Prija 5 - Bislama Bible Revised 2012

Yu no mas kwik blong mekem promes long God

1“Taem yu go long haos* blong God, yu mas tingting gud long fasin we yu stap mekem. I moa gud yu go long ples ya blong lanem samting. Fasin ya i moa gud, i winim we yu go blong mekem sakrefaes, olsem we ol man we oli no gat hed oli stap mekem. Olgeta ya oli no save fasin we i stret mo fasin we i no stret.

2Sipos yu wantem talem wan samting, be yu mas tingting gud fastaem, ale, biaen yu tok. Mo i nogud yu kwik blong mekem promes long God. Hem i stap long heven, mo yu yu stap long wol ya, nao i nogud yu stap talem plante samting long hem.

3Sipos yu stap wari tumas, bambae long naet, yu save luk ol drim we bambae oli mekem yu yu fraet moa. Mo long sem fasin, sipos yu stap toktok tumas, bambae yu save talem ol krangke tok.

4Sam 66.13,14Sipos yu mekem wan promes long God, bambae yu mas mekem samting ya we yu promes blong mekem. Mo yu mas mekem kwiktaem, from we hem i no glad long krangke man we i save mekem promes be i no save holem.

5I moa gud yu no mekem wan promes nating, i winim we yu mekem promes be yu no holem.

6Mo i nogud yu talem ol toktok we bambae i mekem yu yu foldaon long sin, nao biaen, bambae yu mas go talemaot long man blong God bakegen, se yu yu no minim blong mekem olsem. ?From wanem yu wantem mekem God i kros long yu? ?From wanem yu wantem mekem hem i spolem ol samting ya we yu yu bin hadwok from?

7Nating we yu stap tingting blong mekem plante samting olsem wanem, no yu stap talem plante toktok olsem wanem, be ol samting ya i blong nating nomo. Yu yu mas tinghevi long God, mo yu mas ona gud long hem.

Laef ya blong yumi i blong nating nomo

8“Sipos yu luk we ol haeman blong gavman oli stap spolem ol puaman, we oli stap blokem olgeta blong oli no kasem raet blong olgeta, no oli no save jajem olgeta long stret fasin, bambae yu no sapraes long samting ya. Ol haeman ya oli no save tinghevi long ol puaman, from we oli stap aninit long ol narafala haeman we oli bos long olgeta, mo oltaem oli mas mekem olgeta ya oli glad. Mo ol narafala haeman ya tu oli stap mekem sem fasin, from we olgeta tu oli gat ol bos blong olgeta bakegen we oli mas mekem olgeta oli glad.

9“Nating we man i king no i no gat nem nating, be yumi evriwan i stap hang long ol garen blong yumi blong kasem kakae.

10“Sipos yu laekem mane tumas, nating we mane blong yu i plante olsem wanem, be neva yu save talem se yu harem gud, mane blong yu i naf. Mo sipos yu wantem tumas blong kam rijman, neva yu save kasem ol samting we yu yu wantem. Tingting ya i blong nating nomo.

11Mo sipos yu stap kam rij moa, ol man we oli stap lukluk long yu blong yu givim kakae long olgeta bambae oli stap kam plante moa. I gat wan poen nomo long fasin ya we yu save win long hem, hemia we yu save talem se yu wan rijman, be hemia nomo.

12Man blong wok we i stap wok strong oltaem, maet hem i kakae we i fulap gud no i no fulap gud, be long naet, hem i save slip gud. Be rijman, hem i no save slip gud, oltaem i stap wekap nomo, from we i stap tingting tumas long ol samting we hem i gat.

13“Mi luk wan narafala fasin tu we ol man oli stap mekem long wol ya, we i nogud we i nogud. Oli lego plante gudfala samting long laef blong olgeta, blong oli save putumgud ol mane blong olgeta i stap.

14Be biaen, oli mestem, nao oli spenem mane ya long wan rod we oli no win nating long hem, mo oli no moa gat mane i stap blong livim i blong ol pikinini blong olgeta.

15Job 1.21; Sam 49.17; 1 Tim 6.7Taem yumi bon long wol ya, yumi no karem wan samting i kam, mo taem yumi ded, bambae yumi no save karem wan samting i go wetem yumi. Nating we yumi wokem plante samting, be taem yumi ded, bambae yumi no save karem wan samting nating i go.

16Yumi gobak olsem nomo we yumi bon long wol ya. Be fasin ya i no stret nating. I stret blong man i karem sam samting long ol hadwok blong hem, be ol hadwok ya blong yumi i olsem we yumi stap resis olbaot nomo. !Yumi no kasem wan samting nating long hem!

17Oltaem long laef ya blong yumi, yumi stap kamhom we i let finis, yumi stap kakae long tudak nomo, mo yumi stap harem nogud tumas. Oltaem yumi stap wari, mo yumi stap kros, mo yumi stap sik.

18“Mi mi luksave se nambawan samting we man i save mekem, i blong hem i gohed nomo, i stap kakae mo i stap dring, mo i stap glad long ol samting ya we i stap hadwok long hem long sotfala laef ya we God i givim long hem. Hemia nao rod blong laef blong yumi.

19Sipos God i givim bigfala graon wetem plante samting long wan man, we i mekem man ya i rijman, mo i letem hem i stap glad long ol samting ya, i gud man ya i stap talem tangkiu long hem from, nao oltaem, bambae i stap glad long ol samting ya we i stap hadwok long hem.

20Nating we man ya i savegud we laef blong hem i sotfala, be bambae i no save wari tumas long samting ya, from we God i letem hem blong i stap glad long ol samting ya we i stap hadwok long hem.