Namba 2 - Bislama Bible Revised 2012

Fasin we olgeta oli folem blong mekem ples blong olgeta

1Nao Hae God i talem long Moses wetem Hae Pris Eron se,

2“Oltaem, sipos yufala i muv i go long narafala ples, bambae yufala i mas putumap ol haos tapolen blong yufala raon long Haos Tapolen blong mi. Bambae yufala i mas pulum ol flaeg blong ol fo kampani blong yufala, mo olgeta man bambae oli mas putumap ol haos tapolen blong olgeta raon long flaeg blong kampani blong olgeta, mo flaeg blong laen* blong olgeta tu bambae i mas flae antap.

3“Oltaem, olgeta we oli aninit long flaeg blong Juda* bambae oli mas putumap ol haos tapolen blong olgeta long saed i go long is, raon long flaeg blong olgeta. Bambae oli stap long ol laen blong olgeta, aninit long han blong ol lida blong olgeta.

“Long kampani ya, i gat ol laen blong Juda, we lida blong olgeta Nason, we papa blong hem Aminadab,

4mo namba blong olgeta i kasem seventi fo taosen, sikis handred.

5Mo i gat ol laen blong Isakara* we lida blong olgeta Netanel, we papa blong hem Juara,

6mo namba blong olgeta i kasem fifti fo taosen, fo handred.

7Mo i gat ol laen blong Sebulun,* we lida blong olgeta Eliab, we papa blong hem Helon,

8mo namba blong olgeta i kasem fifti seven taosen, fo handred.

9Namba blong olgeta evriwan long kampani ya i kasem wan handred eiti sikis taosen, fo handred. Mo taem yufala i muv blong go long narafala ples, oltaem kampani ya bambae i stap wokbaot i go fastaem.

10“Mo olgeta we oli aninit long flaeg blong Ruben* bambae oli mas putumap ol haos tapolen blong olgeta long saed i go long saot, raon long flaeg blong olgeta. Bambae oli stap long ol laen blong olgeta, aninit long han blong ol lida blong olgeta.

“Long kampani ya, i gat ol laen blong Ruben, we lida blong olgeta Elijuru, we papa blong hem Sedeuru

11mo namba blong olgeta i kasem foti sikis taosen, faef handred.

12Mo i gat ol laen blong Simeon,* we lida blong olgeta Selumiel, we papa blong hem Jurisadae,

13mo namba blong olgeta i kasem fifti naen taosen, tri handred.

14Mo i gat ol laen blong Gad,* we lida blong olgeta Eliasaf, we papa blong hem Dehuel,

15mo namba blong olgeta i kasem foti faef taosen, sikis handred fifti.

16Namba blong olgeta evriwan long kampani ya i kasem wan handred fifti wan taosen, fo handred fifti. Mo taem yufala i muv blong go long narafala ples, oltaem taem we yufala i luk we kampani ya we i aninit long flaeg blong Juda i muv i go, ale, i taem blong yufala i muv.

17“Nao ol laen blong Livae* bambae oli tekemaot Haos Tapolen blong mi wetem ol samting blong hem, oli karem, oli wokbaot long medel blong ol fo kampani blong yufala. Mo bambae yufala i wokbaot long ol kampani blong yufala, biaen long ol flaeg blong yufala, olsem we yufala i stap stanemap ol haos tapolen blong yufala raon long ol flaeg ya.

18“Mo olgeta we oli aninit long flaeg blong Efrem* bambae oli mas putumap ol haos tapolen blong olgeta long saed i go long wes, raon long flaeg blong olgeta. Bambae oli stap long ol laen blong olgeta, aninit long han blong ol lida blong olgeta.

“Long kampani ya, i gat ol laen blong Efrem, we lida blong olgeta Elisama, we papa blong hem Amihud,

19mo namba blong olgeta i kasem foti taosen, faef handred.

20Mo i gat ol laen blong Manase,* we lida blong olgeta Gameliel, we papa blong hem Pedajuru,

21mo namba blong olgeta i kasem toti tu taosen, tu handred.

22Mo i gat ol laen blong Benjamin,* we lida blong olgeta Abidan, we papa blong hem Gideoni,

23mo namba blong olgeta i kasem toti faef taosen, fo handred.

24Namba blong olgeta evriwan long kampani ya i kasem wan handred eit taosen, wan handred. Mo taem kampani ya we i aninit long flaeg blong Ruben i muv i go, ale, i taem blong yufala i muv.

25“Mo olgeta we oli aninit long flaeg blong Dan* bambae oli mas putumap ol haos tapolen blong olgeta long saed i go long not, raon long flaeg blong olgeta. Bambae oli stap long ol laen blong olgeta, aninit long han blong ol lida blong olgeta.

“Long kampani ya, i gat ol laen blong Dan, we lida blong olgeta Ahiesa, we papa blong hem Amisadae,

26mo namba blong olgeta i kasem sikisti tu taosen, seven handred.

27Mo i gat ol laen blong Asere* we lida blong olgeta Pagiel, we papa blong hem Okran,

28mo namba blong olgeta i kasem foti wan taosen, faef handred.

29Mo i gat ol laen blong Naftali,* we lida blong olgeta Ahira, we papa blong hem Enan,

30mo namba blong olgeta i kasem fifti tri taosen, fo handred.

31Namba blong olgeta evriwan long kampani ya i kasem wan handred fifti seven taosen, sikis handred. Mo taem yufala i muv blong go long narafala ples, kampani ya bambae i laswan blong muv i go, biaen long taem ya we kampani we i aninit long flaeg blong Efrem i muv.”

32Namba blong olgeta man we Moses olgeta oli raetemdaon ol nem blong olgeta, folem ol laen blong olgeta insaed long ol kampani ya, i gat sikis handred tri taosen, faef handred fifti.

33Be olsem we Hae God i talem finis long hem, olgeta oli no raetemdaon nem blong ol laen blong Livae wetem olgeta.

34Olgeta oli mekem evri samting stret olsem we Hae God i talem long Moses. Oli putumap ol haos tapolen blong olgeta raon long flaeg blong olgeta, mo oltaem, taem oli muv i go long narafala ples, olgeta oli stap wokbaot folem ol famle blong olgeta.