Eksodas 14 - Bislama Bible Revised 2012

Ol laen blong Isrel oli gokros long Red Si

1Nao Hae God i sanem Moses

2blong i go talemaot long ol laen* blong Isrel* we hem i talem se, “Yufala i mas tanemraon bakegen blong go stap klosap long ples ya Pihahirot, long medel blong ples ya Migdol mo Red Si, klosap long ples ya Baljefon. Bambae yufala i mekem ples blong yufala klosap long solwota.

3Nao king bambae i ting se yufala i lusum rod, yufala i stap wokbaot olbaot nomo, we draeples i blokem yufala, yufala i no save aot.

4Nao bambae mi mi mekem king i mekemhed, nao bambae hem i kam blong ronem yufala. Be fasin we bambae mi mi winim hem wetem ol soldia blong hem bambae i leftemap nem blong mi i go antap olgeta. Nao ol man Ijip ya bambae oli save we mi mi Hae God.” Nao olgeta oli mekem olsem we hem i talem.

5Nao taem king i harem nius we olgeta ya oli ronwe finis, hem wetem ol haeman blong hem oli jenisim tingting blong olgeta, oli talem se, “?Yumi mekem olsem wanem ya? !Yumi letem olgeta oli ronwe, be yumi lusum ol slef* blong yumi ya!”

6Nao hem i mekemrere ol kat blong faet blong hem, mo i singaot ol soldia blong hem oli kam wanples.

7Hem i tekem sikis handred kat blong faet blong hem we oli beswan, wetem ol narafala kat blong faet blong hem mo ol komanda blong hem.

8Nao long taem ya, ol laen blong Isrel ya oli stap harem gud from we oli win finis, mo oli stap wokbaot i go, be Hae God i mekem king ya i mekemhed bakegen, nao hem i girap, i biaen long olgeta blong kilim olgeta.

9Hem wetem olgeta soldia blong hem, mo olgeta hos blong olgeta wetem ol kat blong faet blong olgeta, mo ol draeva blong ol kat ya, olgeta oli biaen long ol laen blong Isrel ya, gogo oli kam kasem olgeta long Red Si, klosap long tufala ples ya Pihahirot mo Baljefon.

10Nao taem ol laen blong Isrel oli luk we king ya wetem ol soldia blong hem oli stap kam, oli fraet tumas, oli krae i go long Hae God blong i givhan long olgeta.

11Mo oli tok long Moses, oli talem se, “?From wanem yu tekemaot mifala long Ijip, blong mifala i ded long draeples ya? ?Yu ting se Ijip i sot long beregraon? !Yu luk! !Yu tekemaot mifala longwe, be blong spolem mifala nomo!

12Mifala i talem long yu finis, se samting ya bambae i olsem. Mifala i talem se i moa gud mifala i stap nomo long Ijip, we mifala i slef nomo blong olgeta, be yu yu no harem tok blong mifala. !Sipos mifala i stap wok slef* nomo longwe, hemia i moa gud, i winim we bambae mifala i ded long draeples ya!”

13Nao Moses i talem long olgeta se, “!Yufala i no fraet! !Yufala i mas stanap strong! Tede bambae yufala i luk ol samting we Hae God bambae i mekem blong sevem yumi. Bambae yufala i no moa save luk ol man Ijip ya bakegen samtaem.

14Hae God bambae i faet long saed blong yumi, mo bambae i no moa gat samting blong yufala i mekem.”

15Nao Hae God i talem long Moses se, “?From wanem yu krae i kam long mi, blong mi givhan long yufala? Yu go talem long olgeta ya blong oli no gobak, oli gohed.

16Yu leftemap wokingstik blong yu, yu holem antap long solwota, nao bambae solwota ya i seraot long tu haf, mo bambae yufala evriwan i save wokbaot long drae graon nomo blong gokros.

17Be bambae mi mekem ol man Ijip ya oli mekemhed yet, nao bambae oli girap, oli biaen long yufala. Be fasin we bambae mi winim king ya wetem ol soldia blong hem bambae i leftemap nem blong mi i go antap olgeta.

18Mo taem ol man Ijip oli luk we mi winim olgeta olsem, bambae oli save we mi mi Hae God.”

19Nao enjel* blong God we i stap go fastaem long ol soldia blong ol laen blong Isrel, hem i muvaot, i go stap biaen long olgeta. Mo bigfala klaod ya tu i muv, i go stap biaen long olgeta, nao i stap long

20medel blong ol soldia blong king blong Ijip mo ol laen blong Isrel. Bigfala klaod ya i mekem we ples i kam tudak olgeta long ol soldia blong Ijip, be i stap givim laet long ol laen blong Isrel. Nao long naet ya, samting ya i mekem we ol soldia ya oli no save kam klosap long olgeta.

21Nao Moses i leftemap han blong hem antap long solwota, mo Hae God i mekem is win i blu strong, i kam seraot solwota ya long tu haf. Long naet ya, win ya i stap blu strong olsem gogo kasem delaet, nao i mekem we ples ya long medel blong tufala solwota ya i kam drae olgeta.

221 Kor 10.1,2; Hib 11.29Nao olgeta oli wokbaot long drae graon nomo, oli gokros long medel blong tufala solwota ya, we tufala i stanap olsem tufala stonwol.

23Nao ol soldia ya blong Ijip oli kam biaen long olgeta, mo oli kam long medel blong tufala solwota ya.

24Be Hae God i stap long bigfala faea ya we i stanap wetem bigfala klaod ya, mo taem i no brok delaet yet, hem i luk i kam long ol soldia ya, nao i mekem olgeta oli lusum hed.

25Hem i mekem we ol wil blong ol kat blong faet blong olgeta oli stap fas long sofmad, nao oli no moa save go kwik. Nao olgeta oli talem se, “!Hemia Hae God ya! !Hem i stap faet long saed blong olgeta! !Taswe yumi fas olsem! !Yumi mas ronwe long olgeta ya!”

26Nao Hae God i talem long Moses se, “Yu leftemap han blong yu bakegen antap long solwota ya, nao bambae i kam kavremap ol man Ijip ya, wetem ol kat blong faet blong olgeta mo ol draeva blong olgeta.”

27Nao Moses i leftemap han blong hem antap long solwota ya, mo taem i brok delaet, solwota i kam fulap long olgeta ples blong hem bakegen. Ol soldia blong Ijip oli traem ronwe long hem, be Hae God i mekem solwota ya i kam kavremap olgeta,

28nao i draonem ol kat blong faet blong olgeta, wetem ol draeva blong olgeta, mo olgeta soldia blong olgeta. Long taem ya, olgeta man Ijip ya evriwan i draon, we i no gat wan i laef.

29Be ol laen blong Isrel oli wokbaot gud nomo long drae graon long medel blong tufala solwota ya we tufala i stanap olsem tufala stonwol, nao oli gokros long narasaed.

30Long dei ya, Hae God i sevem olgeta, i tekemaot olgeta long han blong ol soldia blong Ijip. Nao long moning, oli luk ol dedbodi blong ol soldia ya oli stap ledaon olbaot long sanbij.

31Mo taem olgeta oli luk paoa ya blong Hae God, we hem i sevem olgeta, i tekemaot olgeta long han blong ol man Ijip ya, oli tinghevi tumas long hem, mo oli ona long hem. Nao oli trastem hem, mo oli trastem Moses tu we i man blong wok blong hem.