Levitikas 17 - Bislama Bible Revised 2012

Blad blong anamol i tabu blong man i kakae

1Nao Hae God i givim ol loa blong hem long Moses bakegen,

2blong hem i go talemaot long Hae Pris Eron wetem ol pikinini blong hem, mo long ol narafala laen* blong Isrel.*

3-4Hem i talem se, “Sipos wan long yufala i kilim wan buluk, no wan sipsip, no wan nani blong mekem sakrefaes long wan narafala ples afsaed, be i no tekem i kam long doa blong yad blong Haos Tapolen blong mi blong givim i kam long mi, man ya i brekem Loa. Taem hem i mekem blad blong anamol olsem i ron, i olsem we hem i kilim man i ded, mo bambae mi mi no moa save kaontem hem, se i man blong mi

5Tok ya i min se ol anamol ya we naoia yufala i stap kilim olgeta olbaot long open ples nomo, bambae yufala i no moa save kilim olgeta olsem bakegen. Sipos yufala i wantem kilim anamol olsem, yufala i mas tekem i kam long mi, yufala i mas givim long pris long doa blong Haos Tapolen blong mi, nao yufala i mas kilim anamol ya blong mekem sakrefaes ya we pris i bonem haf, yufala i kakae haf blong soemaot we yufala i stap fren gud wetem mi.

6Nao pris i mas tekem blad blong anamol ya, i mas kafsaedem i go long ol fo saed blong Olta ya we i stap long doa blong yad blong Haos Tapolen blong mi blong givim i kam long mi, mo i mas bonem ol gris blong hem blong gudfala smel blong hem bambae i mekem mi mi glad tumas long hem.

7Yufala i man blong mi, be yufala i girap, yufala i stap go mekem i krangke wetem ol devel ya we bodi blong olgeta i olsem nani. Yufala i stap kilim ol anamol blong yufala long open ples blong mekem sakrefaes long olgeta, be yufala i no mas mekem fasin ya bakegen. Hemia i wan loa we bambae yufala i mas holem oltaem nomo, gogo i no save finis.

8“Mo sipos wan long yufala no wan narafala man we i stap wetem yufala i wantem mekem wan sakrefaes we i bonem i bon evriwan no wan narafala sakrefaes,

9be i no tekem i kam long doa blong yad blong Haos Tapolen ya blong givim i kam long mi, i go mekem long wan narafala ples afsaed, man ya, bambae mi mi no moa kaontem hem, se i man blong mi.

10 Jen 9.4; Lev 7.26,27; 19.26; Dut 12.16,23; 15.23 “Mo sipos wan long yufala no wan narafala man we i stap wetem yufala i kakae mit we blad blong hem i stap long hem yet, bambae mi mi tanem baksaed long hem, nao bambae mi mi no moa save kaontem hem, se i man blong mi.

11Hib 9.22Olgeta samting we i gat laef, be laef blong olgeta i stap long blad blong olgeta. Taswe mi mi mekem rod blong yufala se yufala i save kilim anamol, mo pris i save kafsaedem blad blong hem i go long Olta ya blong mi, blong tekemaot ol sin blong yufala. Blad blong anamol, we i olsem laef blong hem, hem nao i save tekemaot ol sin blong yufala.

12Taswe mi mi talem long yufala, se yufala wetem ol narafala man we oli stap wetem yufala, bambae yufala i no mas kakae mit blong anamol we blad blong hem i stap long hem yet.

13“Mo sipos wan long yufala no wan narafala man we i stap wetem yufala i go lukaot mit, nao i holem wan anamol no wan pijin we i klin long fes blong mi, mo i kilim, hem i mas kafsaedem blad blong hem i go long graon mo i mas berem.

14Olgeta samting we i gat laef, be laef blong olgeta i stap long blad blong olgeta, taswe mi talem long yufala, se yufala i no mas kakae mit blong anamol we blad blong hem i stap long hem yet. Sipos wan long yufala i kakae mit olsem, bambae mi mi no moa save kaontem hem, se i man blong mi.

15“Mo sipos wan long yufala no wan narafala man we i stap wetem yufala, i kakae mit blong anamol we i ded hem wan, no we wan wael anamol i kilim i ded, man ya i mas wasem klos blong hem, mo i mas swim, mo bambae i stap doti olsem go kasem long sapa, nao biaen bambae hem i jes klin bakegen long fes blong mi.

16Be sipos hem i no wasem klos blong hem, no i no swim, bambae hem i mas kasem panis from.”