Jeremaea 4 - Bislama Bible Revised 2012

Ol man oli mas tanem tingting blong olgeta from ol sin blong olgeta

1Nao Profet Jeremaea i talemaot we Hae God i talem se, “!Ol laen* blong Isrel*! Sipos yufala i wantem kambak, be yufala i mas tanem tingting blong yufala, blong kambak long mi. Mo sipos yufala i tekemaot ol aedol ya blong yufala we mi stap agens long olgeta, mo yufala i putum tingting blong yufala i stap strong long mi nomo,

2bambae i stret nomo blong yufala i mekem strong promes long nem blong mi nomo, blong soemaot we ol tok blong yufala i tru. Nao sipos yufala i mekem olsem, bambae ol narafala man oli save askem long mi blong mi blesem olgeta, mo bambae oli stap leftemap nem blong mi.”

3 Hos 10.12 Nao profet i talemaot we Hae God i talem se, “Ol man Jerusalem* mo ol narafala man Juda.* I nogud yufala planem ol kakae blong yufala long medel blong ol rabis gras. Yufala i mas klinim ples blong hem fastaem, nao yufala i brebrekem graon blong hem, blong planem.

4Yufala i mas holemtaet promes ya blong yufala we yufala i mekem wetem mi. Yufala i mas mekem laef blong yufala i tabu, i blong mi. Sipos yufala i no mekem olsem, bambae mi kros tumas long yufala, from ol samting nogud we yufala i mekem. Mo kros ya blong mi bambae i strong moa, i winim faea we i laet bigwan, mo bambae i no gat man we i save kilim faea ya.”

Ol enemi bambae oli kam blong faet long kantri ya Juda

5Nao Hae God i talem long Profet Jeremaea, blong i go talemaot long ol man we hem i talem se,

“Ol man Jerusalem,*

mo ol narafala man Juda.*

Yufala i mas go long olgeta ples long Juda,

yufala i mas blu pupu,

blong talemaot long ol man

we bambae bigfala faet i kam.

Yufala i mas singaot bigwan,

yufala i talem long olgeta se,

‘Naoia yumi mas resis i go

blong haed long ol taon

we oli gat stonwol i goraon long olgeta.’

6Yufala i mas soem rod ya long olgeta,

we i go long bigfala hil ya Saeon.*

Yufala evriwan i mas resis i go long ples ya

blong sevem laef blong yufala.

!Yufala i no tektaem!

Bambae i no longtaem,

mi mi letem trabol i kam kasem yufala,

we olgeta long not

bambae oli kam spolemgud ples blong yufala.

7Olgeta we oli man blong spolem ol man blong evri ples,

oli aot finis long ples blong olgeta,

oli stap kam.

Oli olsem laeon we i kamaot long ples

we i stap haed long hem.

Olgeta ya oli kam

blong spolem olgeta ples long Juda.

Bambae oli spolemgud olgeta taon long kantri ya,

we bambae i no gat man i save stap long olgeta.”

8Nao profet i talem long olgeta se,

“From samting ya,

yumi mas putum ol rabis klos,

yumi mas krae we yumi krae bigwan,

from we Hae God i kros

we i kros tumas long yumi,

mo kros ya blong hem

i no gowe nating long yumi.”

9Bakegen, profet i talemaot we Hae God i talem se, “Long dei ya, ol king mo ol haeman blong yumi bambae oli fraet, mo tingting blong olgeta bambae i no moa strong. Ol pris bambae oli seksek gud, mo ol profet bambae oli sapraes tumas long ol samting ya.”

10Nao profet i prea, i talem se, “Hae God, Masta* blong mi. Yu yu trikimgud ol man Jerusalem ya. Bifo, yu talem long olgeta, se bambae oli gat pis, be naoia oli stap finis long rod blong ded.”

11Mo bakegen, hem i talemaot long ol man we Hae God i talem wan parabol, i talem se, “I gat taem i stap kam, we yufala ol man Jerusalem bambae yufala i harem nius we i gat wan bigfala win we i hot we i hot, i aot long draeples, i blu i kam long yufala. Bambae win ya i no save givhan long yufala, olsem win ya we i stap blu blong tekemaot ol doti blong wit.*

12Mi mi Hae God, mo win ya we i strong we i strong, hem i pija blong ol soldia we mi bambae mi sanem olgeta i kam blong mekem yufala i kasem panis.”

Profet Jeremaea i luk wan vison we bambae ol enemi oli kam hivap raon long kantri ya Juda

13Nao Profet Jeremaea i talemaot wan vison* we hem i luk. Hem i talem se, “!Ol man Jerusalem*! Yufala i luk. Ol enemi ya oli stap kam olsem klaod blong hariken. Ol kat blong faet blong olgeta oli stap kam olsem waelwin stret, mo ol hos blong olgeta oli resis i strong moa, i winim bigfala pijin ya igel.* Sore tumas long yumi. !Yumi lus finis!

14Yufala i mas sakemaot ol rabis fasin ya i gowe long tingting blong yufala, blong laef blong yufala i klin, nao God bambae i sevem yumi. ?Bambae yufala i stap holem ol rabis tingting ya blong yufala gogo kasem wetaem?

15“I gat sam man blong karem tok oli aot long taon ya Dan oli kam, mo sam oli aot long ol hil long Efrem* oli kam, oli stap talemaot nius ya we bigfala trabol i stap kam.

16Nao Hae God i talem long mi, blong mi talemaot long ol man blong olgeta kantri, mo long ol man Jerusalem tu, we hem i talem se, ‘I gat ol enemi oli kamaot long wan kantri we i longwe, oli stap kam blong faet agens long yufala. Ol enemi ya bambae oli singsingaot blong mekem faet long ol taon long Juda.*

17Mo bambae oli kam stanap raon long Jerusalem, olsem we ol man oli stanap raon long garen blong gad long hem. Ol enemi ya bambae oli mekem olsem, from we yufala long Jerusalem mo long Juda yufala i girap agens long mi.

18“ ‘Ol man Juda. Yufala nomo i mekem we trabol ya bambae i kam kasem yufala, from we yufala i stap mekem ol rabis fasin, mo laef blong yufala i no stret nating. Panis ya blong yufala i bigwan tumas, bambae i stap mekem yufala i harem nogud tumas long tingting blong yufala. Mi mi Hae God, mo hemia tok blong mi.’ ”

Profet Jeremaea i sore tumas long ol man blong hem

19Nao Profet Jeremaea i talem se,

“!Mi mi sore we mi sore tumas!

!Tingting blong mi i hevi we i hevi!

Mi mi fraet we mi fraet,

mo hat blong mi i pam we i pam.

Mi no save stap kwaet nating,

from we mi stap harem bigfala noes blong ol pupu,

we oli stap singaot ol man blong oli go faet,

mo mi harem ol enemi oli stap singsingaot

long toktok blong faet.

20Tumas trabol i stap kam.

Wan i kam finis, narawan i kam,

wan i kam finis, narawan i kam.

Olgeta samting long kantri ya,

ol enemi oli spolemgud olgeta.

Oli brebrekem ol haos tapolen blong mifala,

mo oli tereterem ol kaliko blong ol haos ya

long ol smosmol pis.

21?Bigfala faet ya we i stap gohed naoia

bambae i stap gogo kasem wetaem?

?Noes blong pupu ya bambae i stap krae

gogo kasem wetaem?”

22Nao profet i talemaot we Hae God i talem se,

“Ol man blong mi.

Yufala i stronghed tumas,

yufala i no save mi nating.

Yufala i stronghed olsem pikinini nomo,

yufala i no gat hed nating.

Yufala i waes gud blong mekem ol samting we i nogud,

be yufala i no waes nating

blong mekem ol samting we i stret.”

Profet Jeremaea i luk wan vison bakegen we ol enemi oli kam spolem olgeta

23Nao Profet Jeremaea i luk wan vison* bakegen, mo hem i talem se,

“Mi lukluk long wol ya,

be mi luk we hem i stap nating nomo,

i no gat wan samting nating i stap long hem.

Mo mi lukluk olbaot long skae,

be hem i tudak nomo,

i no gat laet nating.

24Mi lukluk antap long ol hil,

be ol hil ya oli seksek evriwan,

mo ol smosmol hil tu oli stap muvmuv.

25Mi luk we i no moa gat wan man nating long wol ya,

mo ol pijin tu oli no moa stap.

26Ol gudgudfala graon blong kantri ya

oli kam draeples,

mo ol taon blong hem,

ol enemi oli spolem evriwan,

from we Hae God i kros we i kros.”

27Mo profet i talemaot we Hae God i talem se,

“Nating we kantri ya bambae i stap nating,

we i no gat man long hem,

be bambae mi no save spolem

we mi spolem olgeta.

28Olgeta samting long wol ya

bambae oli krae,

mo skae bambae i kam tudak.

Hemia tok blong mi mo plan blong mi,

mo bambae mi no save jenisim tingting blong mi,

mo mi no save gowe long hem.”

29Mo profet i talem se,

“Taem ol man oli harem noes

blong ol man blong ron long hos,

mo ol noes blong olgeta

we oli karem bonara,

bambae olgeta evriwan oli ronronwe.

Sam long olgeta bambae oli resis i go long bus,

sam narafala bambae oli klaem olbaot

long ol bigbigfala ston.

Bambae oli ronronwe evriwan

long ol taon blong olgeta,

mo bambae i no moa gat man i stap

long olgeta bakegen.

30Ol man Jerusalem.*

Bambae yufala i mas kasem panis.

?From wanem yufala i stap mekem flas

blong yufala olsem?

Yufala i stap werem ol klos ya,

we oli red olsem klos blong king,

mo yufala i stap putum ol flas samting

we oli wokem long gol,

mo yufala i pentem ae blong yufala.

Be yufala i stap flas from nating nomo.

Olgeta ya we fastaem oli stap laekem yufala,

naoia oli ting rabis long yufala,

oli lego yufala finis,

mo oli wantem kilim yufala.

31Mi mi harem wan man i stap krae

we i krae bigwan,

olsem woman we baksaed blong hem i stap soa

blong i bonem pikinini blong hem.

Hem i stap krae bigwan,

olsem woman we i bonem fas pikinini blong hem.

Bigfala krae ya i kamaot long Jerusalem,

olsem krae blong man

we klosap win blong hem i finis.

Hem i stap pusumaot han blong hem,

i stap talem se,

‘!Klosap mi ded!

!Olgeta oli stap kam blong kilim mi!’ ”