Jeremaea 18 - Bislama Bible Revised 2012

Jeremaea i go luk man blong wokem graonpot

1Nao Profet Jeremaea i talem se, “Hae God i talem long mi se,

2‘Jeremaea. Yu go long haos blong man ya blong wokem graonpot, mo taem yu stap long haos ya, bambae mi talemaot tok blong mi long yu.’

3Ale, mi go long haos ya, mo mi luk we man ya blong wokem graonpot i stap wokem graonpot long wil blong hem.

4Mi mi stap luk, we taem wan graonpot we hem i stap wokem i kam nogud long han blong hem, hem i save yusum sem graon ya bakegen, blong wokem narafala samting olsem we hem i wantem.

5“Nao mi talemaot long ol man Jerusalem* mo ol narafala man Juda* we Hae God i talem se,

6‘Olgeta. ?Weswe? ?Yufala i ting se mi mi no gat raet blong mekem long yufala olsem we man blong wokem graonpot ya i mekem long graon ya blong hem? Yufala i stap long han blong mi, stret olsem we graon blong wokem graonpot i stap long han blong man blong wokem graonpot.

7Sipos samtaem mi mi talemaot long king blong wan narafala kantri, wetem ol haeman blong hem, mo ol narafala man blong hem, se mi bambae mi pulumaot olgeta long kantri blong olgeta, mo bambae mi brebrekemdaon ol taon blong olgeta, mo bambae mi spolem paoa blong olgeta,

8be ol man blong kantri ya oli tanem tingting blong olgeta from ol rabis fasin blong olgeta, mi bambae mi no save mekem olsem we mi talem fastaem.

9Mo bakegen, sipos mi mi talem long wan king blong narafala kantri, wetem ol haeman blong hem, mo ol narafala man blong hem, we bambae mi wokemgud olgeta, mo mi stanemap olgeta blong oli kam strong bakegen,

10be biaen, olgeta blong ples ya oli no moa save obei long mi, mo oli mekem ol rabis fasin bakegen, mi bambae mi no moa save mekem olsem we mi mi talem.’

11“Nao mi gohed, mi talemaot long olgeta we Hae God i talem se, ‘From samting ya, mi mi stap mekem plan agens long yufala, mo mi rere blong panisim yufala. Yufala i mas lego ol rabis fasin blong yufala, mo yufala i mas mekem ol samting we i stret.’

12“Be olgeta oli talem se, ‘!Nogat! ?Bambae mifala i jenisim fasin blong mifala from wanem? Bambae mifala i gohed nomo blong mekem stronghed, mo blong mekem ol rabis fasin, olsem we mifala i wantem.’ ”

Ol man oli tanem baksaed long Hae God

13Nao Profet Jeremaea i talemaot we Hae God i talem se,

“Ol man blong mi.

From we yufala i tok olsem,

yufala i traem go askem long ol man

blong ol narafala kantri,

se olgeta oli harem sam samting olsem samtaem,

no nogat.

Yufala ya i mekem wan samting

we i nogud olgeta.

14Ol top blong ol bigbigfala hil blong Lebanon

we oli ston nomo,

oltaem nomo,

sno* i stap long olgeta,

mo ol springwota we oli kolkol gud,

we oli kamaot long ol hil ya,

oli no save drae samtaem,

15be yufala ya i no olsem nating,

yufala i fogetem mi finis.

Oltaem, yufala i stap bonem insens*

long ol aedol,

mo rod ya we i stret blong yufala i folem,

oltaem nomo yufala i stap stambol long hem.

Naoia, yufala i no moa stap folem ol rod ya blong fastaem,

yufala i no moa folem rod nating,

yufala i stap brekem bus nomo.

16Yufala i mekem kantri ya i kam nogud olgeta,

we ol man oli fraet long hem,

mo bambae oli lukluk nogud long hem

gogo i no save finis.

Olgeta we bambae oli pas long ples ya,

taem oli luk ol samting ya,

bambae oli sek gud.

Bambae oli sapraes tumas,

we oli saksakem hed blong olgeta from.

17Bambae mi letem ol enemi

oli ronem yufala i go olbaot,

olsem asis we iswin* i blu long hem,

nao i smok i go olbaot.

Taem ol trabol ya i kam kasem yufala,

mi bambae mi tanem baksaed long yufala,

mi no save givhan long yufala nating.”

Ol man oli mekem plan agens long Profet Jeremaea

18Nao ol man oli talem se, “Olgeta. Yumi mas mekem wan samting agens long profet ya. Yumi no mas lesin long tok blong hem. Yumi mas mekem wan plan blong kilim hem i ded. Yumi gat ol pris* blong yumi oli stap, blong tijim yumi, mo yumi gat ol waes man oli stap, blong givim advaes long yumi. Mo yumi gat ol profet blong yumi tu oli stap, blong talemaot tok blong God long yumi.”

19Nao profet i prea, i talem se, “Hae God. Plis yu harem prea blong mi, mo yu lesin long ol tok ya we ol enemi ya blong mi oli stap talemaot agens long mi.

20?Bambae i olsem wanem? ?Mi mi stap mekem ol gudgudfala wok, be i stret blong oli mekem rabis plan agens long mi from ol samting ya? Naoia oli digim wan hol i stap rere finis, blong mi mi foldaon long hem. Plis yu no fogetem taem ya bifo, we mi mi kam prea long yu from olgeta, se bambae yu no kros, yu no mekem i strong tumas long olgeta.

21Be naoia, i gud yu mekem ol pikinini blong olgeta oli hanggri gogo oli ded from, mo yu letem ol enemi blong olgeta oli kam kilim olgeta oli ded. Plis yu mekem we ol woman oli lusum ol man blong olgeta wetem ol pikinini blong olgeta, mo yu mekem we ol man bambae oli ded long wan rabis sik, mo ol yang man bambae oli ded long faet.

22Plis yu sanem wan kampani blong ol rabis man oli kam brebrekem ol haos blong olgeta, mo oli tekemaot olting blong olgeta. Yu mekem we bambae oli sek nomo long ol man ya, nao bambae oli fraet tumas, oli stap krae. Bambae yu mekem olsem long olgeta, from we oli digim wan hol blong mi mi foldaon long hem, mo oli putum ol trap blong kasem mi.

23Hae God, yu yu save finis ol rabis plan ya blong olgeta blong kilim mi mi ded. Plis yu no fogivim olgeta from ol rabis fasin ya blong olgeta, mo yu no tekemaot ol sin blong olgeta. Plis yu kros long olgeta, yu mekem we bambae ol enemi oli flatemgud olgeta long fes blong yu.”