemap olgeta, hu bambae i save lesin long tok blong mi? Olgeta ya oli stronghed tumas. Ol tok ya blong yu we mi talemaot long olgeta, oli no save lesin long hem nating, oli stap laf nomo long hem.

11Hae God, naoia mi mi harem we mi tu mi kros long olgeta ya, olsem we yu yu kros long olgeta, mo mi no moa save holem, mi mas tok long olgeta.’

“Nao Hae God i talem long mi se, ‘Yu go long ol bigrod, we ol pikinini oli stap olbaot long hem, mo long ol ples we ol yang man oli stap hivap long hem, yu talemaot long olgeta we mi mi kros tumas long olgeta. Ol man wetem ol woman blong olgeta, bambae ol enemi ya oli kam tekemaot olgeta. Ol olfala tu, bambae oli tekemaot olgeta i go, we bambae i no gat wan i stap.

12Ol haos blong olgeta, mo ol garen blong olgeta, mo ol woman blong olgeta, bambae ol enemi ya oli kam tekemaot olgeta evriwan, nao bambae oli givim olgeta i go long han blong ol narafala man. Ol man blong ples ya, mi mi mas panisim olgeta.

13Nating we oli haeman no oli no haeman, be oli stap winim mane long fasin we i no stret. Mo ol profet wetem ol pris tu oli stap ravem ol man.

14Esik 13.10I olsem we ol man blong mi oli gat ol bigbigfala soa, mo olgeta ya oli stap taltalem long olgeta, se evri samting i oraet nomo, be evri samting i no oraet nating.

15Jer 8.10-12Olgeta ya oli stap mekem ol samting nogud, be oli no save sem nating, mo neva fes blong olgeta i kam nogud from fasin ya. Nao from samting ya, taem mi panisim olgeta, bambae olgeta evriwan i ded, olsem olgeta ya we oli ded finis. Mi mi Hae God, mo hemia tok blong mi.’ ”

Ol man oli tanem baksaed long Hae God

16Mo Profet Jeremaea i gohed i talemaot we Hae God i talem se, “Olgeta. Mi mi talem long yufala, se yufala i go stanap long ples we ol rod i joen long hem, mo yufala i traem askem long ol man se, ‘?Ol rod ya we i blong bifo, weswan long olgeta i gudfala rod blong folem?’ Mo taem oli soemaot wan rod long yufala, be rod ya nao, bambae yufala i wokbaot long hem, nao yufala i save stap gud, we yufala i gat pis long laef blong yufala.

“Be yufala i girap, yufala i talem se, ‘!No! !Mifala i no wantem go!’

17“Mo mi mi jusumaot ol wajman blong bambae oli blu pupu blong wonem yufala, nao mi talemaot long yufala, blong yufala i mas lesin long hem, blong yufala i save rere. Be yufala i talem se, ‘!No! !Mifala i no wantem lesin!’ ”

18-19Nao profet i talemaot we Hae God i talem se, “Ol man blong ol narafala kantri long wol. Yufala i mas lesin long mi, mo yufala i mas luklukgud long ol samting, we mi bambae mi mekem long ol man blong mi. Naoia bambae mi mekem olgeta oli kasem bigfala trabol, from ol rabis fasin we oli stap mekem. Olgeta oli no lesin long ol tok blong mi, mo oli tanem baksaed long ol loa blong mi.

20Ol insens* ya we oli stap tekem i kam long kantri ya Seba blong givim long mi, mo ol gudfala senta ya tu we oli tekem i kam long narafala kantri we i longwe, be mi mi no laekem olgeta nating. Ol sakrefaes ya we oli stap bonem i bon evriwan blong mekem wosip long mi, mo ol narafala sakrefaes ya we oli stap givim long mi, be mi mi no glad nating long olgeta.

21Ol man ya, bambae mi mekem olgeta oli stambol, oli folfoldaon. Ol papa wetem ol pikinini blong olgeta, mo ol fren blong olgeta, mo ol man ples blong olgeta, bambae olgeta evriwan oli ded. Mi mi Hae God, mo hemia tok blong mi.”

Ol enemi we oli aot long not oli stap kam blong faet long Jerusalem

22Bakegen, Profet Jeremaea i luk wan vison,* mo i talemaot we Hae God i talem se, “Olgeta. Naoia i gat plante man oli aot long not oli stap kam. Olgeta ya oli strong we i strong, oli stap mekemrere finis blong kam mekem faet long ples ya.

23Oli holemrere ol bonara mo ol spia blong olgeta finis, mo oli man nogud, we taem oli faet, oli no gat sore nating. Taem oli resis i kam long ol hos blong olgeta, noes blong olgeta i olsem noes blong bigfala solwota we i stap brok long rif. Naoia oli rere finis blong mekem faet long bigfala taon ya Jerusalem.*”

24Mo long vison ya, profet i harem we ol man Jerusalem oli talem se, “Yumi harem nius blong ol samting ya finis, nao ol han blong yumi oli slak we i slak, oli stap hang olsem we oli ded finis. Bigfala trabol i kasem yumi finis. Naoia yumi harem i nogud tumas, olsem woman we i harem nogud long taem ya we i bonem pikinini blong hem.

25Yufala i no go afsaed long ol open ples, mo yufala i no go wokbaot long rod, from we ol enemi ya blong yumi oli raonemgud yumi, mo oli rere finis blong faet long yumi, mo samting ya i mekem we yumi fraet we i fraet gud.”

26Nao long vison ya, hem i talemaot we Hae God i talem se, “Ol man blong mi. Naoia yufala i mas putum ol rabis klos, mo yufala i mas rol olbaot long asis faea, blong soemaot we yufala i sore from ol sin blong yufala. Yufala i mas krae bigwan, olsem man we i gat wan pikinini nomo blong hem, be pikinini ya i lus. Yufala i mas krae olsem, from we olgeta ya we oli kam blong spolem yufala, bambae oli kam kwiktaem, we bambae yufala i sek nomo long olgeta.”

27Nao profet i talemaot we Hae God i talem long hem se, “Yu mas traem faenemaot ol man ya blong mi se oli olsem wanem. Yu mas traem olgeta, olsem we man i bonem silva blong faenemaot se i gud no i nogud.

28Olgeta ya oli stronghed tumas, hed blong olgeta i strong olsem ston, mo oltaem oli stap girap agens long mi. Olgeta evriwan oli kam nogud finis, mo oltaem oli stap go olbaot blong spolem nem blong narafala man.

29Ol man ya oli kam rabis finis, olsem doti blong silva. Nating we strong faea i bonem, be i no save ronaot. Oli no save kam gud bakegen, from we ol man we fasin blong olgeta i no stret, oli stap miks yet wetem olgeta.

30Bambae ol man oli singaot olgeta, se makas blong silva, from we mi mi tanem baksaed finis long olgeta.”