Jeremaea Sotfala stori blong buk ya - Bislama Bible Revised 2012

Sotfala stori blong buk yaLong buk ya, Profet Jeremaea i stap talemaot tok blong Hae God long ol man long kantri ya Juda.* Tok blong hem i stat long namba totin yia we King Josaea i stap rul, mo i stap gohed, i go long taem blong King Jehoeakim, mo long taem blong King Jehoeakin, gogo kasem en blong taem blong King Jedekia. Nao long yia* ya we i gat faef handred eiti sikis yia i stap yet blong kam kasem yia we Kraes* i bon long hem, King Nebukadnesa blong Babilonia i karemaot ol laen* blong Isrel* oli go wok slef* long kantri blong hem.Long ol yia ya, profet ya i stap talemaot long ol man Juda, we Hae God bambae i panisim olgeta, we bambae i spolemgud ples blong olgeta, mo bambae i karemaot olgeta oli go wok slef long narafala kantri, from we oli stap mekem wosip long ol aedol, mo oli stap mekem sin agens long hem. Mo profet ya i stap gogo, hem i luk we ol samting ya we hem i stap talemaot, oli kamtru. King Nebukadnesa i kam wetem ol soldia blong hem, i flatemgud taon ya Jerusalem,* mo i brekemdaon haos* blong Hae God long ples ya, mo i karemaot King Jedekia wetem ol man Juda oli go wok slef long kantri blong hem, olsem we profet i stap talem long ol man Juda. Be hem i talemaot tu we biaen, Hae God bambae i gat sore long olgeta, i tekem olgeta oli kambak long ples blong olgeta bakegen, mo we bambae i mekem kantri blong olgeta i stanap bakegen.Buk ya i gat faef haf blong hem.Long fas haf, God i singaot Profet Jeremaea blong i talemaot tok blong hem.Long seken haf, profet i stap talemaot tok blong Hae God long ol man Juda long taem blong King Josaea, mo long taem blong King Jehoeakim, mo long taem blong King Jehoeakin, mo long taem blong King Jedekia.Long namba tri haf, i gat ol ripot blong profet we Baruk, sekretari blong hem i raetemdaon, wetem ol narafala tok blong Hae God, mo ol narafala samting we i kasem profet ya.Long namba fo haf, profet i talemaot tok blong Hae God, we i agens long ol narafala kantri.Mo long namba faef haf, i gat sotfala stori we i tokbaot bigfala trabol ya we i kasem Jerusalem wetem ol man Juda, we oli go wok slef long Babilon.Profet ya, hem i wan man we i lavem ol man blong hem tumas, mo i no laekem nating blong talemaot we Hae God bambae i panisim olgeta. Long plante ples long buk ya, hem i harem nogud tumas, from we Hae God i singaot hem blong i kam profet, nao i stap tok from ol samting ya we i mekem hem i harem nogud. Be hem i harem tok blong God i stap wok long tingting blong hem olsem we faea i stap bon, nao from samting ya, hem i no save holemtaet, i mas faerap long olgeta.Sam tok blong profet ya we i gudwan tumas i no tokbaot nomo ol trabol we i stap kasem olgeta long taem blong hem, be i poen i go long taem we Hae God bambae i mekem niufala promes wetem ol man blong hem. Hemia promes we bambae oli no nidim wan tija blong i stap tijim olgeta long hem, from we Hae God bambae i raetem tok blong promes ya long tingting blong olgeta. Yu luk japta 31, vas 31 go kasem vas 34.Ol haf blong stori long buk yaHae God i singaot Profet Jeremaea blong i kam profet 1.1-19

Profet i stap talemaot tok blong Hae God 2.1—25.38

Ol samting we i hapen long laef blong profet Jeremaea 26.1—45.5

Profet i talemaot tok blong Hae Godagens long ol narafala kantri 46.1—51.64

Ol enemi oli flatemgud Jerusalem 52.1-34