Esikel 2 - Bislama Bible Revised 2012

1Long mi, i talem se, “Man blong wol ya. Yu stanap. Mi wantem toktok long yu.”

2Taem hem i stap toktok long mi, Spirit blong hem i kam long mi, i mekem mi mi stanap. Nao mi harem hem i gohed i talem se,

3“Man blong wol ya. Bambae mi sanem yu yu go long ol laen* blong Isrel* ya. Olgeta oli girap oli agens long mi, mo oli stap agens long mi yet olsem we ol bubu blong olgeta bifo oli stap mekem.

4Olgeta oli stronghed tumas, mo oli no save ona long mi. Be mi mi Hae God, mi Masta* blong yufala, taswe mi wantem sanem yu yu go blong talemaot ol samting long olgeta we mi wantem talem long olgeta.

5Olgeta ya oli stronghed, mo nating we oli lesin long yu no oli no lesin long yu, be bambae oli mas save se i gat wan profet i stap wetem olgeta.

6“Be yu yu no mas fraet long olgeta ya, mo long ol tok we bambae oli sakem long yu. Bambae oli mekemhed, oli no save lesin long yu, mo bambae oli ting rabis long yu. Bambae i olsem we yu stap sidaon long ol skopion long medel blong ol ropnil. Be yu no fraet long ol stronghed ya mo long ol samting ya we bambae oli talem.

7Yu mas talemaot tok blong mi long olgeta, nating we bambae oli lesin long yu no oli no save lesin. Yu mas save we olgeta ya, oltaem oli stap girap oli agens long mi.

8“Yu mas lesin gud long ol samting we bambae mi talem long yu naoia. Yu yu no mas girap agens long mi olsem olgeta ya. Yu openem maot blong yu, yu kakae samting ya we bambae mi givim long yu naoia.”

9Rev 5.1Nao mi luk wan han i kamaot we i stap holem wan buk* we oli raetem ol toktok i stap long hem.

10Nao han ya i openem buk ya long fes blong mi, mo mi luk we ol toktok i stap long evri haf blong hem. Long buk ya oli raetem krae blong ol man we oli sore, mo krae blong olgeta we oli krae bigwan, mo krae blong olgeta we oli stap harem nogud tumas long bodi blong olgeta.