Sam 57 - Bislama Bible Revised 2012

Prea we man i mekem blong bambae God i givhan long hem(Sam 108.1-5)(Sing ya, Deved i wokem, biaen long taem ya we hem i ronwe long Sol, i go haed long hol blong ston.)(Tok i go long God.)

1God,

yu sore long mi.

Plis yu sore long mi

from we mi mi stap long bigfala trabol

we i olsem hariken.

Mi mi kam blong haed long yu,

blong yu blokem mi mi stap gud

olsem we pikinini blong faol i stap gud

aninit long wing blong mama blong hem,

nao bambae mi save stap gud gogo kasem we trabol ya i finis.

(Tok i go long ol man.)

2God, hem i hae we i hae.

Mi mi stap singaot i go long hem,

from we hem i stap givim evri samting long mi

we mi mi sot long hem.

3Hem i stap long heven,

mo bambae hem i harem krae blong mi,

i sevem mi.

Bambae hem i mekem

olgeta we oli stap mekem i strong tumas long mi oli sem.

Hem bambae i soemaot long mi

we oltaem hem i lavem mi tumas,

mo we tingting blong hem

i stap strong long mi.

4Ol enemi blong mi

we oli stap raonem mi

oli olsem ol laeon ya

we oli stap kakae man,

we tut blong olgeta

oli longfala olsem spia mo ara,

mo tang blong olgeta i olsem naef blong faet we i sap we i sap.

(Tok i go long God.)

5God.

Mi mi wantem tumas

blong yu yu soemaot

we yu yu hae we yu hae

i bitim skae,

mo we bigfala paoa blong yu i kasem olgeta ples long wol.

6Ol enemi blong mi oli putum net finis

blong kasem mi,

nao mi mi harem i nogud we i nogud.

Oli digim wan hol long rod blong mi,

be olgeta nomo oli foldaon long hem bakegen.

7God.

!Oltaem tingting blong mi i stap strong long yu!

!Bambae mi sing, mi presem yu!

8!Naoia mi mi mas wekap!

!Gita mo mandolin blong mi,

tufala i mas wekap!

!Bambae mi wekemap san ya!

9Masta,

bambae mi mi talem tangkiu long yu

long fes blong olgeta man,

bambae mi sing blong presem yu

long fes blong ol man blong ol narafala kantri.

10Fasin ya blong yu

we oltaem yu lavem man tumas,

hem i hae we i hae,

i go kasem skae.

Fasin blong yu

we oltaem yu stap holem ol promes blong yu,

hem i hae tumas,

i go antap i kasem ol klaod.

11God.

Mi mi wantem tumas

blong yu yu soemaot

we yu yu hae we yu hae

i bitim skae,

mo we bigfala paoa blong yu

i kasem olgeta ples long wol. E