Nehemaea 8 - Bislama Bible Revised 2012

Pris ya Esra i ridimaot buk blong Loa blong God i go long olgeta man

1-7Nao taem i kasem namba seven manis* blong yia ya, olgeta laen* blong Isrel* oli stap gud long ol vilej blong olgeta bakegen. Mo long fas dei blong manis ya, olgeta evriwan oli kam long Jerusalem,* blong mekem bigfala miting long open ples, klosap long doa* blong bigfala stonwol ya we nem blong hem “Doa blong Wota”. Long taem ya, i gat olgeta man wetem olgeta woman, mo ol pikinini we oli naf blong haremsave samting oli stap. Olgeta oli bin askem long pris* ya Esra, blong i tekem buk blong Loa* blong God i kam, i ridimaot long olgeta. Pris ya, oltaem hem i stap stadigud long Loa ya we God i bin givim long Moses bifo blong i tijim ol bubu blong olgeta long hem. Mo long eli moning, hem i karem buk ya i kam long ples ya we olgeta oli stap hivap long hem. Olgeta oli bin wokem wan stej long timba long ples ya, blong hem i stanap long hem, nao hem wetem ol man blong hem oli go stanap long hem. Olgeta we oli stanap long raet saed blong hem, i gat Matitia, mo Sema, mo Anaea, mo Uria, mo Hilkia, mo Mahasea. Mo olgeta we oli stanap long lef saed blong hem, i gat Pedaea, mo Misael, mo Malkia, mo Hasum, mo Hasbadana, mo Sekaraea, mo Mesulam.

Nao taem hem i go stanap long stej ya, olgeta evriwan oli lukluk i go long hem, mo taem hem i openem buk ya, olgeta evriwan oli stanap. Nao hem i talem se, “!Hae God i God we i hae we i hae! !Yumi presem hem!”

Mo olgeta evriwan oli leftemap han blong olgeta, oli talem se, “!Amen! !Amen!”, mo oli nildaon, oli bodaon we fes blong olgeta i godaon kasem graon blong mekem wosip long Hae God. Nao oli girap, oli stanap bakegen.

Nao hem i ridimaot Loa ya i go long olgeta, i stat long eli moning, gogo kasem long medel dei, mo olgeta oli stap lesin gud long hem. Mo i gat ol Livaet* we nem blong olgeta, Jesua, mo Bani, mo Serebia, mo Jamin, mo Akub, mo Sabetae, mo Hodia, mo Mahasea, mo Kelitaha, mo Asaria, mo Josabad, mo Hanan, mo Pelaea, mo olgeta ya oli stap talemaot mining blong Loa ya i go long olgeta man.

8Olgeta ya oli stap tanem ol tok i go long lanwis ya Arameik,* mo oli stap talemaot mining blong hem blong olgeta man oli save.

9Nao taem olgeta oli harem ol tok ya, hem i stikimgud olgeta, mo oli harem nogud, oli krae. Be Nehemaea we i distrikejen* blong Juda,* mo pris ya Esra, mo ol Livaet we oli stap talemaot mining blong Loa ya long olgeta oli talem long olgeta se, “Hae God i God blong yumi, mo tede i wan tabu dei, i dei blong mekem lafet* blong hem. From samting ya, yufala i no krae.

10Yufala i gohom, yufala i mekem lafet. Mo yufala i tekem sam kakae mo waen blong yufala, yufala i givim long ol man we oli sot long hem. Yufala i no mas harem nogud, from we dei ya i tabu, i blong Masta* ya blong yumi. Oltaem hem i stap mekem yumi glad, mo fasin ya i stap mekem yumi strong.”

11Nao ol Livaet oli go toktok gud long olgeta blong oli no harem nogud. Oli talem long olgeta se, “Yufala i no krae, yufala i no harem nogud, from we dei ya i dei blong God, i wan bigfala dei blong yumi.”

12Nao olgeta evriwan oli gohom, oli glad, oli mekem lafet, mo oli givim sam kakae long ol man we oli sot long hem. Oli glad we oli glad from we oli haremsave ol tok ya we pris ya Esra i ridimaot i go long olgeta.

Lafet blong Wokem Wansaed Haos

13Nao long nekis dei, ol hed blong ol famle, wetem ol pris,* mo ol Livaet* oli go luk pris ya Esra, blong hem i tijimgud olgeta long ol tok blong buk ya blong Loa.*

14Lev 23.33-36,39-43; Dut 16.13-15Nao oli faenemaot we long buk ya, Hae God i bin talem long Moses bifo blong i talemaot long ol bubu blong olgeta, se evri yia, long namba seven manis,* long taem blong mekem Lafet,* blong Wokem ol Wansaed* Haos, olgeta oli mas slip long ol wansaed haos we oli wokem long lif nomo.

15Nao oli sanem tok i go long olgeta ples long Jerusalem*, mo long ol taon mo ol vilej raonabaot long ples ya se, “Yufala i go long bus, yufala i tekem ol han blong ol tri we oli gat plante lif blong olgeta, olsem paentri*, mo olif*, metel* mo pamtri*, mo ol narafala tri olsem, blong yufala i wokem ol wansaed haos blong yufala long hem, olsem we tok blong buk ya blong Loa i talem.”

16Nao ol man oli go tekem ol han blong ol tri ya, oli kam wokem ol wansaed haos blong olgeta antap long ruf* blong ol haos blong olgeta, mo long ol yad blong olgeta, mo long yad blong haos* blong God, mo long open ples klosap long doa* blong bigfala stonwol ya we nem blong hem “Doa blong Wota”, mo long open ples klosap long narafala doa ya blong bigfala stonwol, we nem blong hem “Doa blong Efrem* ”.

17Olgeta man we oli aot long Babilonia oli kambak oli wokem ol wansaed haos, mo oli stap long hem. Bifo olgeta, long taem blong Josua ya we papa blong hem Nun, ol laen* blong Isrel* oli stap wokem ol wansaed haos olsem, be biaen long taem ya, kam kasem taem blong pris ya Esra, oli no moa wokem. Hemia nao i fastaem blong olgeta oli wokem ol wansaed haos bakegen, mo olgeta evriwan oli harem gud, oli glad tumas.

18Mo i stat long fas dei blong lafet ya i go kasem las dei blong hem, evri dei, pris ya i stap ridimaot buk blong Loa ya i go long olgeta man. Lafet ya, olgeta oli wokem seven dei, mo long namba eit dei blong hem, oli mekem wosip blong klosem, olsem we buk ya i talem.