Job 23 - Bislama Bible Revised 2012

Job i givim ansa long Elifas

1Nao Job i talem se,

2“Trifala.

Mi mi wantem mekem toktok

agens long God yet,

from we mi stap harem nogud tumas

long fasin blong hem.

Mi harem nogud

we mi stap singaot from,

from we hem i stap mekem

i strong tumas long mi.

3Mi wantem tumas blong save weples

hem i stap long hem.

Mi wantem tumas blong save rod

blong go long ples ya.

4Sipos mi save faenem hem,

bambae mi save talemaot ol poen blong mi

long fes blong hem,

mo mi save talemgud long hem

we fasin blong mi i stret.

5Mi wantem save

wanem bambae hem i talem,

mo olsem wanem

bambae hem i givim ansa long mi.

6Paoa blong hem i bigwan tumas,

be mi mi nating nomo,

mo hem i no save yusum paoa ya

blong daonem mi.

Sipos mi mi tok,

bambae hem i save lesin nomo.

7Mi mi wan stret man,

mo mi save toktok gud wetem hem.

Sipos mi save mekem olsem,

bambae hem i talemaot wantaem

we mi mi no mekem samting nogud,

nao bambae i no moa gat tok

bakegen samtaem.

8“Mi go lukaot hem long is,

be hem i no stap long ples ya.

Mo mi go long wes, mi lukaot hem,

be mi no faenem hem long ples ya tu.

9Hem i stap wok long not mo long saot,

be long ples ya tu mi no luk hem.

10Be nating we mi mi no luk hem,

be hem i save olgeta rod

we mi mi stap folem.

Mo sipos hem i traem

blong faenemaot fasin blong mi,

bambae hem i luk

we laef blong mi i klin gud.

11Oltaem, tingting blong mi i strong

blong folem rod we hem i makemaot.

Neva mi mi gowe long hem,

12oltaem mi stap mekem ol samting

we hem i talem.

Mi mi no save folem tingting blong mi,

oltaem mi mas folem tingting blong hem nomo.

13“Neva hem i jenis,

mo man we i agens long hem i no save win.

I no gat man i save blokem samting

we hem i wantem mekem.

14Bambae hem i finisimgud ol samting

we hem i plan blong mekem long mi.

Mo plante narafala plan olsem

i stap long tingting blong hem.

15From samting ya,

sipos mi save kam long fes blong hem,

bambae i gud tumas,

be bambae mi fraet

we mi seksek tumas from.

16-17Hem i gat olgeta paoa,

mo hem i mekem tingting blong mi

i no moa strong, i foldaon olgeta.

I tru tumas

we tudak i mekem mi mi blaen,

be i no tudak ya i mekem mi mi fraet,

hem nomo i mekem samting ya.